Read berom Iyɔp 6 Bible Online

Iyɔp 6 - berom bible

Iyɔp 6

¹Iyɔp a hanat a ye,

²“Ka ba yang mara lashê yey hom na reyɔm de me tak e ra pyɛ masa,

³yê dal nedirîk bazɛ̂k gworep, yaga ano de me nigis.

⁴Dagwi Wo Reto Mwa a ga mǎ me na ket mɛ, ma sé wok na nedɔm o e rebek hom, shôm Dagwi ye tē puu e ra me.

⁵Madung wó tosho jeng de sehwey sa sɛ́ arɛt, kɛ rɔndɔng wo dak sekun, jeng de pyɛ̂ rê wɛ ya sɛ́ arɛt?

⁶Wa e kyɛm a re pyɛ́ túng-tung vit a nevwashe ɛ? Neta na sé e ji nshî regyi bɛ?

⁷Ko remo de ma sé e ji serɔ, me re pyɛ́ yemo de me simo wɛt.

⁸Ka ba yâng nɔ́ng me pyɛ de ma sé ra wôn yɛ, na Dagwi a nɔng me pyɛ de me sɛt ɛ bayis;

⁹Ka Dagwi a hwongo me, a ra me, na a jut neken hom.

¹⁰Hemo hê wɔrɔk me, mê vɔk yey pyɛng mwa na nepêp serɔ, ka sede mê sogo nehywɛ hâ Wo Jɛrɛ wɛt.

¹¹Ma vɔk gap de mê to gwɛ̌ gyeng arɛt? A tɛt a me ɛ jeng ala, de mê ka me niri arɛt?

¹²Ma vɔk gap gwofwa arɛt? Rebek hom ra vɔk gap sede dyam shi arɛt?

¹³Me tɔk sɛlɛ to hom ko tyɔng wɛt a? Vit a sɛlɛ de hê vey a me a?

¹⁴Dura nerat na mwat vwara mō, a sé sap Dagwi Wo Reto Mwa.

¹⁵Begwa hom vit a tsak o sede rɔt de he ye jɔng, be vey, be kyè sede nshî káng.

¹⁶Rɔt he sila na nshi jeng de wut wa tala hɛ,

¹⁷ko e jeng cak he ye jɔng vit, sede gwi gwa ta, hé ye bit.

¹⁸Bejik ba hala gwong na be sɛ̀ rɔt o ba yel e hêy gbingiring ba vuru hɛn.

¹⁹Bejik yi e Teman ba bɛrɛng hɛ̄, bemat kwɛngɛl yi e Sheba ba sɛt yey e ra hɛ.

²⁰Yɛn a tɛ̀ yey, yɛn a wok rekyen; yɛn a vey e kwɔ̂n rɔt, a yang ɛn kpɔrɔk.

²¹Yin a sé na me sede rɔt hane, yin a di me ko yin e wok bengyip.

²²Ma ga yang in, ‘Yin nɔng me nɔrɔ arɛt?’ kɛ ma ga ye, ‘Nɔng me pyɛ̂ nedanerey a?’

²³Kɛ ma ga dak gabɔk yin sey me a? Kɛ yin viri me yi e vwɔ̂ womo de e tak a me a?

²⁴Yin basa a me ko mê sǎ yuu, yin dura a me kwɔn de ma ga buru!

²⁵Hâ tsak o he yel na reto, yin e tabak me yaga sɛ́ arɛt?

²⁶Yin e simo tabak ha hom arɛt? Hâ mwat de a sé e ji bɔrɔk ha sé sede gul.

²⁷Yin e masa begbɛrɛng na yin vos mɛ nehyɛn, yin e rɛsɛl besa min.

²⁸Bɛrɛng hin me ano, mê sang vɛ bɔs e bayis min arɛt?

²⁹Tik in ha min, yin tele nenu wɛt! Tik in ha min, a sé reha necik hom.

³⁰Pyɛ cak ya sé vyes e lêm ha hom bɛ? Yin e bare me tɔk gas tsak o yi e pyɛ́ vyes wɛt arɛt?”