Read berom Iyɔp 22 Bible Online

Iyɔp 22 - berom bible

Iyɔp 22

¹Elifas wo Teman a hanat a ye,

²“E rɛ̌ de mwasi ê tɔk sɛlɛ Dagwi ɛ? Mwin, mwât netsitsɛng e tɔk ra a yɛ pyɛ cak wɛt.

³Sɛ̌ necik na sé pyɛ yey pyɛng na Wo Reto Mwa arɛt? E sɛ̂ pyɛ Dagwi de yê sè yaga vit a hwo na renɛn ɛ?

⁴A sé yaga hwó sap ɛ de a gyong o ko a tɛ̀ sekun mō a?

⁵Neves mō na kat wɛt a? Banɛn mō vit a yɛnɛ arɔng.

⁶Hwà ga sey berugu sede pyɛ̂ selek na besâ sangal mō sana retin, yi ano hwà tik ɛn warap.

⁷Hwà ga nɔ̂ng vemo de ba ga ruru nshi wɛt, ko hwà ga ro na pyɛ̂ re e vemo de be wok vyong.

⁸Sevwel sa sé na yɛ de a vɔk pyɛ̂ tô como, ko wo gap ê re nedanelɔ sevwel o.

⁹Hwà ga ro bekuma, ba kyè vɔ sǎn, hwà ga sey ɛ pyɛ de ya sé ye nehyɛn.

¹⁰Yaga ano ba ga rɔnɔ hwo na segun, pyɛ̂ té lot yê hwo o hák, yê nɔng o bengyip.

¹¹A sé a hwo mwangalang, hwà tɔk di wɛt, tɛmɛ-nshi wa ga re o.

¹²Dagwi a sé e hwomo e lagwi wɛt a? Bɛrɛng neyikyîk netangacɛn, na sé bagat wɛt!

¹³Hwà ye, ‘Dagwi a tɔk ɛ̀ pyɛ cak wɛt, e tɔk ra shɔt e lwil arɛt?

¹⁴Balê rwak ba tɛ̀ a yɛ nehywiinin ano, e tɔk bɛrɛng wɛt, e kyè e ra ragyip lagwi.’

¹⁵Hwó sangal e ra negwɔn raane nemo de bemat beves be kyè e nɛ̀ arɛt?

¹⁶Ba jut ɛn gyam be wul nepɔlɔ mɛn, nshi na ga rɛng batis mɛn.

¹⁷Yɛn de ba yâng Dagwi, ‘Gās o na wot, e sɛ́ de Wo Reto Mwa ê ra a wot ɛ?’

¹⁸Mwa ano de yɛn a sila nelɔ mɛn na pyɛ́ ryat, ko barê bemat beves ha vey bagat na mɛ wɛt.

¹⁹Vemo de ba sé cik be di, be vɔk yey pyɛng sizɔng, ko vemo de vit à hɛn na renɛn be shɛgɛsh, shɛ́gɛsh byɛs;

²⁰be tē, ‘Mwin ba ga wey na vê repugu mot, ko pyɛ de ba tɛt ɛ, kya ha ga re hywiri.’

²¹Yong o na Dagwi, na hwo sangal tyang; ano hwô sɛ̀ nerat.

²²Sey basa yi e nu mɛ, ko hwo tik ha mɛ e ji yey mō.

²³Ka hwà toyo vey na Wo Reto Mwa, hwo dyɛng to mo, ko hwô pat pyɛ́ vyes yikyik yi e kwɔ̂n sangal mo,

²⁴ka hwà ka kyě barak dyam shinang mō e fongol, celes dyam shinang e tê beta rɔt,

²⁵ka hwà jama Wo Reto Mwa e tô dyam shinang na dyam pyɛng,

²⁶ano hwô vɔk yey pyɛng na Wo Reto Mwa, ko hwô tɔk tumal e nuyêl Dagwi.

²⁷Hwô ra won na Dagwi, ê wok o, ko hwô tɔk tala pyɛ́ de hwà ga vo nu e ra yɛ.

²⁸Pyɛ de hwà ga tɛ̀ e yey mō, bê sila yɛ, negbey nê sè e ra begwong mo mwa.

²⁹Dagwi e kyɛ́ ɛ bemât tôs to, ko e sey mwat de e dyɛng to.

³⁰Ê sey mwat de vit a hɛ na nɛn, ê sey womo de yey mɛ ya sé haalal.”