Read berom Iyɔp 20 Bible Online

Iyɔp 20 - berom bible

Iyɔp 20

¹Zofar wo Naama a toyo a yɛ, a ye,

²“Tsak o, wɛ a tsak o, barê yey hom ha vey a me na me hanat, e tang me lootot, mê sǎ yuu wɛt.

³Ma wok tabas nengyas de ba ra a me, ko gabik hom ha dura a me pyɛ de mê hanat.

⁴Hwà kana tɔk pyɛ yemo yimo raane, yi e jeng de ba tik mwasi e jey wɛt a?

⁵Bemat beves be vɔk yey pyɛng sizɔng yaga kejeng tyɔng, yey pyɛng bemat de ba tɔk Dagwi wɛt, ye wul jeng pyak wɛt.

⁶Ka de nerey mɛ na wul lagwi, na rato me wo yel e ji bale,

⁷mwa ano e kyè wɔ wey nesheneshey sede nújey mɛ, ko vemo de bá di ɛ bê ye, a yel e gwa arɛt?

⁸A rɔda sogo a pere ye bit, sede negwi de mwat e ye bam jeng de a sene.

⁹Vemo de ba bɛɛ hɛ bayis na bayis, bê to sang di ɛ wɛt, bê ka to di o e kwɔ̂n sangal mō arɔng wɛt.

¹⁰Nèy mɛ nê jama nerat na bepɛng, yere mɛ yê to bang yele mɛn.

¹¹Bekup mɛ ba rɔɔ vɔk gap yɔkyɔk, bê lásha vɛ na yɛ e fongol.

¹²Mwa ano de neves ne tá a yɛ e wok, ko a pat jim mɛ wɛt.

¹³A bang nɛ̀ a simo hala nɛ wɛt, ko a vɔk nɛ e jim mɛ vey e remo.

¹⁴Mwa ano pyɛ̂ re e jim mɛ ya tè a yɛ nedɔm gàbak,

¹⁵A ga tula yele, ko a to hwɔs yɛ, Dagwi e sey ɛ yɛ, a tik ɛ vɔ sǎn.

¹⁶Pyɛ de mwat vwes e wɔlɔk ya sé sede nedɔm, ye mɔrɔ hɛ sede nedɔ̂m gwɔ̄m vwes.

¹⁷E di telê něy pwat wɛt, kɛ nshî shok de nɛ dɔng.

¹⁸Pyɛ́ de a tak yɔ́m na a sɛ̀, sɛ̌ a to toyo mɛ, ê vɔk yêy dyɛngɛ na yele me wɛt.

¹⁹Yaga a ngyɔklɔ bepɛng ko a ye waa a hɛn, lɔ de a bene wɛt a sey ɛ hɛ na retek.

²⁰Kât cwey simô pyɛ́ he tɛ̀ ɛ a sɛ̀ pɔngɔ e yey mɛ wɛt, ê hywit ɛ na pyɛ cak e pyɛ́ de a vɔk wɛt.

²¹Vit à pyɛ de yê tɛt a yɛ ye re, remo, a vɔk gwông sɛ̂ pyɛ wɛt.

²²E jeng de á sè e ji sɛ́ mɛ̄ reyɔm ra vey, yey sit yê bagat wɛt, ya vɛ̀sɛ a yɛ.

²³Cwey rê pyɛ́ ya sé a yɛ na a sila na jim mɛ, ko Dagwi a pere sogo shom pyep e ra yɛ, ya rangas hɛ, yɛ ya tɛ́ ɛ pyɛ̂ re mɛ.

²⁴Mwa ano de a sé tele hɛ pyɛ̂ comô dyam shi, a wɔ̀ gaba e nû kwet mang-mang:

²⁵Ba hwɔlɔ gwɛ yi e rebek mɛ, ey, nemyôl gwɛ, na nɛp e rehwô rebek de ba ga boro, vôs yey ha hwo ɛ.

²⁶Gban yas mɛ wo sé gyeng ye gyibit, kya de vit a mwat de a pɛl he wey na yɛ, pyɛ́ de ya tɛt ɛ e buk mɛ bê wey mɛ.

²⁷Lagwi wô kulu neves mɛ, jey yê ra repugu mɛ.

²⁸Bê sey ɛ pyɛ̂ nedanerey lɔ mɛ, be kyè me, bê hwɔltɔ hɛ tuk de shom Dagwi yê hwo.

²⁹Hemo he à nu mo hê mwat vwes yi na Dagwi, nedanelɔ de Dagwi a ga tik á yɛ à nane.”