Read berom Iyɔp 4 Bible Online

Iyɔp 4 - berom bible

Iyɔp 4

¹Elifas wo Teman a hanat a ye,

²“À Iyɔp, ka mwat a tɛ̀ nu e ha mo, ê sè buru bɛ? Ko wa ê kyɛm a man nu ɛ!

³Mwin, hwà ga basa a bemat pyak, ko hwà ga gwɛ a vemo gap de ba vɔk vwɔ wɛt.

⁴Neha mo na ga ye cik à vemo de be tíi bol, hwà ga tɛ̀ bakwot káskas.

⁵Ko di, ha ga sɛ̀ o, hwà rɔgɔs yey wɛt, ha ga ra o ko hwó bɔ́rɔng.

⁶Me ye, sâp Dagwi he de he gyeng o, ko nerât begwong mō ne à sɛ̂t yey.

⁷Bare, e wɛ̌ mwat de a sé haalal de a ga sang lashe hɛ ɛ? Kɛ hwà ga wok ba ga wey na bemat berat bɛ?

⁸Pyɛ de ma di, e vemo de be tus pyɛ́ vyes kɛ be yong reyɔm, yɛn be yɛt bwâl pyɛ́ mo.

⁹Dagwi e pɛl nesong mɛ ko yɛn e pere wey, shom mɛ ye yi puu ko yɛn be tɛ́ ɛn yapyi.

¹⁰Lulûm gukum na toshô hwā mɛ tanga yìn nèy mɛn — mwa vit à gap.

¹¹Gukum wa sé tɛ́ ɛ vit à gap, nèy wɛ ne shara hɛn.

¹²Ba ga vey shigi a me ha, ko ma vo ɛ̀ pyɛ tyɔng e ha mo.

¹³E ji negwi naturuk, jeng de nevwa na ga vo bemat mwa,

¹⁴ma wok bengyip, ma vow, bekup hom mwa ba digis yɛk-yɛk.

¹⁵Ko gul gwa pere kwey a me hyuulul, setôt rebek hom sa sogo.

¹⁶Ma di gabik hak sede mwat. Ha tumal, ko ma tɔk hɛ wɛt. Kwɔn há sé yuu ko ma wok fwɔ gwa ye:

¹⁷Mwasi e kyɛm a sè cik e bayis Dagwi a? E kyɛm a sè haalal e nuyêl mwat de a yong ɛ arɛt?

¹⁸E tɔk tɛ̀ gap e ra bemât fwom mɛ wɛt, e gyong betom-lagwi sede a sɛ̀ ɛn na buru,

¹⁹tàga vemo de ba yong ɛn na fongol, be bunut hɛn sede shɔ̄t.

²⁰Be hwongo hɛn, yi e nagasi wɔ̀ e nawiri, be tɔk to wuna hɛn wɛt, yɛn e pere wey gbak-gbak.

²¹Ka ba jut pyɛ̂ mwa de a vɔk, e ku vit a netsitsɛng.”