Read berom Iyɔp 37 Bible Online

Iyɔp 37 - berom bible

Iyɔp 37

¹“Yey hom ye vow e ra pyɛ yemo, yey hom ya to sé nyang wɛt.

²Tɛ̀ in betong na lumtâ fwɔ̂ Dagwi, wok in taksal de he nunus e nu mɛ.

³E tomo hɛ he kyè e yɛnɛ̂ lagwi mwa, ko nedɛbɛt gbara mɛ ne wul mwa bakwông jey.

⁴E bamâ nedɛbɛt gbara, be wokos fwɔ mɛ, gwo lulum e ji nedyɛt nerat mɛ. Mwa ano de be wok fwɔ mɛ, ko e tik nà taksal gbara wɛt.

⁵Lulûm Dagwi ha sé pyɛ langat, e rá gbɔng tomong de ba dal gâp tɔk mot.

⁶E nɔ̂ng fwala nu gwo hwo e ra jey, ko rwak de wo cɔ̄rɔng wo pere tɛ́ ɛ rwâk gap.

⁷E tumal na kawɛ mwat e ra fwom, na a dura a bemat mwa tomong mɛ.

⁸Ngyāma ye toyo wɔ e kwɔ̂n pɔngɔ̂ yɛ, kayɛ e tàra mɛn.

⁹Sombabos wo sogo yi e kwɔ̂n wɛ, ko neyɔɔtɔt yi na gul de gwo shara hɛ.

¹⁰Nesong Dagwi ne tɛ̀ fwala, ne tɛ̀ nshi nerey o ne pere rɔgɔs hɛn.

¹¹E sila bale de ba siri na nshi, bale be shara nedɛbɛt mɛ.

¹²Bale mo be gwɔsɔ e gwong de e kyè na vɛ, be sila pyɛ de a nɔng nu e jey mwa.

¹³Dagwi e tɛ̀ pyɛ́ mo ye tɛ́ ɛ ano, kɛ yaga tabak kɛ yaga yé rùk a vwel na a dura tɛ̂ yey mɛ.

¹⁴Wok ngan, à Iyɔp, yɛklɛ hwo na hwo bare na tomông bês Dagwi.

¹⁵Hwà tɔk gwong de Dagwi e nɔngɔ̂s yɛ nu bɛ̀, ko e tɛ̀ nedɛbɛt yi e bale ne ta.

¹⁶Hwà tɔk gwong de bale ba sé e tumal ting-ting e lagwi a? Tomông bes ve sekwɛl Dagwi de a sila na tɔk.

¹⁷Hwà tɔk pyɛ de hwó tabas long jeng de jey ya sè ting yaga gûl batin a?

¹⁸Hwô tɔk ra pyɛ de a ra a lagwi de a tɛ̀ wɛ tiing, madɔbi na hwo tɛ̀ wo nɛp sede gyilâs a?

¹⁹Hwo basa a wot pyɛ de wot ê ha a yɛ, wot ê tɔk wɔ na sekun wɛt yaga netɔn mot.

²⁰Be tɔk ha a Dagwi wɔgɔ, me simo na me ha a? E tɔk wɔlɔk hɛn beken.

²¹A remo bemat be tɔk bɛɛ negbey wɛt, jeng de gwi gwa sé ta vɛ̌t, e bama de gul gwa ga pɛl gwa ga shara bale vit.

²²Yi e rwa bato negbey nehak sede ne dyam shinang, pyɛ langat sizɔng Dagwi e ji gbɔng nerey mɛ a sé pyɛ sap.

²³Wo Reto Mwa a dal gap na wot a tɔk ɛ, a sé wo reto mwa, wo gâs badu e tē, na râ pyɛ́ de ya sé cik e tak a mwat yɔ́m wɛt.

²⁴Yaga ano bemat be wok bengyip mɛ; pyɛ mɛ ya sé wɛt na vemo de be jut bato mɛn, ba sé vê netsitsɛng.”