Read berom Iyɔp 42 Bible Online

Iyɔp 42 - berom bible

Iyɔp 42

¹Iyɔp a hanat a Dagwi Darwey a ye,

²“Ma tɔk hwà vɔk reto na hwo ra kayɛ pyɛ, vit a mwat de e dul o nà ra pyɛ de hwà tɛ̀ e yey.

³Hwà rangal me wɔgɔ, ‘E rɛ̌ de hwó tó yey e ra netsitsɛng hom arɛt? Ma dun, ma ha e ra pyɛ́ de ma tɔk wɛt, Pyɛ de ya sé pyɛ langat na me de ma tɔk yɛ wɛt.’

⁴Ko hwà ye, ‘Wet betong, mê ha! Mê rangal, ko hwô hanat.’

⁵Ma ga kana wok bemat be ha e ra hwo; ko a remo kē, ma ga di o bayis na bayis,

⁶a sé a me vwes na pyɛ́ de ma ha, ko ma tosho gabɔk, ma sangal e fongol.”

⁷E bama de Dagwi Darwey a ha a Iyɔp neha nemo, ko Dagwi Darwey a yâng Elifas wo Teman: “Shom hom ye tē puu e ra hwo na besa mō beba, yaga yin a ha pyɛ de ya sé tyɛng e ra me wɛt, sede mwât fwom hom Iyɔp de a ra.

⁸A remo, vo in bemus betaama na beturuk betaama, na yin a wɔ́ na mwât fwom hom Iyɔp, na yin a nára nɔrɔ̂ yas burang yaga bato min, ko mwât fwom hom Iyɔp ê ra won yaga yin, mê sey won mɛ na me tik nà tala hin netɔn min; yaga yin a ga ha pyɛ de ya sé tyɛng e ra mɛ wɛt, sede mwât fwom hom Iyɔp de a ra.”

⁹Ano, Elifas wo Teman, na Bildat wo Shuwa tanga Zofar wo Naama ba kyè, ba wɔ̀ ra pyɛ de Dagwi Darwey a ha a yɛn, ko Dagwi Darwey a sey won Iyɔp.

¹⁰Dagwi Darwey a toyo a Iyɔp na pyɛ́ de a kana bidɛ, e bama de a ga ra won yaga besa mɛ, Dagwi Darwey kwong a nɔng ɛ pyɛ de a kana vɔk yimo zang ba.

¹¹E bama mo, mwa begwa mɛ bewen na behwong na mwa vemo de ba kana tɔk ɛ, yɛn a re pyɛ̂ nzem e lɔ Iyɔp. Yɛn a dura toshô reyɔm na wɔrɔk hɛ, yaga mwa reyɔm de Dagwi Darwey a vey a yɛ mɛ. Kawɛ mɛn a nɔng ɛ nɔrɔ̂ kedyam na yɔbɔ̂ dyam shinang.

¹²Ko Dagwi Darwey a tɛ̀ a Iyɔp nerat e yɛnɛ mo, a dal susu mo, a vɔk tyīmit gu kuru na vɛ banaas (14,000), na bemaryat gu batyiimin (6,000), na berɔndɔ̂ng cap gu baba (2,000), tanga behâ madung gu rining (1,000).

¹³A vɔk nèy bewen betaama na behwong betat arɔng.

¹⁴Ko a vo a behwóng mɛ baza, wo susu mo, à Yemima, wo neba à Keziya, ko tashal mɛn à Keren-hapuk.

¹⁵E ji jey mwa, ba sɛ̀ bezɛrɛ behwong sede vê Iyɔp wɛt, ko da mɛn a gas a yɛn pyɛ̂ nedanelɔ na begwa mɛn bewen o.

¹⁶E bama de Dagwi Darwey a ga toyo a Iyɔp na pyɛ́ de a kana bidɛ, a ros neshey naga na ne kuru banaas (140), a ku, a di nèy nèy mɛ zamang hê naas.

¹⁷Iyɔp a ku mwakuk kpushuk.