Read berom Lɛlɛ 10 Bible Online

Lɛlɛ 10 - berom bible

Lɛlɛ 10

¹À Dagwi Darwey, yaga sɛ́ de hwà sé yikyik ɛ? Yaga sɛ́ de hwà lɛrɛ hwo e jeng reyɔm ɛ?

²Bemat beves, vit a rekyen, be tik bepɛng be wɔt nesong wɛt. Tik na be hwo e ji segun mɛn de ba rene!

³Vê neves be dak gèy yaga cwey pyɛ̂ yey mɛn. Yɛn a vɔk gananâng pyɛ́, yɛn e byɛs, ko yɛn e dùsa Dagwi Darwey.

⁴Bemât beves be tos bato, be tē, “Sɛ́ yê vey tik Dagwi e ngamo ɛ? Yɛ a ka sɛ̀ a?”

⁵Ko mwa ano, be di wɛng e kayɛ pyɛ de yɛn e ra. Be bare, ka hwà gang ɛn na shɔt, yê re ɛn wɛt, be shɛgɛsh bemât repugu mɛn mwa.

⁶Be tang bato mɛn, “Wot ê gaba wɛt! Wot ê sang sɔ reyɔm ko tyɔng wɛt!”

⁷Yɛn e dusa, be shisa bemat, be ragas nebɔs, neha nengyas na ne repugu zɔng ne nunus e nenu mɛn.

⁸Yɛn e sǎ e waba e bamâ nebapomo, be gyeng, na be mɔbɔs bemat de ba ka re pyɛ mwat wɛt, be wɛrɛm vê gawey de bê gaba e vɔ mɛn.

⁹Bé gyeng sede gukum e waba, be ye dùlang e ra vemo de vit a hɛn na sɛlɛ. Be vos bepɛng de ba sé kwey na segun mɛn, ko be hwɔlɔ hɛn vɔk e majey.

¹⁰Be hwo e ra vê gawey, be pere ngukta hɛn na gâp tuk.

¹¹Be bare e neyey mɛn, “Sɛ̂ Dagwi ya sé ɛ? A ga lɛrɛ bayis mɛ, e di pyɛ cak wɛt!”

¹²À Dagwi Darwey, sogo! Tabak bemat beves vemo mo! Hwo ye bam na vemo de vit a hɛn nà mwât sɛlɛ wɛt!

¹³E rɛ̌ de bemat beves be byɛs o ɛ? Yaga sɛ́ de yɛn e tâng bato mɛn, “Ê ra a wot sɛ́ kɛk ɛ?”

¹⁴Ko hwà sé bwók wɛt, à Dagwi, Hwó bɛrɛng vemo de be sɔ reyɔm, be midra hɛn. Hwà sé e yong o, na hwo sɛlɛ hɛn. Vê gawey be dyɛng e gèy mō, nehyɛn ne sɛ̀ sɛlɛ mō arɔng.

¹⁵Kwɔrɔ gâp bemât beves na vê nengyas, Tabak hɛn, tɛ̀ kwɔk a pyɛ́ vyes mɛn o.

¹⁶À Dagwi Darwey, hwà sé gbɔng gwɔ̀m gbak-gbak, ko yére dyuk de ya tɔk o wɛt yê vuru hɛ yi e sevwel mō.

¹⁷À Dagwi Darwey, hwó wet betong na toshô vemo de vit a hɛn na mwât sɛlɛ. Hwó wok won mɛn, ko hwó tɛ̀ neyey mɛn ne se ting.

¹⁸Hwó wok toshô nehyɛn tanga vemo de be midra a yɛn, ko hwó suna hɛn. Ano kwong, vit a mwasi e jey de ê to shisa behak.