Read berom Iyɔp 23 Bible Online

Iyɔp 23 - berom bible

Iyɔp 23

¹Iyɔp a hanat a ye,

²“Yunung, sesin hom sa kyírì hɛ, mwa rus de me rus vwɔ mɛ gwa sé dirik e ra me.

³Ka ma tɔk kwɔn de mê wɔ̀ sɛ̀ ɛ, na me wɔ̀ tā e kwɔ̂n sangal mɛ,

⁴ma yang misang ha hom e nuyel mɛ, me ha mwa retin pyɛ de me tó ɛ cuna.

⁵Ma yang tɛ̀ tong, me wok hanat de a vɔk yaga me, na me tɔk pyɛ de ê toyo a me mɛ. Ê yang jut gbɔng reto mɛ na a tɛ̀ sekun hom a?

⁶Hwô ra nenan na me yaga gbɔng reto mō a? Kée wey, ê wok me.

⁷Ma yang tɔrɔng na yɛ, ma yang hywit me yi e shɔt gbak-gbak.

⁸Ka ma kyè wɔ e rak, a sé e hwomo wɛt, e rwa ta, ma di ɛ wɛt.

⁹E rwa bato de e ra ɛ fwom, ma tɔk di ɛ wɛt, ma doyo e rwa batin, ma tɔk kún ɛ wɛt.

¹⁰Ko yɛ, a tɔk begwong hom, jeng de ê mara me, mê nusu sede celes dyam shinang.

¹¹Ma ga raa nekyɔ̌n bol mɛ, ma ga ye rɛng yi e gwong mɛ wɛt.

¹²Ma ga doyo yi e raa badu mɛ wɛt, ma ga gyeng ha mɛ mwa.

¹³A ga sang sege hɛ wɛt, e tɔk doyo hɛ arɛt? E ra pyɛ de yey mɛ ya simo.

¹⁴E sila pyɛ de a ga yong yaga me, pyɛ́ pyak yerê yemo a vɔk yɛ e yey.

¹⁵Pyɛ ma yane de me vow e nuyel mɛ, sede ma bare na yɛ ko me vɔk bengyip.

¹⁶Dagwi a ga tɛ̀ yey hom gbɛrɛk. Wo Reto Mwa a ga tak a me.

¹⁷A sé lwil de gwa tɛ̀ a me bengyip wɛt, kɛ nemwangalang de nà kyiri bayis hom.”