Read berom Iyɔp 15 Bible Online

Iyɔp 15 - berom bible

Iyɔp 15

¹Ano kwong Elifas wo Teman a toyo a Iyɔp ngan:

²“Mwat netsitsɛng e ha yerê neha netɔn nemo wɛt, e sila nu na neha gul zɔng.

³Hwó tɔrɔng e ra neha de na sé yapyi zɔng, kɛ neha de vit a nɛ na to.

⁴Ey ra mō ano mo, hwà sé ro na sâp Dagwi, hwà sé tɛ̀ be tik nà re a Dagwi fongol.

⁵Banɛn mō be jɔgɔt nu mō na he ha; ko hwó kasa râ jɔgɔ na nehywɛ bemat.

⁶Nu mō ha vo o, ko de e me wɛt, kahɛ ha de ha nusu e nu mō, ha gang o.

⁷E hwo a mwat de ba tanga tɔ o arɛt? Kɛ gyam be tɛ̀ berahwol hwà sɛ́ a?

⁸Hwô kyɛm hwo wok vô redu Dagwi arɛt? Hwó tē hwo zɔng hwà ye mak a netsitsɛng mwa a?

⁹E sé de hwà tɔk, de wot a dun ɛ? E nɛ̌ netsitsɛng de hwà vɔk de vit a hot na nɛ ɛ?

¹⁰Bemât shɔlɔ ba sé e ji mot na vemo de bâ kwop kpushuk, yɛn de da mō a di nerák mɛn wɛt.

¹¹Ko hwo, hwó feng na wɔrɔk Dagwi, kɛ neha mɛ ne netyang de e ha na hwo wɛt a?

¹²Hwà ga row nehywɛ mō, hwó bɛrɛng hot, bɛɛ̀ byɛs.

¹³Hwà doyo shom mō wɔ e ra Dagwi, hwà tik neha yerê nemo ne nusu e nu mō!

¹⁴E wɛ̌ mwat de ba sɛ̀ ɛ vit à nɛn ɛ? Tɔ̂ hwā de ba tɔ, na a sè cik ɛ?

¹⁵Mwin, Dagwi e tɛ̀ gap wɛt e ra vemo de ba nára a yɛ bato mɛn, ey, a ka jut lagwi wɛ wa sɛ́ jɛrɛ wɛt.

¹⁶Tàga mwat de a sé byɛm-byɛm, a vɔk mɔt, mwat de â jut pyɛ́ vyes ya ga tɛ́ ɛ pyɛ̂ re mɛ.

¹⁷À Iyɔp, wet betong na me, pyɛ de ma ga di e yɛ de me kulu wɛshɛrɛk wɔgɔ,

¹⁸yɛ à yemo de bemat netsitsɛng ba ha na bedabeda mɛn, ko ba lɛrɛ mɛ wɛt.

¹⁹E yɛn zɔng de ba nɔng ɛn sevwel o, vit a mwat duk de e kwey e ji sɛ.

²⁰Mwat vwes e sɔ rezot mwa nepɔlɔ mɛ, ba tik nepɔlɔ tyɔng yaga vemo de vit à yɛn na toshô reyɔm.

²¹E wokos fwɔ e betong mɛ, ko a tē lot, jeng de a sé e sangâl yey dyɛngɛ, gbik a vey hwo e ra yɛ.

²²A kana tɛ̀ e yey be hala hɛ washak yi e lwil wɛt, wal wa sé gyeng na wo wey na yɛ.

²³E kyě ra gwogwolom e de jamâ pyɛ̂ re, e tē, ‘A yɛ ɛ?’ A tɔk jey ya ga doyo a yɛ.

²⁴Reyɔm na tumbang be tɛ̀ ɛ a vos bengyip, ba ga di wɛng e ra yɛ, sede gbɔng gwɔ̀m de â yong ɛ yaga como.

²⁵Yaga â sogo na a ra repugu na Dagwi, e dak kaa, e simo byɛs Womo De A Dal Na Reto Mwa.

²⁶Ko yaga retek me a to nára hɛ wɔ na yɛ, a vɔk ɛ ruga mɛ de a varas wɛ kpá.

²⁷E kyɛm a ra yol wɛt, a di de a mɔsɔ, yeneng bayis mɛ ya ga nusu suul, a ga tɛnɛ gworawit e nɔrɔ zɔng.

²⁸A sangal e barîn bagbɔng bapomo, e ji nelɔ nemo de vit a mwat de a sé sangal ɛ.

²⁹E tɛ́ ɛ darwey wɛt; nedanerey mɛ ne tɛ̀ to wɛt, rezina mɛ re ye bit.

³⁰A rɔda hywit ɛ yi e lwil wɛt, a sé sede cɔgɔt de kya hê rangas nelang o, sede cɔgɔt de gul gwo wɔgɔm jamuk mo.

³¹Hwo kwɛlɛng to mo na hwo tɛ̀ gap e ra nerey mō wɛt, na sé yapyi; ano de be ba tala hwo na yapyi.

³²Bê tala he mwa gyam jeng mɛ ye vey, ko nelang mɛ nê to ras vòo wɛt.

³³Sede retîn anap de re wɔgɔm nèy yɛ, ne sè rɔngɔl neven, jamuk yɛ yê wɔgɔm hɛ sede cɔgɔ̂t pwat.

³⁴Regyɛng bemat de be sap Dagwi wɛt bê bidɛ yere, ko kya hê wey na nelɔ mɛn de ba lɔk na dyâm bang nu.

³⁵Yɛn e yongos nengyas e neyey mɛn, ko be ra pyɛ́ vyes e yey mɛn, be yongos kwɛlɛng.”