Read berom Iyɔp 30 Bible Online

Iyɔp 30 - berom bible

Iyɔp 30

¹“Ko a remo vemo de ma sé mwakuk mɛn, ba tɛ̀ me pyɛ jɔgɔ, vemo de beda mɛn ba vey nerât bevû gyengês vyēl hom wɛt.

²E yɛ̌ pyɛ de mê sɛ̀ yi na gâp fwom vɔ mɛn ɛ? Yɛn de gap ha ga tala a yɛn hywiri ɛ?

³Yaga nepɛng na vyong sedesi, ba ga tɛ́ ɛn ngaashash, be kyě rɔnɔs e hêy gbingiring naturuk na be tangal berinis.

⁴Be nɔ̀m berang hey vè jwaatat be re, berinîs cɔgɔ̂t gasi vɛ a cɔ́gɔt kya mɛn.

⁵Ba ro ɛn yi e ji bemat, ba raa hɛn na sekun sede be ro gbik.

⁶Yɛn a sangal e bekwɔ̀bɔ́rɔ̀k de nshi na re, na bavɔng de ba sé e vwel tanga tàra beraku.

⁷Be tosho sede madung e hey e tê serɔgɔ. Be gushung hɛn e ji shik.

⁸Betɔ́n de be byɛs ɛn, be ro ɛn yi e sevwel o.

⁹Ko a remo ma ga tɛ́ me yapyi e bayis mɛn, be lɛ̄lɛ me.

¹⁰Ma sé pyɛ byɛm-byɛm na yɛn, de be di me zɔng, ko be tulus a me betey e bayis.

¹¹Dagwi a ga tùt a me tsɛ̂p gbang, a ga zǒt me, be to nɔng me nerey wɛt.

¹²Regyɛng bemât sogo nehywɛ ba ga sogo, be ro me e jey, be yong begwong de bê wey na me.

¹³Ba ga dul gwong hom, ba gwɛsɛ a me tumbang, ko vit a mwat de a dul ɛn.

¹⁴Ba sogo e ra me sede bemât como ba yel e jwâ-pomo de wa gaba, ba vɛ̀sɛ gwarwang mɛn ba hwosom me.

¹⁵Ba tɛ̀ ma ye lot, ba ro nerey hom sede na gul, nerat hom nà tala hɛn sede bale ba shara hɛn.

¹⁶Ko a remo, yey hom ya ga bɔ̄gɔs, jeng nepep ya ga sɛ̀ me.

¹⁷Naturuk bekup hom be suyu, royo pep vit a pɔngɔ.

¹⁸Ba ga hama rehwô rebek hom na gap, ba ga firik me sede fwɔ̂ rugu.

¹⁹Ba ga bomo me e bwɔrɔk, ma ga tɛ́ me sede fongol.

²⁰Ma tosho, ko hwà hanat a me wɛt, ma gyeng, ko hwà ka de di me wɛt.

²¹Hwà ga tɛ́ o mwât repugu hom, na vwɔ̂ gap mō hwó shisa me.

²²Hwà jut me e gwi, e ra gul, hwà tɛ̀ me laga gwɛ, ko hwà zigim me e ji gwogul rwak.

²³Mwin ma tɔk hwô vɛ̌ tɛ̀ me ku, na me kyè mwas wɔ e lɔ de ba ga yong yaga bemasi.

²⁴Mwa ano mwat de a sé e nû wey ê nára vwɔ na a jama sɛlɛ wɛt a?

²⁵Ma tosho yaga mwat de a sɔ reyɔm wɛt a? Ma lashe yey yaga mwat pwɛng wɛt a?

²⁶Jeng de ma bare sɛ̂ nerat ko neves na yel, sede ma tɛ̀ bayis na me di negbey, ko lwil cɔ̀rɔk.

²⁷Yey hom ye tē puu, vit a me na yêy dyɛngɛ, jeng tâk reyɔm ya ga hwo e ra me.

²⁸Ma ga siri na serɔ, ma tumal e nuyêl bemat, me ra wôn sɛlɛ.

²⁹Gwa hom à kevu hey zɔng, sâ sangal hom a ngyuwa.

³⁰Rehwó hom ra tɛ́ ɛ sit, re fosok hɛ, ko bekup hom be rugus yaga fes.

³¹Yòm hom ya ga tɛ́ ɛ sesin, ju hom ya ga tɛ́ ɛ ye vê lushâ nemwishil.”