Read berom Iyɔp 7 Bible Online

Iyɔp 7 - berom bible

Iyɔp 7

¹“Neken mwasi na sé sede mwat como, na sé sede mwât fwôm sesam, nepɔlɔ mɛ na sé sede nè mwât fwôm byɛ.

²Sede sam de e gyeng gabâ gwi, sede mwat fwom de e gyeng dyām mɛ zɔng.

³Pɛl e ra pɛl vit à tin, turuk e ra turuk ma ga té me hywiri.

⁴Jeng de me dyɛng, me rangâl to hom, e yɛ̌ jeng de mê sene ɛ, turuk ha nàta hɛ, me nàra e de doysa vɔk e rwa hwol gasi.

⁵Rehwô rebek hom ra sila na bekut, rebek hom ra sila na benot, bà tɛ̀ nshi ba kulu hɛn.

⁶Nepɔlɔ hom nê ye shung sede kyeng, nê kwey vit à sɛt yey.

⁷Hwó bare, neken hom na sé nesong zɔng, bayis hom bê to di nerat wɛt.

⁸Yis mo ha kana di me ko hé to di me wɛt, bayis mo bê jama di me ko vit a me.

⁹Sede bale de be shara hɛn, be ye wɛrɛng, ano, yɛ de e wɔ e kwɔn bevuvwel, e to vey wɛt.

¹⁰E sang toyo e lɔ mɛ wɛt, bemat mɛ be to di ɛ wɛt.

¹¹Ka me, mê man nu hom wɛt, mê ha, yaga gabik serɔ hom, mê ha e sesin hom pyɛ de ye re a me yey.

¹²Ma sé gwotagbɔk pyɛ gworep kɛ gwalwel nshi de hwó tɛ̀ be gyeng me arɛt?

¹³Me dyɛng na me sɛ̀ pɔnglɔ, mê sɛ̀ yêy dyɛngɛ, pɔnglɔ yaga gabik serɔ hom.

¹⁴Ko mwa ano hwó tɛsɛ a me bengyip na negwi, hwo tɛ̀ me tē lot na pyɛ̂ durâ negwi-ywey.

¹⁵Ma dal na simo be tá a me tsɔt, me ku, de mê sè wɔnɔ bekup.

¹⁶Ma ga ye waa, me simo nàra kwen gbak-gbak wɛt, tík me, neken hom na sé nesong zɔng.

¹⁷Mwasi a sé sɛ́ de hwà tɛ̀ ɛ gbɔng o ɛ? Mwasi a sé sɛ́ de hwà tɛ̀ nehywɛ mō e ra yɛ ɛ?

¹⁸Hwó bɛrɛng hɛ kahɛ gasi, hwo masa hɛ kayɛ jeng.

¹⁹Ma sé ra won, tik me zɔng, tik me, me wɔlɔk netěy.

²⁰Ka ma ga ra renɛn, e sɛ́ yɛ de ma ra a hwo ɛ, a mwât gyêng bemasi ɛ? E rɛ̌ de hê ra o arɛt? Yaga sɛ́ de hwà ta me e yel arɛt? Ma ga tɛ́ me pyɛ̂ nedirik na hwo arɛt?

²¹Hwô jut a me banɛn hom, na hwo gas me na pyɛ́ vyes hom wɛt a? Jeng tyɔng bê bang me na fongol, hwô jama mɛ vit.”