Read berom Iyɔp 24 Bible Online

Iyɔp 24 - berom bible

Iyɔp 24

¹“Yaga sɛ́ de Wo Reto Mwa a tɛ̀ tuk shɔt wɛt ɛ? Ko sɛ́ ya tɛ̀ vemo de ba tɔk ɛ bê sang di tuk mɛ mo wɛt ɛ?

²Bemat be hashe beta batô benap, be shigshi kara ko be gyenges vɛ sede e mɛn.

³Be ro bemadûng hyɛn, ko be sey ɛ rɔndɔ̂ng kuma e lek.

⁴Be ro a bepɛng na pyɛ de ya sé myɛn, ko a sé a yɛn gbing-gbing be lɛsɛ hɛn.

⁵Sede bemadung hêy gbingiring, ano de bepɛng be kyě rini, be jama pyɛ̂ hêy gbingiring de be tɔk sɛ̀, na be re mɛ̀ na nèy mɛn.

⁶Yɛn e tula pyɛ̂ re mɛn e hey, be ra nemɔ e bě anap vɛ bemat beves.

⁷Be pɔlɔs vit a pyɛ bang ɛn, vit a hɛn na pyɛ de bê dul mɛ gul.

⁸Nshî rwak yi e ra raku na ga sing ɛn varak, be tē yɛndɛng e ra beta yaga vit a kwɔ̂n lɛrɛ.

⁹Bemat beves be tùt a nehyɛn nevasal, ko be sey ɛ nèy bepɛng e lek.

¹⁰Bepɛng be kyè kpimit yaga vit a hɛn à berugu, be toros bakûs alkama ko be sè wok na vyong.

¹¹Yɛn e piri něy pwat, be farang nshî anap ko be sè wok na yêy hwɔshɔ.

¹²E ji repomo, vemo de ba sé e nû reku be rus, vemo de ba mǎ hɛn be tosho yaga neken mɛn, ko mwa ano, Dagwi e wet betong na won mɛn wɛt.

¹³Vê sogô nehywɛ ba sɛ de be kyɛ́ ɛn negbey, vemo de ba ga tɔ́k ɛn na begwông nɛ wɛt, ba kyɛ́ ɛn nà raa vɛ.

¹⁴Mwat mɔbɔs bemat e sogo jey yé rɔngɔl hywiinin, na a wɔ̀ mɔrɔ mwat pwɛng de vit a hɛ nà pyɛ cak, ko naturuk a sé gbik.

¹⁵Mwât nejwang e paa bayis e gyeng rwa nawiri, e lɛrɛ bwang bayis mɛ, e tē, ‘Vit a mwat de ê di me.’

¹⁶Naturuk begbik be tɛs nelɔ, ko nagwi be lɛsɛ bato mɛn, pyɛ mɛn cak ya sé na negbey wɛt.

¹⁷Lwil tíbit gwa sé a yɛn sede nagasi, vit a hɛn na bengyip lwil mwangalang.”

¹⁸“Yin a tē, tɛmɛ-nshi wo wey na bemat beves, benap mɛn ba ga kyini vɛ e vwel o, vit a jik de e to ye byak à bě anap mɛn.

¹⁹Nehwogot na gwi ba ga ye ywey à fwala, ano de kwɔ̂n bevuvwel he ra na vemo de ba ra nɛn.

²⁰Beneng-gwɔ de ba tɔ ɛn be ye bam na yɛn, bekǔt be vɛ́ mɛ pyɛ̂ re, be wey na yɛn sede ba gang retîn cɔgɔt.

²¹A sé ano yaga pyɛ́ de ya sé yê sang-gwon, yɛn e dura nerat vɔk na bekuma wɛt.

²²Mwa ano, Dagwi e gwɛ a yɛn nepɔlɔ yi na reto mɛ, mwa ano de ba ga tɛ̀ tis, ko vit a hɛn na barê hâ neken.

²³Dagwi e dul ɛn, e sɛlɛ hɛn, ko bayis mɛ be bɛrɛng begwong mɛn.

²⁴Be sɛ̀ nerey yaga kejeng, e bama mo ba ga ye bit be ye nɔɔshɔsh be hworok sede sɔng, ko ba yɛt ɛn sede batô pyɛ̂ yeneng.

²⁵Ka a sé ano wɛt, ko wa e tɔk ye ma sé mwât kwɛlɛng, na a dura, pyɛ mó ya sé yapyi zɔng ɛ?”