Read berom Iyɔp 38 Bible Online

Iyɔp 38 - berom bible

Iyɔp 38

¹E bama mo, Dagwi Darwey a hanat a Iyɔp yi e ji sombabos, a ye:

²“E wa à wane de e lashe badu na neha de vit a ne na rato ɛ?

³Rɔgɔs gyindi gak à rwas. Mê ra a hwo rangal, ko hwo, hwô hanat a me.

⁴Hwà sè e gwa jeng de ma bomo retîs jey arɛt? Ha a me, sede hwà tɔk.

⁵Wà a masa yɛ ɛ? Hwà tɔk wɛt a? E wa arɔng de à wɔrɔ neyɛnɛ̂ yɛ ɛ?

⁶E ra sé de ba bomo retis yɛ ɛ? Kɛ e wa de a tɛ̀sɛ beta kwɔ̂ng jey o arɛt?

⁷Jeng de netangacɛ̂n gasi na ga ra lwɛlɛ, bemat-lagwi mwa na mokla yaga yey pyɛng.

⁸Wà de a tɛ̀ a gworep yɛnɛ jeng de gwa ye gbuk yi e neciwil ɛ?

⁹Mà bang gworep na bale sede gworugu, mà gunung gwɛ na lwil mwangalang.

¹⁰Ma tɛ̀ a nɛ yɛnɛ̂ kwɔn de nê tɔk kwey wɛt, ma tɛ̀ a nɛ dyâm báng na ri duk.

¹¹Ma ye, ‘Yɛnɛ̂ kwɔn de hwô tumal à hane, hwô kwey wɛt. E hwomo de bagung nshi mō vê dâk kaa, bê tumal.’

¹²Iyɔp, hwà ga sang nɔng nu na gasi he ye gbey, kɛ hwô dura a rwa hwol gasi na he tɔk kwɔ̂n hɛ a?

¹³Naturuk na sé rugu de gwo bang neyɛnɛ jey, hwô tɔk pat gworugu mó na bemat beves be tele a?

¹⁴E rwa nagasi vwel he sege hɛ sede secwem e nɛ̂n to-kwɔng, sede rugu de ba sege a gwɛ būm.

¹⁵Gwi gwo nusu gwo ro a bemat beves negbey, vɔ mɛn de be jut vɛ vɔk e rak o gwi gwo tɛ̀ vɛ gbɛrɛk.

¹⁶Hwà ga sang yel e lwêl gworep a? Hwà ga mara kwɛngɛl e ji neciwîl bèlûk gworep a?

¹⁷Ba ga sang dura a hwo ri kwɔ̂n bevuvwel, kɛ hwà ga sang di rwî lwil mwangalang arɛt?

¹⁸Hwà tɔk yɛnɛ̂ jey arɛt? Hanat a me sede hwà tɔk mwa pyɛ́ yemo.

¹⁹Gwong a gwɛ wɔ e kwɔn de negbey na sé ɛ? Ko kwɔ̂n lwil ha sé e gwa ɛ?

²⁰Hwô tɔk jut ɛn wɔ e nedem mɛn, na hwo tɔk begwong wɔ e lɔ mɛn a?

²¹Mwin, hwà tɔk yaga ba ga kana tɔ o e jeng o a re, ko neshey mo na sé pyak!

²²Hwà ga sang yel e begban wut, kɛ hwà ga sang di begban fwala arɛt?

²³Ma tik yɛ yaga jeng reyɔm, na jeng jugu tanga como.

²⁴E gwɛ gwong de be gas negbey, kɛ kwɔn de gûl rak be shara gwɛ e ra jey arɛt?

²⁵Wa a cing bakang de rwak wa sɛ̀ begwong kweres, tanga gwông taksal gbara arɔng ɛ?

²⁶Wa a tɛ̀ rwak e vwel de vit a bemat, tanga e hêy gbingiring de pyɛ ya sé ɛ wɛt ɛ?

²⁷Wa a nɔ̂ng rwak vwel hwogot na wo tɛ̀ sɔng gwo tulu ɛ?

²⁸Rwak wa vɔk da kɛ e wa de a tɛ̀ mwɛngɛ gwo hwo ɛ?

²⁹Yi e jîm wa de fwala gwa yi ɛ? Ko e wa de a tɔ wut ɛ?

³⁰Nshi na rɔgɔs hɛn gbarak sede beta, ko gworep gwa tɛ́ ɛ kashalang.

³¹Hwô kyɛm hwo rɔgɔs lɔ-gyɛng-netangacɛn, kɛ hwo viri ngyâng-mwât-jamâ nɛ a?

³²Hwô kyɛm hwo vey na netangacɛn e jeng nɛ, kɛ hwo viri netangacɛn de na sé sede rôn hôw cap berɔndɔng a?

³³Hwà tɔk badu lagwi a? Hwô tɔk, e sɛ́ de ya wuna vɛ na negwɔm jey arɛt?

³⁴Hwô tɔk tomo na hwo nɔ̂ng bale nu na be rop rwak de wô bang o arɛt?

³⁵Hwô tɔk tomo nedɛbɛt ne kyè, na ne toyo ne yang o ‘Wot à vemo a?’

³⁶E wa de e nɔ̂ng bale netsitsɛng kɛ a nɔ̂ng wut tɔk ɛ?

³⁷Wa e tɔk bara bale yi na netsitsɛng mɛ, kɛ e wa de e shusha nshî betsûng lagwi ɛ?

³⁸Jeng de fongol gwo biring gwo wɔ̀ tula hɛ e dem hining gying.

³⁹Hwô tɔk ra jamâ pyɛ́ yaga gukum, kɛ hwo nɔ̂ng nèy gukum pyɛ́ ye vey a nɛ,

⁴⁰jeng de na sé wɛrɛn e tara mɛn a?

⁴¹E wa e nɔngɔ̂s gwohwak pyɛ́, jeng de nèy gwɛ ne tosho na Dagwi, nà sé rini e de jamâ pyɛ̂ re ɛ?”