Read berom Iyɔp 19 Bible Online

Iyɔp 19 - berom bible

Iyɔp 19

¹Iyɔp a hanat, a yɛ:

²“Vɔk e yɛ̌ jeng de yin ê shɔk a me yey ɛ, yin wey na me na neha ɛ?

³Zang kuru a remo yin e tɛ̀ a me buru na retek; ko yin a ka wok rekyen dusa hom wɛt.

⁴Ka a sé mwin de ma ra renɛn, renɛn o rɛ sǎ e ra to hom.

⁵Yin e dak kaa yin a dal me, yin e feng yaga reyɔm de me sɔ,

⁶tɔk in, Dagwi a ga tɛ̀ me e ji buru ko a ga hanas me na segun mɛ.

⁷Mwin! Me dak sekun ko vit a mwat de a wok me, ma yila na gbɔng fwɔ, ko ma sɛ̀ gâs badu e tē wɛt.

⁸Dagwi a ga varas me, vit a gwong de mê hywit me, a ga tɛ̀ begwong hom mwangalang.

⁹Hwà ga tɛ̀ me bidɛ nerey hom, hwà ga sey ɛ kpin negwɔm yi na me.

¹⁰Hwà ga runus me e kawɛ bak, ma ga tɛ̀ me vit, pyɛ de ma kana sɛt yey e ra yɛ, hwà ga lut yɛ sede cɔgɔt.

¹¹Dagwi a ga sogo na shom me e ra me, ko e bara me e ji vê repugu mɛ.

¹²Regyɛng bemat como mɛ ba yi mwa; ba ta rwang na be ba hwo e ra me, ba gwɔrɔ buk hom, ba tɛ́ mɛ̀ dúra.

¹³Hwà ga tɛ̀ begwa hom ba sé yikyik na me, besa hom ba ye zakzak à me.

¹⁴Cáng hom ya ga hala me, besa hom ba ga ye bam a me.

¹⁵Vemo de ba tɛ̀ gap e ra me na behwong fwom lɔ, ba jut me kwɛnɛt, ma sé mwat duk na yɛn.

¹⁶Me yila mwat fwom hom, ko e hanat a me wɛt, sɛ̌ ma dak a yɛ gabɔk.

¹⁷Ko yaga nesang rebek hom hwā hom a ga ye zak a me, begwa lagey hom be vey bagat na me wɛt.

¹⁸Nèy nesɛl ne shɛgɛsh me shɛ́gɛsh byɛs, jeng de be di me ko be ha neha neves e ra me.

¹⁹Mwa besa hom de wot a sé pyɛ jining, ba ga doyo e ra me.

²⁰Ma tɛ́ me gánjang, na negbang de ma sé mɛ.

²¹Yin tosho reyɔm hom, tosho hin reyɔm hom! Áaa, à besa hom, Dagwi a ga mǎ me, a ga nɔrɔs me vwɔ.

²²Yin e wey na me sede e yin à Dagwi, yin e simo wey na rebek hom.

²³Káa, ka ba yang jɛk neha hom! Na be dak nɛ e bwok-basa!

²⁴Be wɔrɔ nɛ e ra gwofwa na kwet dyam, na ne nàra gbak-gbak.

²⁵Ma tɔk mwât viri hom a sé kwen, ê vey tumal a me tûk tala mo.

²⁶E bama de ba ga wey na rebek remo, mê di Dagwi Darwey na bayis hom.

²⁷Me, reto hom mê di Dagwi Darwey, na bayis hom mê di ɛ, yey hom ya ga beseng hɛ.

²⁸A jam ka yin a ye, ‘Sé ya tɛ̀ wot e tak a yɛ ɛ?’ remo de e me wɛ ma hwɔtɔ a to hom.

²⁹Ko di yin à, wok in bengyip wal! Shom, yɛ̄ yé tɛ̀ be wey na mwat na wal, na yin a bin tɔk wò gâs badu e tē a sɛ́.”