Read berom Iyɔp 28 Bible Online

Iyɔp 28 - berom bible

Iyɔp 28

¹“Mwin hwês dyam pyɛng gwa sɛ́, na kwɔ̂n rugû dyam shinang arɔng.

²Be cing dyam yi e ji vwel, ko be ye ywey a dyam zwey yi e beta.

³Mwat e ro lwil, ko a ngyɛgɛt yikyik wɔ e tîs vwel, a cing beta berat de ba sé e lwil mwangalang.

⁴Be cing revɔng ciwil yikyik yi e kwɔ̂n sangâl bemat, e nekwɔn de be to kweres ɛ wɛt, be kaba rwik gak na be gyirik.

⁵Yi e vwel be sɛsɛm pyɛ̂ re, ko e nɛ̂n hɛ, ha sé sede ha vɔk ɛ kya.

⁶E ji beta vwel, be sɛ̀ besafir, fongôl hɛ, gwa vɔk ɛ dyam shinang.

⁷Gwonon rê nama gwa tɔk gwong o wɛt, jagawey arɔng wa ga sang kun gwɛ wɛt.

⁸Ngyāma de ye dak kaa ya ga sang kwey ɛ wɛt, gukum arɔng wa ga kwey e gwɛ wɛt.

⁹Mwat na vɔ mɛ e dak gwofwa gbarak, e ye wuk a gwɛ ko a doyo gwɛ gup.

¹⁰E kulu lwɛl nshi e ji gwofwa, bayis mɛ be di kayɛ pyɛ ye gbɔng nerat.

¹¹E dul nshî nerɔt vit a tele, ko pyɛ de ya sé e lɛrɛ e pat yɛ wɛshɛrɛk.

¹²Ko netsitsɛng e gwa de bê sɛ̀ nɛ̀ arɛt? Ko tɔ́k ha sé e gwa arɛt?

¹³Mwat e tɔk nû dyâm nɛ wɛt, ko be sɛ̀ nɛ e jêy vê neken wɛt.

¹⁴Neciwil na ye, ‘Na sé na me wɛt’, gworep gwa ye, ‘Ma vɔk nɛ wɛt.’

¹⁵Be tɔk sege nɛ na celes dyam shinang, kɛ be tɔk mara dyam pyɛng yaga talâ nɛ wɛt.

¹⁶Celes dyam shinang kɛ dyéngere ryat sedesi yê vey na be tala mɛ̀ nɛ wɛt.

¹⁷Dyam shinang na gyilâs ba vey na be tyɛngrɛ na nɛ wɛt, ko be tɔk sege nɛ na wɔnɔ pyɛ̂ celes dyam shinang wɛt.

¹⁸Be ka tɛ̀ kaà dyéngere ryat sedesi yemo de be tang yɛ à koral kɛ krestal wɛt, pyɛ de be tala yaga netsitsɛng ya dal gap!

¹⁹Be tɔk mara dyengerê topas na nɛ kɛ wɔnɔ celes dyam shinang wɛt.

²⁰Ko sɛ̌ yi e gwa de netsitsɛng ne yis ɛ? E hɛ̂ kwɔn de tɔ́k ha sé ɛ?

²¹Ha sé e lɛrɛ vit à pyɛ cen de yɛ di hɛ, ha sé e banga na benon lagwi arɔng.

²²Reku na kwɔ̂n bevuvwel ba ye, ba ga wok hywɛ́ e ra netsitsɛng.

²³Dagwi zɔng de a tɔk gwong nɛ, a tɔk kwɔn de na yi ɛ.

²⁴Yaga e bɛrɛng jey mwa ryap, e di kayɛ pyɛ de ya sé e nɛ̂n lagwi.

²⁵A ga mara nedirik gul, a ga yɛrɛ a nshi yɛnɛ̂ nɛ.

²⁶A ga nɔ̂ng rwak nu, a ga tɛ̀ gwong arɔng yaga gbara.

²⁷Ano kwong a sɛ̀ netsitsɛng, a ha a bemasi, a ngyɛgɛt nɛ yɛɛlɛl.

²⁸Ko Dagwi a yong mwasi, bengyip Darwey vɛ à netsitsɛng, ko gas ò na ragas neves hɛ à tɔ́k.”