Read berom Iyɔp 2 Bible Online

Iyɔp 2 - berom bible

Iyɔp 2

¹Tuhak, bemat-lagwi na to vey dura to mɛn e nuyel Dagwi Darwey, ko mwât tɛsɛ sekun, yɛ Shetan, a to vey e ji nɛ.

²Dagwi Darwey a yang ɛ, “Hwà ga ra sɛ́ ɛ?” Mwât tɛsɛ sekun a hanat a ye, “Ma sé kyě rini e de jàma e jey mwa.”

³Dagwi Darwey a yang ɛ, “Hwà kyɛ́ hwo di mwât fwom hom Iyɔp bɛ? Vit a mwat sede yɛ e jey. A sila gyat, a sé cik, e sap me, ko e kyɛ́ ɛ râ pyɛ́ vyes. Ko a sé re nuyel na tɛ̂ gap e ra me, mwa ano de hwà ga jɔgɔt me, na me wey na yɛ vit a retin.”

⁴Mwât tɛsɛ sekun a yâng Dagwi Darwey, “Hwà sé kwɛnɛt a? Kawɛ mwat e nɔng, na a bin sey mɛ pyɛ. E ye waa a kayɛ pyɛ, na a bin nàra kwen.

⁵Ko di, nára vwɔ mō na hwo ra netyâng rebek mɛ, ê dusa hwo jɛ̄ng.”

⁶Ko Dagwi Darwey a yang ɛ, “Yàa! Á wane e vwɔ mō. Ko hwo kwon ra neken mɛ wɛt.”

⁷Mwât tɛsɛ sekun a gas ɛ yi e nuyel Dagwi Darwey, ko a tɛ̀ benot beves be tow ɛ yi e tas bol wɔ e rato.

⁸Iyɔp a jut cɛk kywà, na a sosom hɛ mɛ e sangal e gwôt fongol.

⁹Hwā mɛ a yang ɛ, “Hwà rɔ́ɔ tɛ̀ gap e ra Dagwi a? Kyini hɛ, na hwo ku zɔng!”

¹⁰Ko Iyɔp a yang ɛ, “Hwó ha sede hwā de vit a to! Wot e seres nerat yi na Dagwi ko de reyɔm wɛt a?” E ji pyɛ́ yemo mwa, Iyɔp a ha pyɛ cak vyes e ra Dagwi wɛt.

¹¹Batat e ji besâ Iyɔp yɛn vɛ à Elifas wo Teman, na Bildat wo Shuwa tanga Zofar wo Naama. Yɛn a wok yerê rezot de Iyɔp e sɔ, yɛn a wuna bato mɛn, na be wo wɔrɔk hɛ.

¹²Sede ba kún ɛ yi e jey, ba tɔk tɔk ɛ wɛt, ko ba hwo takla sesin. Kawɛ mɛn a hamta gwogbɔng gworugu mɛ, ba vɛ́sɛ fongol, ba zagat e berato mɛn.

¹³Yɛn a sangal na yɛ e vwel nepɔlɔ netaama, ko hwak e ji mɛn a wunta nu, na a ha na yɛ wɛt, yaga ba di yere gbɔng rezot de a sé e ji mo.