Read berom Iyɔp 9 Bible Online

Iyɔp 9 - berom bible

Iyɔp 9

¹Iyɔp a hanat a ye,

²“Ey, ma tɔk tsɛng-tsɛng a sé ano, ko vit a mwasi de a sé cik e nuyel Dagwi.

³Ka hwà tē ngyɛng e tô cuna, hwô tɔk toyo a yɛ na hanat hining e ji nerangsal gu wɛt.

⁴A vɔk netsitsɛng, a dal na reto mwa, wa e tɔk ra retek na yɛ na a sangal tyang ɛ?

⁵Mwât segês beraku vit à tɔ̂k vɛ, e doyo vɛ gup e ji shom mɛ.

⁶Mwat tɛ́sɛ jey ye rɛɛ, ko besesêk vɛ be digis.

⁷Mwat nɔng gwi nu, ko gwó nusu wɛt, e kyiri netangacɛn, na ne tɔk nɔng negbey wɛt.

⁸Mwat de a lásha lagwi nju mɛ, ko hwo bɔrɔs e ra gwotagbɔk pyɛ gworep.

⁹Mwat de a tɛ̀ netangacɛn e nekwɔn nɛ, sede rôn-cap-rɔndɔng, na mwat-jàma tanga nǎgyeng.

¹⁰Mwat ragas pyɛ̂ bes de ya dal gap tɔk, pyɛ̂ langat pyak de ya dal bara.

¹¹Mwin, Dagwi e kweres, me di ɛ wɛt, e pere, me kun ɛ wɛt.

¹²E pere ta kyɛm pyɛ de e simo, wa e tɛ̀ ɛ na a toyo arɛt? Wa e yang ɛ, e sé de hwà ra arɛt?

¹³Dagwi e ye rɔ̀s a shom mɛ wɛt, bemat sɛlɛ gwalwêl nshi ba ye guduruk na be bɔrɔs e rama mɛn.

¹⁴Taga me a? Ma vɔk pyɛ hanat wɛt! Mê yi na neha e gwa de mê tɔrɔng na yɛ ɛ?

¹⁵Mwa ano de ma sé vit a renɛn, me tɔk hanat a yɛ wɛt. Me dak gabɔk zɔng.

¹⁶Ka ma yila hɛ, a doyo a di me, ê wok me wɛt.

¹⁷E dak me na gwogul rwak, ko vit a retin, e gwɛsɛ a me baram.

¹⁸E nɔng me gwong na me wɔt nesong wɛt, e tɛ̀ neken hom ne reneng.

¹⁹Mê mara gap bɛ? Yɛ a sé wo gap, Ko mê mara shɔt na yɛ arɛt? Ko wa e yila hɛ e duk shɔt arɛt?

²⁰Ka ma sé vit a renɛn, nu hom he gang me, ka vit a pyɛ cak vyes na me, e yɛrɛ a me shɔt renɛn.

²¹Mwin, vit a pyɛ cak vyes na me, ma ga row neken hom, ma jut neken hom na sé yapyi.

²²A sé pyɛ jining o, yaga ano ma ye, vê banɛn na vê vit a banɛn, e wey na yɛn.

²³Sede tumbang wa pere vey na reku, e shɛgɛsh reyɔ̂m mwat rwat.

²⁴Jey ya sé e vɔ bemat beves, a ga bang bayis bemât shɔt. Ka e Dagwi wɛt, wa ê ra ano ɛ?

²⁵Nepɔlɔ hom ne kweres ziri, ne dal mwat setele; ne tele vit à pyɛ ryat e ji ne.

²⁶Sede bedwa-nshi de be ryenges, be pere, sede kim e jama pyɛ̂ re.

²⁷Tik me tik lashe yey, me hala bayis, me vɔk yey pyɛng.

²⁸Ma vɔk bengyip reyɔm de ha hwo e ra me, yaga ma tɔk hwô hala me washak wɛt.

²⁹Remo hwà yɛrɛ a me shɔt nɛn rê? Yaga sɛ́ de me tak a tó hom vit a retin arɛt?

³⁰Ka ma kus me na fulukus, ma hagat vɔ na fongôl kya,

³¹ano hwó kyè wɔ barak me e vɔng bwɔrɔk; berugu hom bê di me byɛm-byɛm.

³²Dagwi a sé mwasi sede me wɛt, de mê toyo a yɛ na ha, na be ra a wot shɔt tanga yɛ.

³³Ko di, vit a mwat de e yel e tē mot na a gas ot, womo de ê tɛ̀ vɔ mɛ e ra yɛ na me.

³⁴Ka e hala gwele mɛ de a vɔk e ra me, a tik nɔngɔs me bengyip na shisa me;

³⁵ano, me hanat vit a bengyip, yaga ma tɔk yey hom.”