Read berom Iyɔp 18 Bible Online

Iyɔp 18 - berom bible

Iyɔp 18

¹Bildat wo Shuwa a hanat a ye,

²“À Iyɔp, e yě jeng de hwô yɛnɛ neha arɛt? Bare, ko e bama mo wot ê ha.

³Yaga sɛ́ de be jut ot sede berɔndɔng ɛ? Hwà tɛ̀ ot betɔn e nuyel mō.

⁴Hwô takla yaga shom arɛt? Bê to sege yong jey yaga hwo arɛt? Kɛ bê paa beta yi e kwɔ̂n vɛ arɛt?

⁵Bê rimi kywa-kya mwat vwes, lêm kya mo arɔng hê to lolo wɛt.

⁶Negbey de na sé e lɔ mɛ nê tɛ̀ ɛn lwil, kywa-kya mɛ gwô kyɛ́ ɛ râ fwom.

⁷Hwá boros kaskas, ko remo hwó hwɔlɔ bol, vô redu mō hê kyira hwo.

⁸Hwà ga hwo e ra nàrang, hwó kyè wɔ hwo e revɔng.

⁹Soro wa ga vo ɛ e tô bwol, segun sa ga hanas hɛ.

¹⁰Ba ga lɛrɛ a yɛ segun e vwel, ba ga tɛ̀ a yɛ ɛ gun e gwong mɛ.

¹¹Shísa datdat, hɛ ha tɛ̀ ɛ a vɔk bengyip e kawɛ bak, vit a gwông tele.

¹²Vyong ya sé pyɛ de yê lashe a yɛ yey, tumbang wa sé gyeng na wo wey na yɛ.

¹³Rɔ ha ga re a yɛ rehwô rebek hywiri, hé re vɔ na bol mɛ.

¹⁴E bûk sangal de a tɛ̀ ɛ gap, bê ye zɔ̌ng à hɛ, ko be wɔ na yɛ na gwɔ̀m shisa.

¹⁵E ji buk mɛ vit a pyɛ cak de ya sɛ́ ɛ myɛ, bê shusha kyâ negang e ra kwɔ̂n sangal mɛ.

¹⁶Berinis mɛ bê ye nɔɔshɔsh, nelang mɛ nê hworok.

¹⁷Reza mɛ rê vuru hɛ e jey, bê ye bam a reza mɛ e pomo.

¹⁸Bê gangta hɛ yi e kwɔ̂n negbey vɔk e lwil, ko be ro ɛ yi e jey.

¹⁹Ê vɔk hwey kɛ gwal yi e yere mɛ wɛt, bê sɛ̀ mwat de a tɛt ɛ e kwɔ̂n sangal mɛ wɛt.

²⁰Vemo de ba sé e ta a sé a yɛn zii na gaba mɛ; ko a yâng vemo de ba sé e rak kpɔrɔk.

²¹Ey mwin, hemo he a sangal bemat beves; he a kwɔ̂n yɛ womo de a tɔk Dagwi wɛt.”