Read berom Iyɔp 39 Bible Online

Iyɔp 39 - berom bible

Iyɔp 39

¹“Hwà tɔk jeng de vow wó tɔs nèy a? Hwà ga sang tɛ̀ nehywɛ na hwo tɔk de ròs e tɔ a?

²Hwà tɔk pɛl ala de be ra ɛ? Hwà tɔk tyɛng jeng tɔ̂ yɛ̄ arɛt?

³Hwà tɔk jeng de ye sè e ra bakwot yɛ — na yɛ de tɔ, na jeng de reyɔ̂m tɔ re tala hɛ a?

⁴Nèy yɛ̄ ne tɛ̀ gap, ne ras e ji hey, ne kaba gwông nɛ vit à to toyo.

⁵Wa a ga hala madung washak arɛt? Wa a ga viri nerwěy wɛ de wó tele tyɔng wɛt,

⁶ma ga tɛ̀ hêy gbingiring he sè lɔ̂ wɛ, ko vwêl nevwashe, dem sangâl wɛ ɛ?

⁷Wo shɛgɛsh rewɔng de be ra e ji bapomo barey, pyɛ wɛ ya sé na sekûn mwat de e ro wɛ wɛt.

⁸Kwɔ̂n gyenges yas wɛ hɛ à beraku, e hwomo de wo jama kayɛ pyɛ de ya sé lyǎ.

⁹Cungun wo simo na wo ra a hwo fwom, kɛ wo ra pɔlɔ hining e kwara mō arɛt?

¹⁰Hwô tɔk rɔgɔs wɛ na rwik e pwol zwal, kɛ wò wɔ̀ how cap ɛ?

¹¹Hwô tɛ̀ gap e ra wɛ yaga wa vɔk gap yɔkyɔk, na hwo tik a wɛ fwom mō na wo ra a?

¹²Hwà sey tsak o wô toyo, na wo vey a hwo na pyɛ̂ yeneng e gazu mō arɛt?

¹³Ngyuwa wó rwagat bafabak wɛ na nejík, ko bafabak o ba vey na be mara vɛ na babok kǔl wɛt.

¹⁴Ngyuwa wo hala bagyi wɛ e vwel zɔng, na vwel he nɔ̂ng vɛ nemɔɔ.

¹⁵Wa ye bam wɔgɔ, mwat e tɔk bɔrɔ vɛ, be mɔbɔs hɛn, kɛ ngyama cak ye bɔrɔs vɛ.

¹⁶Wó tak a nèy wɛ sede e nemɛ wɛt, reyɔm de wa ga sɔ ha sé yapyi zɔng, ko mwa ano pyɛ wɛ ya sé wɛt,

¹⁷yaga Dagwi a nɔ̂ng wɛ netsitsɛng wɛt, a nɔ̂ng wɛ nu mo mɛ hê tɔ́k arɔng wɛt.

¹⁸Ko jeng de wa sogo tele, wo shɛgɛsh dwa na mwat de e ra suga na wɛ.

¹⁹E hwo de hwà nɔ̂ng dwa gap de wa vɔk arɛt? E hwo de hwà tɛ̀ a fwɔ̂ wɛ gatis a?

²⁰E hwo de hwà tɛ̀ wɛ wo gyilsit sede yɔrɔ arɛt? Pât nesong wôl wɛ na sé gbɔng pyɛ bengyip.

²¹Wo kas benɛk na bekwǒk bol, na wo dura gâp wɛ, wo jorong wɔ e de tô como.

²²Bengyip ba sé pyɛ shɛgɛsh na wɛ, wó vo yey wɛt, mwa na tára wal ko wo toyo re bama wɛt.

²³Kwet gwo kwey hyùu e hagât wɛ, bāra wo tē bwerep tanga bá e nuyêl wɛ.

²⁴Wó vow rebek, ko wo re fongol, ras de wa wok lumtâ durum, wo tɔk tumal gbir wɛt.

²⁵Jeng de ba pɛl durum wo ye, Ey, yàa! Wo wok nesang como yi e gatat, na takla fwɔ̂ besuga na rewɔng mɛn.

²⁶A sé yi na netsitsɛng mō de kwɛng, wo sogo, kɛ wo wunta bafabak wɛ, wo ta nu wɔ e batin arɛt?

²⁷A sé na nɔ̂ng nu mō de kim wo sogo, kɛ wo tɛ̀ rɛngɛ̂ wɛ e rak o arɛt?

²⁸Kwɔ̂n sangâl wɛ ha sé e ra gwofwa, e hwomo, wo lɔk ɛ lɔ̂ wɛ, kwɔ̂n dal wɛ à zomzôm gwofwa.

²⁹Yi e hwomo wo kun pyɛ̂ re wɛ, bayis wɛ be di yɛ yi e gatat.

³⁰E kwɔn de ba ra ɛ como, ba sɛ̀ wɛ e hwomo, ko nèy wɛ ne sɔ nemi.”