Read berom Iyɔp 21 Bible Online

Iyɔp 21 - berom bible

Iyɔp 21

¹Iyɔp a hanat a ye:

²“Wet betong hywɛɛ na ha hom, hemo he sè a me wɔ́rɔk.

³Ra yin gabɔk jeng de ma sé ha, ko e bama mo yin de shɛgɛsh me.

⁴Ko me, sesin hom sa sé na mwasi wɛt! Sɛ́ ye ro me sana ra shom ɛ?

⁵Bɛrɛng hin me na yin a di pyɛ langat, yin tɛ̀ vɔ min e nu.

⁶Sede ma bare na pyɛ de ya sɛ̀ me, me wok bengyip, rebek hom re pere vow.

⁷Yaga sɛ́ de bemat beves ba rɔngɔl beken be sè kwop ko be sè gwɛsɛ gap ɛ?

⁸Yɛn a di nèy mɛn nà ga vey bemat, ko ba ga di nèy nèy mɛn arɔng.

⁹Ba sé sangal tyang e nelɔ mɛn vit a bengyip, vwɔ̂ Dagwi gwa hwo e ra yɛn wɛt.

¹⁰Bemùs mɛn be sang tik nà tɔs nèy wɛt, berɔndɔng mɛn be tɔs nèy, vit a paa nejim.

¹¹Nèy mɛn ne ra jɔgɔ sede nèy tyīmit e kwara, ne kyě gyilsit.

¹²Nèy o ne rɛ̌ fwɔ̂ lwɛlɛ̂ yom na bing, ne vɔk yey pyɛng na fwɔ̂ bedurum.

¹³Ba sé e ji nedanerey na sangâl netyang, ko remo-remo be kyè vɔk e kwɔ̂n bevuvwel.

¹⁴Yɛn vɛ de ba yang Dagwi, ‘Gas o na wot!’ Wot a vɔk cwey tɔ̂k begwong mō wɛt.

¹⁵Yɛ wà, De A Dal Na Reto Mwa, de wot ê ra a yɛ fwom ɛ? Pyɔlɔ̂ sɛ́ de wot ê sɛ̀ sede wot a re a yɛ fongol arɛt?

¹⁶Yɛn a jut nedanerey mɛn, na sé pyɛ̂ vɔ mɛn, ko barê bemât banɛn ha vey bagat na me wɛt.

¹⁷Zang ala, de be rimis kywa-kya bemat beves ɛ? Zang ala, de tumbang wo hwo e ra yɛn ɛ? Zang ala, de Dagwi e tɛ̀sɛ a yɛn yey sit e ji shom mɛ ɛ?

¹⁸Yɛn a sé sede byɛmɛ e nû gul, sede nesos de gûl rwak gwo hashe.

¹⁹Be tē, Dagwi e tabak hwey yaga banɛ̂n da mɛ, tik mwat o a sey pyɔlɔ mɛ, na a tɔk neves o.

²⁰Tik na yɛn a di wey mɛn, tik na yɛn a sɔ shôm Wo Reto Mwa.

²¹Jeng de nekên mwat na ga kwey, ê to tɔk kɛ nèy mɛ na sé sangâl yey pyɛng arɛt?

²²Mwat ê tɔk basa a Dagwi tɔ́k, yɛ de e ra shɔt yi e hwomo e lagwi bɛ?

²³Mwat hwak e ku a sè rɔngɔl wɛ́kwɛk, a sé sangâl wok neta vit à pyɛ de ye tak a yɛ.

²⁴Rebek mɛ fwerep à rɛ, sɔrɔng kup mɛ kwen o kwen o.

²⁵Ko hwak e ku e ji lashê yey, a ga sang wok neta wɛt.

²⁶Mwa yɛn ba sé pyɛ jining o, bê ku, bê lɛrɛ hɛn, ko bekut bê kyiri hɛn.

²⁷Mwin, ma tɔk bare min, begwong de yin e yong na yin a mǎ me.

²⁸Yin e tē, ‘Lɔ gbɔng mwat hemo a hɛ ɛ? Buk sangâl mwat vwes o gwa sé e gwa arɛt?’

²⁹Yin a ga rangâl bemat de ba ga kyě kyè wɔ e nedem pyak, ko yin a sey nuha mɛn wɛt wɔgɔ,

³⁰e tûk shɔt bê hala mwat vwes yi e ji reyɔm, ko bê séy ɛ, e tûk shom.

³¹Wa ê ha e nuyel mɛ negwɔn mɛ wɛshɛrɛk ɛ? Ko wa de ê tala hɛ pyɔlɔ̂ pyɛ de â ra ɛ?

³²Jeng de bê wɔ na yɛ e sak, bê gyenges sak o.

³³Ê wok netâ fongol buruk de be shusha e ra yɛ, pyak ba ga tanga kyè e ra yɛ, pyak bê kyè e bama mɛ arɔng.

³⁴Wɔ́rɔk min ha sé yapyi, vit à pyɛ cak mwin, e ji neha min sɛ̌ nebɔs zɔng.”