Read berom Iyɔp 36 Bible Online

Iyɔp 36 - berom bible

Iyɔp 36

¹Ko Ɛlihu a re nuyel na ha, a ye,

²“Niri a me tyɔng, ko mê dura a hwo, yaga ma vɔk pyɛ de mê ha a hwo gbak e tô Dagwi.

³Mê yi na tɔk hom yikyik, na me misang mɛ tsak o Wo Yong Me.

⁴E tsak o de ma sé ha ko e bɔs wɛt, mwat de a sé tsɛng-tsɛng e tɔk, a sé tanga hwo.

⁵Di, Dagwi a sé Wo Reto Mwa, ko e byɛs mwat hwak wɛt. A vɔk gap na reto.

⁶Dagwi e wey na bemat beves, ko e sɛlɛ vemo de be tak a yɛn, na be vɔk pyɛ de ya sé myɛn.

⁷E tɛ̀ bayis mɛ e ra vê cik kayɛ jeng, e tɛ̀ ɛn tanga begbɔng begwɔ̀m e ra gwofwa negwɔm, e tik ɛn be sangal ɛ gbak-gbak, ko be nɔng ɛn nerey.

⁸Ka sede ba rɔgɔs hɛn na ngyang, kɛ ba vos ɛn na rik rezot ayi,

⁹a rɔda dura a kawɛ mɛn fwom mɛ, na neburu mɛ de e ragas na negaren.

¹⁰E tɛ̀ ɛn be wet betong na basa, a nɔng ɛn nu be doyo yi e pyɛ́ vyes mɛn.

¹¹Ka sede yɛn ê gyeng ha hom, na be re a me fongol, bê sila nepɔlɔ mɛn e ji nerat, bê ra neshey mɛn e ji sangâl neta.

¹²Ko ka sede be gyeng ha mó wɛt, bê wey na yɛn na wal, ko bê ku yaga vit a hɛn na tɔk.

¹³Bemat de vit a hɛn na bengyip Dagwi e ji yey mɛn, yɛn e vɔk shom, yɛn e tosho yaga sɛlɛ jeng de a cat ɛn na ngyang wɛt.

¹⁴Bê kushu be rɔngɔl bebot, bê yɛnɛ nepɔlɔ mɛn e ji nebyɛm-byɛm.

¹⁵E ra fwom na reyɔm mɛn na a sey ɛn mɛ. E ra fwom na rezot na a tɛ̀ ɛn be wok.

¹⁶A pat o yi e ji reyɔm, a vey na hwo e kwɔn de hwô sè washak, ko hwô re pyɛ́ ryat.

¹⁷Ko di, ba ga yɛrɛ a hwo shɔt sede ye mwat vwes, shɔt gâs badu e tē ya ga vo o.

¹⁸Tē naka hwo tik pyɛ bâng nu ye kwɛlɛng hwo wɛt, hwo tik dyām pyak ye tɛ̀ hwo ye rɛng wɛt.

¹⁹Tósho na jamâ sɛlɛ mō kɛ gap de hwà vɔk, bê sey o yi e reyɔm wɛt.

²⁰Hwo mok naturuk ne vey wɛt, e jeng a yane de be wey na bemat e nedem sangal mɛn.

²¹Tē naka, hwo tɛ̀ nehywɛ mō e ra pyɛ́ vyes wɛt, yaga hwà kasa yɛ e ra sɔ̂ reyɔm.

²²Mwin, Dagwi a sé wo nerey yi na reto de a vɔk, wa de a sé mwât basa sede yɛ ɛ?

²³Wa ê dura a Dagwi pyɛ de e ra arɛt? Wa ê kyɛm a yang ɛ a ga buru ɛ?

²⁴Bare na hwo nɔ̂ng fwom mɛ nerey, gwomo de bemasi be somo e ji lwɛ̄lɛ.

²⁵Mwa bemasi ba ga di tomong mɛ, bemat ba ga kun vɛ yi e gatat.

²⁶Di, Dagwi a sé wo reto mwa, ko wot a tɔk ɛ wɛt: Neshey mɛ na vɔk yɛnɛ wɛt, bê tɔk ngyɛgɛt ne wɛt.

²⁷Dagwi e tɛ̀ nshi ne tɛ́ ɛn garōs, ko a doyo ne vɔk e rwak,

²⁸rwak de wo rop yi e lagwi wo hwo a bemasi shɛrɛk.

²⁹Wa e tɔk gwong de a shara bale e lagwi, na gbara de wo taksal e ji vɛ ɛ?

³⁰Di, a gwɔrɔ to mɛ na negbey, ko a bang tîs gworep na lwil.

³¹Ko na pyɛ́ yemo de e ra a bemat mɛ shɔt, e nɔngɔs hɛn pyɛ́ de ya vey a yɛn.

³²A vɔk e vwɔ mɛ nedɛbɛt gbara ko e nɔ̂ng nɛ nu ne tá e kwɔn de a rene.

³³Gbara wo ha e ra yɛ, berɔndɔng arɔng be wok vêy gwogul rwak.”