Read berom Iyɔp 41 Bible Online

Iyɔp 41 - berom bible

Iyɔp 41

¹“Hwô tɔk vo gwalwêl nshi na guk, kɛ hwo rɔgɔs nû gwɛ na shwey arɛt?

²Hwô tɔk boro bawôl gwɛ na hwo gyira ɛ shwey, kɛ hwo boro kup rwanang gwɛ na guk arɛt?

³Gwô ra won na hwo tik gwo kyè, kɛ gwô ru a hwo rwâk nu a?

⁴Gwô wuna sira na hwo, kɛ gwô vo nu gwô tɛ́ ɛ mwât fwom mō gbak-gbak arɛt?

⁵Hwô ra jɔgɔ na gwɛ sede hwó ra na kenon, kɛ hwô gwɔsɔ na gwɛ e rwik na behwông fwom mō be bɛrɛng ɛ?

⁶Bemât vôs betɔk bê ra nenan byɛ mo, kɛ bejik bê kangat gwɛ be gas e tē mɛn arɛt?

⁷Hwó tɔk tòro rehwô gwɛ na betom, kɛ ratô gwɛ na bebarâ jɔng arɛt?

⁸Rá vwɔ mo e ra gwɛ, bàre na sekyisa de hwô ra — hwô sang to ra wɛt!

⁹Vit a sɛt yey e ra sɛ̂ gwɛ, ka hwà di gwɛ, hwô bidɛ yey ting.

¹⁰Vit a hwak de a vɔk yey pep na a sogo gwalwel. Wa ê kyɛm a tumal e nuyel gwɛ ɛ!

¹¹Wa a ga ra gwɛ na gwo tik nà tala pyɔ̌n o ɛ? Vit a mwat, mwa e ji jey!

¹²Mê ha a hwo nedem rebek gwɛ, na rehâ gbɔng gap gwɛ, na yerê nerat de gwa vɔk.

¹³Wa e tɔk wɔnɔ rehwo gwɛ arɛt? Wa ê kulu netîng rugû gwɛ pere wɔ̀ ta ɛ?

¹⁴Wa a vɔk gap de ê wunta nû gwɛ arɛt? Yìn gwɛ ba sé pyɛ bengyip.

¹⁵Bamâ gwɛ ba yong wɛ beruga, ba ngyɛrɛ vɛ kpá sede ba manas na tô-gwɔ̀m.

¹⁶Kawɛ ruga mo wa sé bagat na mumwɛ, gul gwo tɔk yel e tê vɛ wɛt.

¹⁷Ba man vɛ, hwak e ra hwak, bà sé pang e ra bemɛn ko be tɔk gas vɛ wɛt.

¹⁸Vô dyɛ̀ng gwɛ he tē bwerep à kya, ko bayîs gwɛ basinang sede nusû gwi.

¹⁹Yi e nû gwɛ, lêm kya he ta negbey, nebwerep kya ne tē lwál!

²⁰Yi na nesong gwɛ sekyeng sé yis, sede yi e rwey de he tē puu.

²¹Nesong gwɛ ne tɛ̀ hwalang he sey kya, ko lem kya hé yis e nû gwɛ.

²²Gâp gwɛ ha wɛrɛ e fwɔ, mán na gwɛ ha sé gbɔng bengyip.

²³Banama gwɛ ba sé paasas e ra bemɛn, ba wuna hɛn vit a ye yɛk-yɛk.

²⁴Gwa vɔk yêy gwofwa, ey, sede gwofwa hwongo.

²⁵Jeng de gwo sogo, bedagwi be wok bengyip, jeng de gwo kyè be wok wɔ̂ng pyɛ́ de gwo gangas, ko be vow.

²⁶Ka ba tara gwɛ na wal, kɛ ba toro gwɛ na barâ jɔng, kɛ na tom, vit a pyɛ de yê mǎ gwɛ.

²⁷Gwa jut dyam sede hwogôt mapak, ko dyam shi sede bɔsɔ̂ cɔgɔt.

²⁸Kwet gwo tɔk tɛ̀ gwo tele wɛt, gazik wa sé sede nesos zɔng na gwɛ.

²⁹Gwa jut bekpurung sede nesos zɔng, gwo shɛgɛsh gûl bejɔ̂ng bebara de be tó mɛ gwɛ.

³⁰Nɛ̂n jim gwɛ ha sé vootot sede cɛ̂k kywà, jeng de gwo kwey e bwɔrɔk, gwo tik ɛ nekyɔ̌n sede gwa vɔk nepyɛ zomzom.

³¹Gwo tɛ̀ nshî tîs rep ne bɔgɔs sede rwey he tē puu, gwo tɛ̀sɛ rep sede fùs něy mɔmɔ̂ gwɛ.

³²Jeng de gwo kwey na sefwa, nshî gwong o ne nɛp ko ne paa fulu pwɛng.

³³E jey mwa, vit a yerê gwɛ, gwongyama de vit à bengyip.

³⁴Gwo bɛɛ vit a ngyama de ya vey gwɛ. Gwa sé gbɔng gwɔ̀m e ra mwa ngyāma de ye dak kaa.”