Read berom Iyɔp 14 Bible Online

Iyɔp 14 - berom bible

Iyɔp 14

¹“Mwat de hwā a tɔ ɛ, nepɔlɔ mɛ na sé tyɔng zɔng, ko na sila na reyɔm.

²Sede jamuk de wa tulu, wa ras vòo, wa to ye nɔɔshɔsh e jeng tyɔng, ano nepɔlɔ mwat ne tala hɛn sede zina de he ye bit.

³Mwat a sé sɛ́ de hwó bɛrɛng hɛ ɛ? Hwó yel na me e shɔt e nuyel mō a Dagwi a?

⁴Wa e kyɛm a nusu na pyɛ haalal e ji yê ligis ɛ? Wey, vit à mwat!

⁵Mwin mwasi a vɔk yɛnɛ mɛ de ba ga yɛrɛ a yɛ, ko pɛl mɛ ba sé e bara na hwo, hwà ga tɛ̀ á yɛ yɛnɛ, vit a hɛ na reto de ê ye zɔ̀k.

⁶Tik bɛɛ mɛ muu, na me to vɔk yey pyɛng, nepɔlɔ mɛ na sé sede mwât fwom de e gyeng dyam tala.

⁷Retin cɔgɔt de ba ga gang rɛ, bê sɛt yey rê to turuk bɛ̀, rê to tabas nelang wɛt a?

⁸Mwa ano de berinis rɛ ba ga kwop, kpɔk tin o hê wey ɛ e kwɔn o.

⁹Ko yaga he sɛsɛm ɛ nshi he tē gbuk à jamuk kɛ berang.

¹⁰Ko mwasi e ku, tala mɛ a hane, â hwɔtɔ nesong ne yɛnɛ mo, e gwa de a sɛ́ ɛ?

¹¹Sede nshi de ne tala hɛn e kadung, sede rɔt de nshi ne ye jɔng;

¹²ano mwat e ku, e to sene wɛt. E de ba sene jeng de lagwi wo ba ye shǔt, jeng á yane de be ba sene hɛ yî nevwa mɛ.

¹³À Dagwi, ka hwà yâng lɛrɛ me e kwɔ̂n bevuvwel, hwo lɛrɛ me sɛ̌ shom mō ya ye rɔ̀s, hwo tɛ̀ a me tuk de hwô bare na me.

¹⁴Sede mwat a ku, e to vɔk neken arɛt? Mwa nepɔlɔ̂ fwom hom mê gyeng, sɛ̌ mwat de e sege me a vey.

¹⁵Hwô yila, mê hanat a hwo, hwô vɔk cwey fwôm vɔ mō.

¹⁶Ano kwong hwô masa tas bol hom, na kwɔn de ma boro, ko hwo bɛrɛng banɛn hom wɛt.

¹⁷Bê bang neburu hom e ji dap, hwô rɔgɔs a me banɛn hom wɛt.

¹⁸Beta be gabsa be cɛgɛt hɛn, ko gbondong, be sek gwɛ yi e kwɔ̂n gwɛ.

¹⁹Nshi ne reng beta bè tɛ́ ɛn fɛkfɛk, tɛmɛ-nshi wo kus vwel wo kyè mɛ. Ano de hwó wey na sɛt yey mwat.

²⁰Hwà dal gap mwat gbak-gbak, yaga ano e wey ɛ zɔng. Hwó sege bwâng bayis mɛ ko hwó ro ɛ.

²¹Nèy mɛ na sɛ̀ nerey ko a tɔk wɛt, ba tɛt nerey mɛn ko vit a mwat de a yang ɛ ngyɛ̀k.

²²E wok na nevɛ̌t rebek mɛ, ko e bare na yey sit de a vɔk.”