Read berom Iyɔp 5 Bible Online

Iyɔp 5 - berom bible

Iyɔp 5

¹“À Iyɔp, yila kɛ mwat hwak ê hanat a hwo arɛt? E wɛ e ji bemat-lagwi de hwô doyo vɔk ɛ̀ na a wok o ɛ?

²Mwin, rogôs shom e yey he wey na tɔn, repugu re wey na womo de vit a netsitsɛng.

³Me, tó hom ma ga di tɔn de a hwo yong sangal mɛ, ko e ji jeng gawey ha hwo e lɔ mɛ.

⁴Nèy mɛ ne sangal tyang wɛt, be bunut ne, vit a mwat de e sey ɛn e vwɔ̂ shɔt.

⁵Pyɛ̂ yeneng mɛ be wey mɛ e jeng vyong, be tɔng mwa pyɛ de ya sɔ́sɔ̀k hɛ e serogo, bemât gananang be jama nedanerey mɛn.

⁶Negbang ne vey yi e fongol wɛt, kɛ reyɔm re tulu yi e vwel wɛt.

⁷Ba tɔ mwasi na a sɔ reyɔm tyɛng sede ba tɔ kim na a sogso e rak o.

⁸Ka me, ma yang doyo vey na Dagwi, me wɔ na sesin hom na yɛ,

⁹yɛ de e ra gbɔng pyɛ́ de be sang ngyɛgɛt yɛ wɛt, pyɛ̂ langat de vit a yɛnɛ.

¹⁰Yɛ de e nɔngɔ̂s jey rwak, e tɛ̀sɛ a hiri nshi.

¹¹E nɔng nerey na vemo de ba sé besɛl o, ko e nɔng sɛlɛ na vê sesin.

¹²E lashe pyɛ́ de bemât sekwɛl be yong na netsitsɛng neves, ano be tɔk di wɛng e ra pyɛ́ de be ra wɛt.

¹³Yɛ, e vos vê netsitsɛng na fwôm vɔ mɛn o, ko e rigim vemo de be tsip pyɛ́.

¹⁴Nagwi e sè a yɛn lwil, tê-gwi yɛn e mɔgɔm sede e nakabadem.

¹⁵Ko Dagwi e sey vemo de vit a hɛn na mwât sɛlɛ, e sey bepɛng yi e vwɔ̂ vê paà neves na vê reto.

¹⁶E tɛ̀ bepɛng be sɛt yey, e bang nenu bemat beves.

¹⁷Ey, mwin, vê wɛng à vemo de Dagwi e gyong ɛn, hwo kwon byɛs Dagwi Wo Reto Mwa wɛt.

¹⁸E ra hwâl baram de a tɛ̀ a hwo, a mǎ hwo, ko na vwɔ mɛ ê tɛ̀ o tyang.

¹⁹E sey o yi e reyɔm tyiimin, e hê taama pyɛ cak vyes ye ra o wɛt.

²⁰E séy ɛn yi e reku e jeng vyong, e sey neken mo yi e vwɔ̂ bemât como.

²¹E lɛrɛ hwo yi e neha neves, hwô vɔk bengyip wéy wɛt.

²²Hwô shɛgɛsh e jeng wey na jeng vyong, hwô vɔk bengyip ngyāma wɛt.

²³Cāp mo yê vɔk bèkusha wɛt, hwô sangal tyang na ngyāma.

²⁴Ano kwong hwô sangal na yêy dyɛngɛ e lɔ mo, hwô basa pyɛ́ de hwà vɔk e kwara, hwô bidɛ pyɛ cak wɛt.

²⁵Hwô di yére mo ye sè pyak-pyak, ko nèy mo sede sɔng e hey.

²⁶Hwô ba ku hwo sè rɔngɔl pwásak, tyɛng sede batô pyɛ̂ yeneng de be yɛt yɛ.

²⁷À Iyɔp, wot a ga tɔrɔng e ra pyɛ́ yemo, ko ya sé tsak o. Wok, sey yɛ, yê sè a hwo nerat.”