Read berom Iyɔp 13 Bible Online

Iyɔp 13 - berom bible

Iyɔp 13

¹“Pyɛ́ mwa de hwà ha, e sé de ma ga tik nà di ɛ? Ma wok ko ma tɔk yɛ mwa.

²Pyɛ de yin a tɔk, ma tɔk yɛ, ma sé bwôl bama wɛt.

³Mwin, mê ha na Womo De A Dal Na Reto Mwa, ko me simo wot tó cuna na Dagwi e ra kun de ma vɔk.

⁴Ko yin, yin e yɛt a me nebɔs zɔng, yin e vyoshon zɔng, vit a pyɛ de yin ê kyɛm yin ra.

⁵Ka yin a yang sǎ yuu nedem min, bê jut in vê netsitsɛng.

⁶A remo wok in retin sekun hom, wet in betong na dak gabɔk hom.

⁷Yin e jut nû Dagwi na yin ra me bɔs a? Na yin sɛlɛ hɛ na râ cɛk re?

⁸Yin e ha ano na yin dura, yin e raa bamâ Dagwi, yin e tumal bemat nuha e tô Dagwi rɛt?

⁹E sè a yin naka jeng de a ngyɛgɛt hin arɛt, kɛ yin e kwɛlɛng hɛ sede yin e vɛ́sɛ a bemat bɔs arɛt?

¹⁰Gbing-gbing Dagwi e gyong in, sede yin e dura simô to e lɛrɛ.

¹¹Nedyɛt nerey nerat ne tɛ̀ in yin ye lot wɛt a? Bengyip mɛ bê kaba hin wɛt a?

¹²Cinat neha min na sé sede fongôl kya. Ha de yin e ha hê dul bato min ha sé sede secwem zɔng.

¹³Sǎ a me hin yuu, nɔt me hin gwong na me hanat, kayɛ pyɛ de yê tɛ́ ɛ, yè tɛ́ ɛ.

¹⁴Ma sé e yong me na me gas me na rebek remo, ma ga ye waa à neken hom.

¹⁵Ka Dagwi ê mɔrɔ me, mê tɛ̀ bengyip wɛt, sɛ̌ ma wɔ na sekun hom e nuyel mɛ.

¹⁶Hemo hê tɛ̀ me sey neken hom, yaga mwat de e sap Dagwi wɛt, e tɔk wɔ e nuyel mɛ wɛt.

¹⁷Wet betong hywɛ na neha hom, pyɛ de ma hanat ye yel e betong mō.

¹⁸Remo ma ga yong me yaga sekun hom de ba tɛ̀, ma tɔk me kyè wɔ di wɛng.

¹⁹Wa a sé de ê dak gabɔk yaga me ɛ? Ka ba sɛ̀, ko mê hala neken hom me ku.

²⁰À Dagwi, ra a me pyɛ́ bya zɔng, ano mê lɛrɛ me yi na hwo wɛt.

²¹Tik tabak me! Hwo kwon tɛ̀ bengyip mō be sɔ me hywiri wɛt.

²²Ano kwong hwô yila, mê hanat; kɛ hwô tik na me ha, na hwo de hanat a me.

²³Neburu hom na banɛn hom ba sé ala ɛ? Tik mɛ tɔk pyɛ́ de ma buru na banɛn de ma ra.

²⁴Sé ya tɛ̀ hwà lɛrɛ a me bayis mō ɛ? Hwà jut me, ma sé mwât repugu mō ɛ?

²⁵Hwô tak a bwok-rwang de gul gwo doysa gwɛ, kɛ hwô raa bol byɛmɛ ɛ?

²⁶Hwà jɛk pyɛ́ vyes e ra me, hwà sé tɛ̀ me na retek, me jut banɛn na negbarak de ma ra e jeng newen hom.

²⁷Hwà ga tɛ̀ bol hom e tê sesêk cɔ́gɔt, hwó bɛrɛng boros hom mwa, hwó masa tas bol hom mwa kwɔn de ma boro.

²⁸Mwasi e lashe hɛ sede pyɛ de ya ga bɔsɔ, sede gworugu de kǔt tangapurus gwa re.”