Read berom Iyɔp 32 Bible Online

Iyɔp 32 - berom bible

Iyɔp 32

¹Bemat betat o ba to toyo a Iyɔp na hanat wɛt, yaga a jut to mɛ a sé cik.

²Ko Ɛlihu Barakɛl wo Bus yi e yerê Ram a tɛ̀ shom sizɔng na Iyɔp yaga a jut tó mɛ a sé cik, a dal Dagwi.

³A to ra shom na besâ Iyɔp betat o yaga yɛn a tɔk sɛ̀ pyɛ de bê hanat a Iyɔp wɛt mwa ano de ba kana ye, a ga buru.

⁴Ɛlihu a sè gyeng na a ha na Iyɔp yaga yɛ wɛ a hwey e ji mɛn.

⁵Jeng de a di bemat betat vane ba vɔk pyɛ de bê toyo a Iyɔp mɛ wɛt, a tɛ̀ shom.

⁶Ɛlihu Barakɛl wo Bus a hwo ha a ye, “Ma sé hwey e ji min, ko yin a ga vɛ̂ neshey, yaga ano ma wok bengyip, ma tùt ɛ nu, kɛ ma ha pyɛ de ya sɛ́ e yey hom wɛt.

⁷Ma yâng to hom, tik neshey ne ha, nepyak neshey arɔng ne basa netsitsɛng.

⁸Ko gabik Dagwi ha sé e ji mwat, nesong Wo Reto Mwa ne nɔngɔs hɛ netsitsɛng.

⁹A sé e neshey pyak de né nɔng netsitsɛng, kɛ shɔlɔ de ye nɔng tɔk wɛt.

¹⁰Yaga ano, wet in betong na me, tik na me ha bare hom arɔng.

¹¹Di, ma ga niri na me wok ha min e ngyen, ma wet betong na tɔrɔng min, jeng de yin a sè bare pyɛ de yin ê ha.

¹²Ma wet betong na yin naka, ko di, vit a hwak e ji min de a gang Iyɔp, vit a winde a toyo a yɛ na hanat e ji min.

¹³Yin kwon ye, yin a ga sɛ̀ netsitsɛng wɛt: Dagwi zɔng de ê gang ɛ́ ko e mwat wɛt.

¹⁴Iyɔp a ga ha pyɛ cak vey sɛ̀ me wɛt, ko mê hanat a yɛ neha sede nemin wɛt.

¹⁵Ba ga gang in, vit a hin na nû hanat,

¹⁶ko mê sǎ yuu jeng de yin a ye pyɛ cak wɛt a? Yin a sangal yuu yaga vit a hin na pyɛ de yin ê hanat a re?

¹⁷Me ma vɔk hanat, mê ha pyɛ de ya sé e bare hom.

¹⁸Ma sila na neha, de gabik hom he shonong me na nɛ̀.

¹⁹Yey hom ya sé sede siring de vit a gwông sɔ̂ gul, sede kwō de ba bang viisis de ha sé lɛs e ra takla.

²⁰Gbing-gbing me ha na a yang me rɔ̀s, me wunta nu na me hanat.

²¹Mê dura simô to wɔ̀ sè mwat hwak, kɛ me rwak nu e ra mwat wɛt.

²²Mê kyɛm me rwak nu e ra mwat wɛt oow, yaga Dagwi de a yong me, ê pere wey na me.”