Read berom Iyɔp 34 Bible Online

Iyɔp 34 - berom bible

Iyɔp 34

¹Ɛlihu a hanat a ye,

²“Wok in ha hom, à yin bemât netsitsɛng, yin wet betong na me, à yin bemât tɔk.

³Fwong gwo mara ha, sede remo de nu he mara netâ pyɛ̂ re.

⁴Tik wot kasa pyɛ de ya sé tyɛng; tik wot yong ɛ̀ pyɛ de ya té e tē mot.

⁵Iyɔp a ga ye, a sé cik, ko Dagwi a ga sey ɛ̀ pyɛ de ya sé myɛ.

⁶A ye mwa ano de vit a hɛ na nɛn, ko ba bara hɛ e ji bemât bɔs; rām mɛ hê tɛ̀ tyang wɛt, mwa ano de vit a hɛ na nɛn.

⁷Wa a sé sede Iyɔp ɛ! E sɔ byɛ̂s bemat sede nshi,

⁸e sangal na bemât ragas neves, e kyè tanga bemât banɛn.

⁹A ye, ‘Mwat ê sey pyɔlɔ cak wɛt, na a vɔk yey pyɛng na Dagwi.’

¹⁰Yaga ano, à yin bekaan-tɔk, wet in betong na me, Dagwi e ra pyɛ vyes ko tyɔng wɛt, yɛ de a sé Wo Reto Mwa e sang buru wɛt.

¹¹E tala mwat tyɛng na pyɛ de a ra, e tɛ̀ negwɔn mɛ ne raa hɛ.

¹²A sé tsak o, Dagwi ê ra pyɛ vyes wɛt, yɛ Wo Reto Mwa ê ye wek e gâs badu e tē wɛt.

¹³Wa, a tɛ̀ ɛ wo nuyêl vwel ɛ? Ko wa de a nɔng ɛ jey mwa e vwɔ mɛ ɛ?

¹⁴Ka sede ê jut gabik vɔk na yɛ, a toyo na nesong mɛ,

¹⁵ka mwa vê neken bê yang kushu, bê yâng to ɛn fongol.

¹⁶Wok ngan, ka sede hwà sé kaan-tɔk, wet betong na pyɛ de mê ha.

¹⁷Mwat de e kyɛ́ ɛ gâs badu e tē ê re negwɔm a? Hwô tɛ̀ sekûn Dagwi de a sé cik, de a vɔk gap a?

¹⁸E yɛ de e yâng gbɔng gwɔ̀m, ‘Hwà sé yapyi!’ Ko bemât nuyel, ‘Yin a sé beves.’

¹⁹E dura simô to e ra nèy lɔ gwɔ̀m kɛ e dura nerat vɔk na bedaberey e ra bepɛng wɛt, yaga yɛn mwa ba sé fwôm vɔ mɛ.

²⁰Be pere ku ziri, nakabadem reku re vos bemat hák. Ba ga pat bemat e negwɔm, ko a sé yi na mwasi wɛt.

²¹Bayîs Dagwi be bɛrɛng negwɔn mwasi, ko be bɛrɛng kwɛngɛl mɛ arɔng.

²²Vit a lwil kɛ lwîl mwangalang de bemât ragas neves bê lɛrɛ hɛn ɛ.

²³A tɛ̀ jeng de mwat hwak ê tumal e nuyel mɛ yaga shɔt wɛt.

²⁴E shara vemo de ba vɔk gap vit a ngyɛgɛt, ko e tɛ̀ behak e to mɛn.

²⁵Sede remo de a tɔk tomong mɛn, e pere ye rík na yɛn naturuk ko e wey na yɛn.

²⁶E dak bemat beves, e nuyel bemat,

²⁷yaga ba ga ye rɛng yi e raa mɛ, ka ba gyeng gwong mɛ ko tyɔng wɛt.

²⁸Ano yɛn a tɛ̀ toshô bemat bepɛng he wɔ́ na yɛ, ko a wok sesîn vemo de ba tak a yɛn.

²⁹Ka sede Dagwi a wey ɛ yuu, wa ê gang ɛ na shɔt ɛ? Ka sede a lɛrɛ bayis mɛ, wa ê kyɛm a di ɛ ɛ? Kɛ a sé yerê bemat jey kɛ mwat ayi ɛ?

³⁰Yaga na mwat de e sap Dagwi wɛt a re negwɔm wɛt, ê yang rense bemat na segun.

³¹Mwat hwak a ga kyɛm a yâng Dagwi, Ba dɔnɔ me, mê to ra nɛn wɛt,

³²basa a me pyɛ de ma tɔk wɛt, ka sede ma ga ra a hwo nɛn, mê to ra wɛt a?

³³Ko sɛ̌ hwô ye, a sé gbing-gbing na Dagwi a ra shɔt, a remo de hwà kyɛ́ o pyɛ de a sé ra a re? E hwo wɛ, de hwô kasa ko e me wɛt. Yaga ano, dura a me pyɛ de hwà tɔk.

³⁴Bemât tɔk kɛ mwât netsitsɛng, de ba wok me, bê ye,

³⁵‘Hâ Iyɔp ha vɔk to wɛt, neha mɛ vit a pyɛ jut e nɛ.’

³⁶Tik na be mara Iyɔp vɔk e tala mo, yaga e toyo na hanat sede bemat beves.

³⁷E rà nɛn de a vɔk e to sogso nehywɛ, e nuyel mot mwa e shɛgɛsh, e ha neha mɛ ne repugu vɔk na Dagwi.”