Read berom Iyɔp 8 Bible Online

Iyɔp 8 - berom bible

Iyɔp 8

¹Bildat wo Shuwa a hanat a ye,

²“Vɔk e yɛ̌ jeng de hwô ha yere neha mo ɛ? Hwo ha hâ gul zɔng.

³Dagwi e rigim shɔt arɛt? Kɛ Wo Reto Mwa, e rigim tsak o arɛt?

⁴Sede nèy mo na ga ra a yɛ renɛn, a ga gang ɛn yaga renɛn mɛn.

⁵Sede hwà doyo vey na Dagwi, na hwo ra won na Wo Reto Mwa, ê wok nemwishish mō.

⁶Ka sede hwà sé haalal, hwà sila gyat, ê sogo na a sɛlɛ hwo ko e nɔng o kwɔ̂n sangal de ha jam.

⁷Negwɔn de hwà kana sè a raane, na sé pyɛ cak wɛt, ko pyɛ́ de yê raa yê sè ryey o.

⁸Rangal yi e nezamang de na ga kwey, bare e ra netsitsɛng de bedabeda mot bà sè.

⁹Yos yos a womo de wot á sogo zɔng wot a tɔk sɛ́ ɛ? Nepɔlɔ mot na sé sede zina de he ye bit.

¹⁰Ko nezamang de na ga kwey nê basa a hwo, nê ha a hwo, nê nɔng o neha netsitsɛng.

¹¹Cɔ̀gɔ ye ras e kwɔn de vit a rek arɛt? Sere sé se lis e dem de vit a nshi arɛt?

¹²Jeng de cúyu mɛn ye rɔngɔl gwim-gwim ba ga kana yɛt yɛ wɛt, yé ye nɔɔshɔsh gyam sɔng hwak.

¹³Nekên vemo mwa de pyɛ mɛn ya sé na Dagwi wɛt, na sé sede cɔ̀gɔ yane, sɛ̂t yey bemat de vit à bengyip Dagwi hé tɛ́ ɛ yapyi.

¹⁴Yɛn e sey tsak o na pyɛ́ de yê nɔng ɛn rekyen, ko tɛ̂ gap mɛn ha sé sede lɔ̂k nàrang.

¹⁵Be ye yɛndɛng e lɔ̂k nàrang ko wo ye wàsháng, bé ye bé kaba, ko vit.

¹⁶Yɛn a sé sede retin cɔgɔt de ra sé gwim-gwim e gwi, re nǎ nelang rɛ e bwi;

¹⁷berinis yɛ be hanas beta, be ye pang e ra gwofwa.

¹⁸Sede ba lut yɛ e bwi mo, be ye bam a yɛ.

¹⁹Mwin gwông yey pyɛ̂ng yɛ a gwane, ko yi e vwel cɔgɔt cak ye to tulu.

²⁰Mwin, Dagwi e kyɛ́ ɛ mwat de a sila gyat wɛt, kɛ e sɛlɛ bemat ragas pyɛ́ vyes wɛt.

²¹Sɛ̌ a to tɛ̀ hwo shɛgɛsh, yey mō yê pɛngɛ na nzem.

²²Vê repugu mō rekyen rê kyiri hɛn sede gworugu, nelɔ bemat beves nê wey.”