Read berom Iyɔp 33 Bible Online

Iyɔp 33 - berom bible

Iyɔp 33

¹“Ko à remo, à Iyɔp, wet betong na ha hom, tɛ̀ nehywɛ mō e ra kayɛ pyɛ de mê ha.

²Di, ma ga wunta nu hom na me ha pyɛ de ya sé e yey hom.

³Ha de me kyè wɔ ha, e hɛ a tsak ha, ko pyɛ de me ha e yɛ à wɔ̀nɔ tsak ha mo.

⁴Gabik Dagwi ha yong me, Wo Reto Mwa a pɛl a me nesong.

⁵Ka sede hwà tɔk, ko hwo hanat a me, yong neha de hwô tó mɛ̀ cuna e nuyel hom.

⁶Hwo tanga me wot a sé vining o e nuyel Dagwi, mwa wot beba arɔng bà yong ot yi e secwem.

⁷Yaga ano, hwo ye lot na hwo wok bengyip wɛt, pyɛ de mê há a hwo yê dal gap mō wɛt.

⁸Mwin hwà ga ha ma ga wok, ma ga wok ha mō, de hwà ye.

⁹‘Ma sé haalal, vit a me na renɛn, ma sé jɛkjɛk vit à pyɛ cak vyes e ji hom.

¹⁰Dagwi a ga ha ha ves e ra me, a ga jut me mwât repugu mɛ,

¹¹a tɛ̀ bol hom e rɔgɔs e ra kpɔk cɔgɔt, e bɛrɛng mwa begwong hom.’

¹²Ko e ra hemo, hwà vɔk tsak o wɛt à Iyɔp mê nɔng o hanat: Di Dagwi a dal mwat na nerey.

¹³Yaga sɛ́ de hwó gwɔrɔng e ra Dagwi, hwó té, ‘Ê sang hanat a me pyɛ cak wɛt’ arɛt?

¹⁴Dagwi e hanat zang hining, ey zang ba mwa, mwa ano de mwat e sey hɛ wɛt.

¹⁵E ha e ji negwi kɛ e negwi-ywey, jeng de nevwa na ga vo bemat, be tē wùflɛk e ra gat mɛn.

¹⁶E wunta betong bemat, a shisa hɛn na neha hwɔtɔ̂ betong.

¹⁷Yaga na a bin doyo mwat yi e tomong mɛ, ko a ro a mwat na dâk kaa.

¹⁸E sey neken mɛ yi e revɔng, e dul neken mɛ yi e reku.

¹⁹Be tabak mwat na serɔ pep e dyɛngɛ, e di yɔ́m na nejwɛɛnɛ̂n nedem.

²⁰Pyɛ̂ re ya sé a yɛ pyɛ byɛm-byɛm, pyɛ̂ re ryat ye kyɛ́ ɛ a yɛ nu.

²¹A ga sɔ́ ɛ, a ga hworok sede sɔng, a ga tɛ́ ɛ ganjang.

²²Mwin a sé bagat na revɔng, neken mɛ na sé e vwɔ̂ reku.

²³Ka ba yâng sɛ̀ tom-lagwi gwining zɔng de ê sè mwât dóyo ha, ko ê há a mwat pyɛ de ya sé naka yaga yɛ.

²⁴Tom-lagwi de ê dura a yɛ nerat, na a ye, ‘Séy ɛ, a kwon gyirik wɔ e revɔng wɛt, ma ga sɛ̀ pyɛ viri hɛ.

²⁵Tik na rebek mɛ re tɛ̀ tyang, ê tɛ́ ɛ pwásak.’

²⁶Jeng á yane de mwat e ra won na Dagwi, ko e wok ɛ. E vey e nuyel mɛ na yey pyɛng sizɔng. Dagwi e to tɛ̀ ɛ cik.

²⁷E ra lwɛlɛ e nuyel bemat e ye, ‘Ma ga ra renɛn, ma ga ye rɛng yi e gwông tsak o, ko a tabak me wɛt.

²⁸Dagwi a ga sey neken hom yi e gyirik wɔ e revɔng, ko mê sangal na me re netâ negbey.’

²⁹Mwin, e Dagwi de e ra pyɛ́ yemo mwa, zang pyak vɔk na mwat,

³⁰na a toyo na yɛ yi e revɔng, yaga na a re netâ negbey.

³¹À Iyɔp tɛ̀ nehywɛ mō vey na me, wet betong mō, bang nu yuu, mê ha.

³²Ka hwà vɔk pyɛ de hwô hanat, ko hwo hanat a me, ma sé simo na me tɛ̀ hwo sè cik.

³³Ko ka ano wɛt, hwo sǎ yuu, hwo wet betong na me, ‘ko mê basa a hwo netsitsɛng.’ ”