Read berom Lɛlɛ 102 Bible Online

Lɛlɛ 102 - berom bible

Lɛlɛ 102

¹Wôn womo de e di reyɔm jeng de e rɔ ɛ, ko a sé dura a Dagwi Darwey negbang mɛ À Dagwi Darwey, wok won hom, wok tosho hom yaga sɛlɛ.

²Hwo lɛrɛ hwo e jeng de ma sé e ji reyɔm wɛt! Wet betong na me, jeng de ma yila hanat a me ziri.

³Nepɔlɔ hom nê ye shung sede kyeng, bekup hom ba sé sede be raye vɛ e fwam-ju.

⁴Ma ga sɔ́ me, ma ga hworok sede sɔng, pyɛ́ ye kyɛ́ ɛ a me nu.

⁵Yi na rus ding-ding, ma ga tɛ́ me ganjang.

⁶Ma sé sede gwonon e hey, sede ying-gyi e barin.

⁷Me pɔlɔs ywey, ma sé nju hom, sede kenon de ka sé nju kɛ e ra tɛ̂t duk.

⁸Bemât repugu hom be woros me mwa wosho. Vemo de be mok me, be ra fwom na reza hom, na be mok a behak mɛ gawey.

⁹E tô pyɛ̂ re, me re fongol, nemwishil hom na kyɛrɛ hɛn na nshî sɔ hom.

¹⁰Yaga shom mō pyep, hwà jut me, hwà bomo me e jey.

¹¹Nepɔlɔ hom nê vey bagât tala hɛn sede zinâ nawiri, ko mê hworok sede sɔng.

¹²Ko hwo, à Dagwi Darwey, hwà sé gbɔng gwɔ̀m gbak-gbak, mwa nezamâng vey nê ha e ra hwo.

¹³Hwô sogo na hwo wok nemishish repomô Siyɔn, ey, jeng a yemo de hwô tosho reyɔ̂m rɛ.

¹⁴Wot, bemât fwom mō wot e tɛ̀ yey na rɛ, mwa ano de ba ga wey na rɛ, Wot e wok nemwishish bɛrɛ̂ng barin o.

¹⁵Yére dyuk yê wok bengyip Dagwi Darwey, mwa begbɔng begwɔ̀m jey bê vow yaga gbɔng nerey mɛ,

¹⁶yaga ê to lɔk Siyɔn, ê dura gbɔng nerey mɛ.

¹⁷A rɔda wok won vemo de vit a hɛn na mwât sɛlɛ, ê byɛs won mɛn wɛt.

¹⁸Tik be jɛk pyɛ́ yemo yaga zamang de he kyè vey, ano, vemo de ba rɔngɔl nà tɔs ɛn bê ba somo hɛ, bê tē,

¹⁹“Dagwi Darwey a bɛrɛng yi e lɔ mɛ hê jɛrɛ e lagwi, yi e lagwi, Dagwi Darwey a kún jey.

²⁰A wok rûs bemât lɔ̂ ngyang, ko a viri vemo de ba ga yɛrɛ a yɛn shɔ̂t reku.”

²¹Jeng de bemat yi e yére tanga segwɔm mwa ba tula hɛn, na be re a yɛ fongol, bê ha e Siyɔn e ra pyɛ́ de Dagwi Darwey a ra, bê somo hɛ e Yɛrusalɛm.

²³Ma sé rɔngɔl bwot, ko a tik me lɛs e nû reku, a tɛ́t nepɔlɔ hom.

²⁴Yaga ano me ye, “À Dagwi, hwo de hwô nàra gbak-gbak, hwo kwon jut me a remo wɛt! Di, ma rɔngɔl nà kwop!”

²⁵Yimo bèsheybeshey, hwà bomo retîs jey, lagwi wa sé fwôm vwɔ mō arɔng.

²⁶Jey na lagwi bê tala hɛn, ko hwo, hwô nàra gbak-gbak. Mwa yɛ yê kwop sede gworugu, hwó segsa yɛ sede berugu, ko yê pere wey.

²⁷Ko hwo, hwó sege hwo wɛt, neshey mō na vɔk yɛnɛ wɛt.

²⁸Nèy mot de wot a sé besam mō nê sangal tyang, yére mɛn yê sangal tyang e nuyel mo arɔng.