Read berom Iyɔp 29 Bible Online

Iyɔp 29 - berom bible

Iyɔp 29

¹Iyɔp a to re nuyel na neha mɛ, a ye;

²“Káa, ka ma yang sè sede jeng de ya ga kwey, de Dagwi á bɛrɛng me,

³jeng de kywa-kya mɛ wá tɛ̀ negbey e ra me, ko yi na negbey mɛ ma kyè e ji lwil.

⁴Jeng de má rɔngɔl na gap hom, Dagwi á dulus me e lɔ̂ sangal hom.

⁵Jeng de Wo Reto Mwa a rɔ̌ sè na me, nèy hom arɔng ná rɔnɔ me.

⁶Jeng de bèkɛngɛ hom mwa bá sila na nevasâl rɔndɔng, něy gàlum e kwɔ̂n piri nɛ̀, ko gwofwa gwa tē gbuk á me nerɔt něy!

⁷Jeng de ma kyese e rwi repomo, na me jut kwɔ̂n sangal hom e dúra,

⁸bewen de bá di me ko bá lɛsɛ hɛn, bemakuk bá sogso e tumal,

⁹bemât nuyel bá ye yuu, bá kaba nenu mɛn.

¹⁰Tɔ̀ begbɔng bemat bá ye sɛk, relem mɛn rá ye pang e nu.

¹¹Kawɛ mwat de á wok me, bá tɛ̀ a me nerat, ko vemo de bá di me bá somo me.

¹²A sé ano yaga ma seres bepɛng de bá tosho, nehyɛn de vit a nɛ na mwât sɛlɛ.

¹³Womo de á kana sè e nû reku á tɛ̀ a me nerat, ko ma tɛ̀ kuma a vɔk yey pyɛng.

¹⁴Ma tɛ̀ necik sede gworugu; ma tɛ̀sɛ tsak o sede rugu, na kpin hom.

¹⁵Ma tɛ́ me bayis na bwok; ko bol na guruk.

¹⁶Ma sè da na mwat pwɛng, me ngyɛgɛt sekun de ba tɛ̀ e ra mwat duk.

¹⁷Ma kwɔrɔs jorô mwat vwes, ko ma tɛ̀sɛ a hala pyɛ́ de a hashe.

¹⁸Ma kana bare, ‘Sangal tyang vɔk e reku hom’ ko Dagwi ê gwɛ̌ nepɔlɔ hom sede bazɛk.

¹⁹Ma sè sede cɔgɔt de berinîs yɛ be shara hɛn e ji nshi, de mwa naturuk mwɛngɛ gwo gyiris e ra nelang yɛ.

²⁰Gap hom he turu hɛ, gbang hom kayɛ jeng wa sé gyat.

²¹Bemat ba wet betong na me ba gyeng, ko ba sǎ yuu na be wok vô du hom.

²²E bama de ma ga ha, yɛn a to ha wɛt, ha hom ha yel a yɛn.

²³Yɛn a gyeng me sede remo de be gyeng rwak, ba nǎ bayis sede remo de be gyeng rwâk swigi.

²⁴Ma shɛgɛsh hɛn jeng de yɛn a sey tsak o wɛt, yɛn a tɔk gas me na halâ bayis hom wɛt.

²⁵Ma kasa a yɛn gwong de yɛn a raa, ma sangal e tē mɛn sede gbɔng gwɔ̀m e tê bemat como mɛ, sede mwât wɔ́rɔk na vemo de ba sê sesin.”