Read berom Iyɔp 27 Bible Online

Iyɔp 27 - berom bible

Iyɔp 27

¹Iyɔp a to re nuyel na cinat ha, a ye,

²“Ma sira na Dagwi Wo Reto Mwa, de a ro me na pyɛ de ya sé nyang, a tɛ̀ yey hom ye reneng,

³gbak de me pɔng, ko nesong Dagwi na sé e ji wol hom.

⁴Nu hom hê ha hâ bɔs wɛt, kɛ neha kwɛlɛng nê nusu e nu hom wɛt.

⁵Dagwi a ro mɛ̀, na me ye yin a ha tsak o, mê nàra e de ha wɔgɔ, ma sé haalal sɛ̌ ma vey ku.

⁶Mê vɔk tsak o hom gak, mê tik na wo gas ɛ na me wɛt, yey hom yê gang me wɛt, gbak de ma sé kwen.

⁷Tik na mwât repugu hom a sè sede mwat vwes, womo de a sogo e ra me bē tabak hɛ sede mwat de vit a tsak o.

⁸Sɛ́ a sɛ̂t yey yɛ womo de vit a hɛ na bengyip Dagwi, ka Dagwi a jut neken mɛ ɛ?

⁹Dagwi ê wok sesin mɛ, jeng de reyɔm ra hwo e ra yɛ a?

¹⁰Ê vɔk yey pyɛng na Wo Reto Mwa arɛt? Ê yila Dagwi kayɛ jeng a?

¹¹Mê basa a yin e ra retô Dagwi, mê lɛrɛ a yin na pyɛ de ya sé ye Wo Reto Mwa wɛt.

¹²Di, yin pyɛ min mwa yin a ga di pyɛ́ yemo, ko yaga sɛ́ de yin e ha yapyi zɔng ɛ?”

¹³“Hemo hɛ a nu mo hê mwat vwes na Dagwi, na pyɛ̂ nedanelɔ de womo de e tak a bemat e sey yi na Wo Reto Mwa.

¹⁴Sede nèy mɛ na gwɛ hɛn, wal wo wey na nɛ, ko yére mɛ yê sang re pyɛ́ ye sirik wɛt.

¹⁵Nemo de na tɛt ɛ, tumbang wo wey na nɛ, ko bekuma mɛ bê ra lwɛlɛ̂ sesin wɛt.

¹⁶Mwa ano de a tula hwôl dyam pyɛng sede fongol, ko gwɔ̂t berugu sede secwem,

¹⁷e yong vɛ̀ bɛs, ko bemat de ba sé cik be tɛ̀sɛ vɛ, bemat de vit a nɛn arɔng bê gas dyam pyɛng o.

¹⁸Lɔ de e lɔk ha sé sede lɔ̂k nàrang, e yong hɛ sede bûk mwat bɛrɛng.

¹⁹Dâ yas e dyɛng, e sang to sogo wɛt, e wunta bayis mɛ ko vit a nedanerey o.

²⁰Bengyip be hwosom e ra yɛ nagwi, naturuk gwogul rwak gwo jut ɛ.

²¹Gûl rak gwó tá ɛ gwo peres mɛ, gwó yishing hɛ yi e kwɔn mɛ,

²²gwó tsip ɛ vit a nemwishish, e tē ngyɛ́k na a hywit ɛ yi e gâp gwɛ.

²³Ko gul o gwó raa bol mɛ, na gbɔ tanga hywɛrɛ.