Read berom Iyɔp 31 Bible Online

Iyɔp 31 - berom bible

Iyɔp 31

¹“Ma ga gyeng bayis hom, e rɛ̌ de mê bɛrɛng hwong na me wok cwey mɛ ɛ?

²Nu mo nang hɛ a sɛ́ yi na Dagwî lagwi ɛ? E ně nedanelɔ de ma vɔk yi na Wo Reto Mwa ɛ?

³Reyɔm re hwo e ra mwat de a sé cik wɛt a? Gawey e ra mwat de e ra neves arɔng.

⁴Dagwi e bɛɛ begwong hom, e basa kahɛ bɔ́rɔ hom.

⁵Ka sede ma kyè e gwông nebɔs, me tele nu e hâ nekwɛlɛng.

⁶Ko tik be mara me e pyɛ mara de ya sé naka, yaga na Dagwi a tɔk, ma sé haalal.

⁷Ka sede ma ga ye reng yi e gwong, kɛ yey hom ya ga raa pyɛ de bayis hom ba simo, kɛ kerwik kehak ka ye pang e ra vɔ hom,

⁸ka a sé ano, tik pyɛ́ de ma ga tus, mwat hwak a re, ey, be luyu pyɛ̂ cap hom.

⁹Ka sede ma ga mara yîs hwâ rɔ̀n, na me wɔ̀ sǎ e waba e rwi duk mwât vwara hom;

¹⁰ka a sé ano, ko tik hwā hom a hwongo a rɔ̀n, tik behak be dyɛng na yɛ.

¹¹Yaga hemo ha sé pyɛ vyes sedesi, ey, a sé pyɛ de bemât shɔt bê yɛrɛ.

¹²Nejwang na sé kya de he re he pere wey na pyɛ́, nà yang wey na pyɛ́ hom mwa.

¹³Ka sede ma wet betong na wôn besam hom beras na behwong wɛt, jeng de yɛn a vey na sesin e ra me,

¹⁴ko sɛ́ de mê ra ɛ jeng de Dagwi a sogo e ra me ɛ? Jeng de ê rangsal me, e sɛ́ de mê hanat a yɛ ɛ?

¹⁵Yɛ de a yong me e jîm de hom, e yɛ gwining de a yong ot e jim wɛt a?

¹⁶Ka sede ma ga kyɛ́ me sɛlɛ̂ bepɛng, kɛ ma ga tɛ̀ kuma a tosho arɔng,

¹⁷ka sede ma ga re kecɛk-tuk nju hom zɔng, ko hyɛn hê bidɛ pyɛ de hê re,

¹⁸yaga yimo hɛ hwey ha ras na me sede na dâ hɛ, ko yi e tɔ̂ hɛ, ma bɛrɛng hɛ sede hwêy tɔ́ hom.

¹⁹Ka sede ma di hwak a ku yaga vit a berugû tɛ́, kɛ mwat pwɛng de vit a pyɛ banga,

²⁰ka sede ma nɔng ɛ pyɛ banga ye wuulu hom wɛt, ko ma vɔk tɛ̂ nerat mɛ wɛt.

²¹Ka sede ma jut vwɔ hom na me mɔt mɛ hyɛn, yaga ma di ma vɔk gwông núsu na sɛlɛ̂ bemakuk,

²²ka a sé ano, ko tɛ̀ kup tô vwɔ hom gwo lut ɛ yi e ra sanat hom, ko kwot vwɔ hom gwo kwɔrɔ hɛ arɔng.

²³Rezot yi na Dagwi ra yang sè pyɛ bengyip, yaga ma yang kyɛm me tumal e nuyêl gbɔng nedyɛt nerat mɛ wɛt.

²⁴Ka sede ma tɛ̀ yey e ra dyam shinang, kɛ ma ye, celes dyam shinang à gap hom,

²⁵ka sede ma ra yey pyɛng sizɔng yaga yele kɛ yaga pyɛ vwɔ de ma vɔk,

²⁶ka sede ma bɛrɛng gwi jeng de gwó nɔng negbey, na pwɛl de gwó kyè kwɛngɛl nedanerey,

²⁷ka sede yey hom ya tɔgɔs me e lɛrɛ, ko ma nára vwɔ vɔk na gwi,

²⁸ka a sé ano, hemo ha sé renɛn arɔng de bemât shɔt bê tabak hɛ, ha sé rôw Dagwi wo lagwi.

²⁹Ka sede ma vɔk yey pyɛng e gabâ mwat de e bɛɛ me ves, kɛ ma dak kaa jeng de pyɛ vyes ya sɛ̀ ɛ,

³⁰ko mwin, ma tik na nu hom he ra nɛn wɛt, ma jama nekên mwat hwak na môk gawey wɛt.

³¹Ka sede hwak e lɔ hom a ye, ma sirik na banama wɛt,

³²ko ma tik mwat de a ka ye jop e ngamo a pɔl e hyok wɛt, rwi lɔ hom gwa sé e wunta yaga mwat de a sé e ji kwɛngɛl.

³³Ka sede ma lɛrɛ banɛn hom e nuyêl bemat, ko ma lɛrɛ vɛ e yey hom,

³⁴ka sede ma wok bengyip regyɛng bemat, na neha neves ne cáng hom de ne tɛ̀ me tē lot, ko mê pere sǎ yuu vit a nusu e jey.

³⁵Ka ma yang vɔk mwat de e wok me! Me tɛ̀ vwɔ, ha hom ha sé mwin, ko tik na Wo Reto Mwa a hanat a me! Ko bwok-jɛk sekun hom gwa sé e gwa arɛt?

³⁶Mwin, ma yang jut ɛ e ra sanat hom, me hanas gwɛ e rato hom sede kpin negwɔm,

³⁷mê bara a Dagwi pyɛ́ mwa de ma ga ra, mê wɔ e nuyel mɛ sede hwêy lɔ gwɔ̀m.

³⁸Ka sede vwel hom ha tosho e ra me, ko bepǒl cap ba tosho arɔng,

³⁹ka sede ma ga re pyɛ̂ vwel o sana tala, kɛ ma ga ra pyɛ de ya vey na rekû dâ nap o,

⁴⁰ka a sé ano, ko tɛ̀ serɔgɔ sé ras e tô alkama, ko behwěy e tô pyɛ̂ yeneng arɔng.” Talâ neha Iyɔp à nemo.