Read berom Lɛlɛ 103 Bible Online

Lɛlɛ 103 - berom bible

Lɛlɛ 103

¹Lwɛlɛ̂ Davit Me somo Dagwi Darwey na yey hom mwa, na yey hom mwa, mê somo Dagwi wo jɛrɛ!

²Me somo Dagwi Darwey na yey hom mwa, mê sang ye bam na nerat mɛ de a dura a me wɛt.

³E halsa a me banɛn hom mwa, e tɛ̀sɛ me tyang yi e nerɔ hom mwa.

⁴E sey neken hom yi e reku, e dura a me nerat ding-ding, e wok nemwishish hom tyɔng wɛt.

⁵E nɔngɔs me pyɛ́ de me simo gbák de ma sé kwen, e turu me e nebot hom, me ye bir sede kim.

⁶Dagwi Darwey e yɛrɛ shɔt tsak o, e yɛrɛ a vemo de be tak a yɛn shɔt e tē.

⁷A dura a Mose pyɛ́ de a yong ɛ na a ra, ko a dura a BeIsrayɛl tomong mɛ.

⁸Dagwi Darwey a sé wo toshô reyɔm, wo nerat. E ra shom ziri wɛt, ko e dura a bemat nerat mɛ ding-ding.

⁹E gyong ot kayɛ jeng wɛt, e wok shom gbak-gbak arɔng wɛt.

¹⁰E tabak hot lɛgɛm, e tala hot tyɛng na banɛn de wot e ragas wɛt.

¹¹Sede remo de lagwi wa sé yikyik na jey, ano de tɛ̂ yey mɛ na vemo de be sap ɛ ha sé ding-ding.

¹²Sede remo de rwa rak wa sé yikyik yi e rwa ta, ano de Dagwi e jut banɛn mot yi na wot.

¹³Sede remo de da e wok nemwishish nèy mɛ, ano de Dagwi Darwey e wok nemwishish vemo de be sap ɛ.

¹⁴Yɛ a tɔk gwong de a yong ot, a dun wɔgɔ, a yong ot na fongol zɔng wɛt.

¹⁵Neken mwasi ne kwey sede sɔng, sede bejamuk de be ras vòo e hey.

¹⁶Gul rak gwo pɛsɛl vɛ, ko be pere wey, be to tɔk kwɔ̂n vɛ wɛt.

¹⁷Ko Dagwi Darwey e tɛ̀ yey na vemo de be sap ɛ nesheneshey, e dura a yere mɛn nerat,

¹⁸yemo de ye gyenges wuna-na-sira mɛ, de ye bare na badu mɛ na be gyeng vɛ.

¹⁹Dagwi Darwey a ga tɛ̀ gwofwa negwɔm mɛ e lagwi, yi e hwomo, e re negwɔm e ra jey mwa.

²⁰À yin begbɔng betom-lagwi de yin e ra pyɛ de e nɔng in nu, à yin de yin e wet betong na ha mɛ, somo hin Dagwi Darwey!

²¹À yin regyɛng lagwi, a yin bemât fwom mɛ de yin e ra pyɛ́ de yɛ e simo, somo hin Dagwi Darwey!

²²À yin pyɛ̂ mwa de Dagwi Darwey a yong, somo hin hɛ e mwa nekwɔn de e re ɛ negwɔm! Me pyɛ hom arɔng ma rɔda somo Dagwi Darwey.