Read berom Iyɔp 16 Bible Online

Iyɔp 16 - berom bible

Iyɔp 16

¹Iyɔp a hanat a ye,

²“Ma ga wok yere pyɛ́ yemo zang pyak, mwa hin, yin a sé vê wɔ́rɔk wɛt ko vê gwɛ̌ reyɔm zɔng.

³Neha gul na vɔk yɛnɛ bɛ, kɛ sé ya ra o de hwà toyo a me na ha ayi.

⁴Me tɔk ha sede hwo arɔng, ka yin a sé e negwɔn de ma sé e ji mo, ma yâng vɛ́sɛ hin na neha, me raa me digis rato.

⁵Ko me ha neha de nê gwɛ a yin ɛ yey ting, neha de nê nunus yi e nu hom nê ra a yin hwâl reyɔm.

⁶Ka ma ha, nepep rebek nê hala me wɛt, kɛ ma saa yuu, rining o.

⁷Remo, Dagwi a ga tɛ̀ me gbɛrɛk, ba ga wey na belɔ hom mwa.

⁸E dî bemat, reyɔm ra sé yaga banɛn hom, ko sɔ me, ha tɛ̀ me gwɔshɔk, he dura ma sé mwât buru.

⁹E ji nepep shom mɛ, â kangat me vyéy e bɛɛ me ves, e roros yìn mɛ e ra me, mwât repugu hom e tē zùk a bayis e ra me.

¹⁰Ba wuma nenu mɛn hwɔɔng e ra me, ba dak a me ranang, yaga ba byɛs me, yɛn a gworo me.

¹¹Dagwi ê row me na vemo de be sap cī, a ga barak me e vɔ bemât neves.

¹²Ma sé sangal tyang, a shara me, a ta a me tsót, ko a bunut me,

¹³a ga rene me, bemât begbang mō ba gworo me. E ló me e pyík, vit a nemwishish, a mɔrɔ yɛ̌ hom, e lusha nshi mo e vwel.

¹⁴E tɛ̀sɛ a me baram, yemo à jeng e ra yemo a jeng, e ro me cùu sede mwat como.

¹⁵Ma tolo cɛ̂k rugu, me bang me rebek hom, ma ga tɛ́ me sede fongol zɔng.

¹⁶Ma sǎ e de tosho, bayis ba pere senge zweeyey, bayis hom bé bá bɛɛ lwil mwangalang.

¹⁷Bak o nwang, vit a me na nɛn, ko won hom na Dagwi ha sé hê tsak o.

¹⁸À jey, hwo lɛrɛ nɛn hom wɛt, ma sé e nû reku, ka ma vɔk bare hak ves e yey hom, Darwey ê wet betong na me wɛt, ko tsak o mwin, Dagwi e wokos me e sey won hom.

¹⁹Ko remo, ma vɔk mwât nuha e lagwi, e hwomo arɔng mwat a sɛ́ de ê tumal a me.

²⁰Besa hom be shɛgɛsh me, me tosho na nemwishil wàratar e nuyêl Dagwi;

²¹na a tumal a me, sede remo mwat e tumal a mwat.

²²A remo me ro neshey zɔng; ma sé e gwong wɔ e kwɔn de be to toyo wɛt.”