Read berom Iyɔp 35 Bible Online

Iyɔp 35 - berom bible

Iyɔp 35

¹Ɛlihu a hanat a ye,

²“À Iyɔp, e di mō hwà ra tyɛng arɛt? Hwà ye, hwà sé cik e bayis Dagwi.

³Hwà rangal wɔgɔ, ‘E pyɔlɔ̂ sɛ́ de me sɛ̀ ɛ? Sɛ́ ye de me gwɛ̌ ɛ, sede ma sé vit a nɛn ɛ?’

⁴Mê hanat a hwo, hwo tanga besa mō.

⁵Ye ganga à lagwi na hwo di, bɛrɛng bale de ba sé e hwomo, mwin ba dal o e rak o.

⁶Ka sede hwà ra nɛn, hwà ga mɔt ɛ? Ka banɛn mō ba kat, sɛ́ de hwà ra a yɛ ɛ?

⁷Sede hwà sé cik, e sɛ́ de hwà nɔng ɛ, kɛ a sey sɛ́ yi e vwɔ mō ɛ?

⁸Neves mō nê ra ano na mwat sede hwo, ko necik mō nê sɛlɛ mwasi zɔng.

⁹Yaga mɔt de ha kat bemat be tosho, yɛn e jama sɛlɛ, yaga bemât gap de ba tak a yɛn.

¹⁰Ko vit a hwak de a ye, ‘Dagwi wo yong me a sé e gwa ɛ? Yɛ de e sɛlɛ bemat be vɔk yey pyɛng.

¹¹Yɛ de e basa a wot tɔk, de ha dal hê ngyāma, ko a tɛ̀ ot wot a vɔk netsitsɛng wot dal nenon larwak.’

¹²E hwomo ba yila Dagwi ko a hanat a yɛn wɛt, yaga dâk kaà bemat beves.

¹³Mwin, Dagwi ê wok yila zɔng-reng, kɛ Wo Reto Mwa ê tɛ̀ betong na hɛ wɛt.

¹⁴Tàga de hwà ye, hwó tɔk di ɛ wɛt, tê sekun o ha sé e nuyel mɛ, sɛ̌ hwo gyeng ɛ zɔng!

¹⁵Remo de Dagwi a yɛrɛ shɔt e ji shom mɛ wɛt, a dura sede pyɛ mɛ ya sé na renɛn wɛt.

¹⁶À Iyɔp! Hwó wuma nu e hâ zɔng-reng, hwà tula neha de vit a nɛ na to.”