Read berom Iyɔp 3 Bible Online

Iyɔp 3 - berom bible

Iyɔp 3

¹E bama mo, Iyɔp a hwo ha, a ye, Gawey e ra tûk tɔ hom!

³Tik tuk tɔ hom he sè yapyi, tik turuk de ba tɔ me he sè tuk gawey!

⁴Tik tuk hane he sè lwil! Tik pyɛ cak Dagwi de a sé e lagwi ye sè na hɛ wɛt, kɛ negbey ne tɛ̀ negbey e ra hɛ wɛt.

⁵Tik nehywiinin tanga lwil mwangalang be kyiri hɛ! Tik bale be ye ship à hɛ! Tik lwil gwo re gâp negbêy hɛ!

⁶Naturuk hane mo, tik lwil de be tɔk mɔktɔ gwɛ, gwo dul hɛ! Tik be basa hɛ e ji nepɔlɔ̂ shey wɛt, de he nusu e ji basâ pɛl wɛt!

⁷Ka turuk hane ha yang sè vit a tɔ́, ha yang dal na yey pyɛng!

⁸Tɛ̀ bemât batô cēng be tɛ̀ tuk o yapyi, vemo de be sogo gwalwel.

⁹Tik be ro dàt nà nɔng negbey, tik tuk o he jama negbey ko he sɛ̀ nɛ wɛt, he sang di rwa hwol wɛt;

¹⁰yaga ha tik sana dul me e jim neng-gwɔ hom, ha tɛ̀ me bɛrɛng pwɛng.

¹¹Sɛ ya ró me sana ku e jeng tɔ hom, ma yang nusu revin o yi e jim neng-gwɔ hom ɛ?

¹²Sɛ ya tɛ̀ neng-gwɔ hom a gunung me, kɛ sɛ ya tɛ̀ a ngas me ɛ?

¹³A sé naka mwat a dyɛng yaang wɛt a, ka jeng ngan, ma ga dyɛng yuu nde hom, a jam na mwat a wɔ́ nevwa na a pɔnglɔ wɛt a?

¹⁴E ano de begwɔ̀m jey na bemât badu be ra vemo de ba lɔk a bato mɛn gbɔng nelɔ de na sé barin a remo.

¹⁵E ano arɔng na nèy gwɔ̀m de na sila nelɔ mɛn na dyam shinang tanga dyam pyɛng.

¹⁶Kɛ ma yang sé sede hwey de ba pat sede nèy de na sang di negbey ko tyɔng wɛt!

¹⁷Bemat beves be sǎ bes e kwɔ̂n bevuvwel wɛt, e hwomo vemo de ba ga ruru na fwom be pɔnglɔ.

¹⁸Besam bê sè dàshak e hwomo, bê to wok fwɔ̂ shisâ bedarwey mɛn de bá tak a yɛn wɛt.

¹⁹Bemat berey na besɛl o ba sé e hwomo; ko sam a sé washak yi e vwɔ̂ darwey mɛ.

²⁰Yaga sɛ́ de be tik mwât sɔ̂ reyɔm a di negbey, ko mwat de a sé e ji lashê yey na a vɔk neken ɛ?

²¹Yɛn e gyeng reku ko ra vey a yɛn wɛt, be jama rɛ, ra dal kanɛ nedanerey.

²²Yɛn e mok reku na yey pyɛng sizɔng, ko yey mɛn ye pɛngɛ na be wul kwɔ̂n bevuvwel.

²³Yaga sɛ́ de be nɔng negbey na mwat de a tɔk nuyel mɛ wɛt ɛ, yɛ de a ga hwo e segun Dagwi ngyɛng.

²⁴Pyɛ̂ re e nuyel hom, à sesin, rus hom he dɔng sede nshî lwel. Rebek ra sé wok a me.

²⁵Pyɛ de me wok bengyip ya ga sɛ̀ me, pyɛ de me tele me ya ga hwo e ra me.

²⁶Me tē pòo, vit a pɔnglɔ, reyɔm e ra reyɔm, re tak a me.