Read berom Lɛlɛ 104 Bible Online

Lɛlɛ 104 - berom bible

Lɛlɛ 104

¹Me somo Dagwi Darwey na yey hom mwa. À Dagwi Darwey, Dagwi hom, hwà sé gbɔng o sedesi! Sede mwat a tɛ̀ gworugu, ano de hwà tɛ̀ gbɔng nerey na nedyɛt gbɔng nerat,

²hwà tɔrɔ hwo na negbey. Hwà lasha lagwi sede buk,

³hwà lɔk lɔ mō e ra rak o.[36] Hwó ra fwom na bale sede kyɛkyɛ̂ bedwa, hwó ra fwom na gul sede bafabak.

⁴Gùl vɛ à betom mō, bemât fwom mō à balêm kya.

⁵Hwà bomo retîs jey, bê tɔk ye yɛk-yɛk a yɛ wɛt.

⁶Hwà tɛ̀ gworep gwa kyiri jey sede gworugu, nshi mo na kyiri beraku arɔng.

⁷Jeng de hwà gyong nɛ nà pere tele, na hwo tele, jeng de nà wok tákla fwɔ mō.

⁸Na gyiris yi e beraku vɔk e benɛk vɔk e kwɔn de hwà ga yong yaga nɛ.

⁹Hwà tɛ̀ a nɛ yɛnɛ̂ kwɔn de nê tɔk kwey wɛt, hwà dul nɛ nà to kyiri jey.

¹⁰Hwà tɛ̀ jɔ̄t nshi ye tá, ye tele e nerɔt, ye tele e sarâng beraku.

¹¹Ye nɔngɔs kayɛ ngyama nshî sɔ, bemadung ba kwɔshɔ mɛ yey.

¹²E bakwogom yɛ, benon lagwi be sɛ̀ mɛ kwɔ̂n sangal, be dak lɛlɛ e ra nelang cɔ́gɔt.

¹³Yi e hwomo e kwɔ̂n sangal mō, hwó tɛ̀sɛ rwak wo rop e ra beraku, vwel ha sila na pyɛ́ de hwó tɛ̀ ye tabas.

¹⁴Hwó tɛ̀sɛ sɔng gwo ras yaga berɔndɔng, na nedirî pyɛ́ de bemat be how. Ano, yɛn e sɛ̀ pyɛ́ re yi e vwel, yɛ à,

¹⁵nshî anap de ne tɛ̀ mwat a vɔk yey pyɛng, něy pwat de ne tɛ̀ bwang bayis mɛ vwɛshɛk, na pyɛ̂ re de ye nɔng ɛ gap.

¹⁶Batîn cɔ́gɔt barey o ba vɔk nshi de na vey a vɛ, vɛ à cɔ́gɔt sida ye Lɛbanɔn de hwà tus pyɛ mō.

¹⁷E hwomo de benon be lɔk ɛ barɛngɛ̂ vɛ, larwat wa vɔk ɛ rɛngɛ e ra tɛ̂t cɔgɔt o.

¹⁸Beraku berey o ba sé kwɔ̂n dal hê vyēl shi hey, nesɔ̌s beta na sé kwɔ̂n dâl shonong.

¹⁹Hwà yong pwɛl na be bara mɛ jeng. Gwi gwo gaba tyɛng e jeng gwɛ,

²⁰hwó tɛ̀ lwil, turuk a hane, ngyāma ye nusu yi e nedem yɛ.

²¹Bebōt begukum be lulum jeng de ba sê jama, be jama pyɛ̂ re yi na hwo, à Dagwi.

²²Jeng de gwi gwo ta, be toyo wɔ̀ dyɛng e tara mɛn.

²³A remo, bemat be nusu wɔ̀ ra fwom mɛn, be ra gwɛ vɔk e nawiri.

²⁴À Dagwi Darwey, hwà yong nezap pyɛ́ pyak! A sé na netsitsɛng de hwà yong pyɛ́ mwa, jey ya sila na pyɛ́ de hwà yong.

²⁵Di gworep de ba tɔk yɛnɛ̂ gwɛ wɛt. Pyɛ́ cen ryey o na shɛl o de bê tɔk bara yɛ wɛt ye kyě kyè e ji gwɛ.

²⁶Bedwa-nshi berey be kyè e ra gwɛ, gwalwel de hwà yong, gwo ra ɛ jɔgɔ e ji mo arɔng.

²⁷Pyɛ́ cen o mwa ye bɛrɛng a hwo, na hwo nɔ̂ng yɛ pyɛ̂ re e jeng de ya sé tyɛng.

²⁸Hwó nɔ̂ng yɛ pyɛ́ mo, ye tula yɛ, na vwɔ mō, hwó nɔ̂ng yɛ pyɛ́ de ya vey a yɛ.

²⁹Ko jeng de hwó doyo yi na yɛ, ye lingsit, Jeng de hwó jut nesong yɛ, ye ku, ye to ɛ fongol.

³⁰Jeng de hwó pɛl nesong, zamang pas he nusu, ko hwó to turu jey.

³¹Tik na nerey Dagwi Darwey ne nàra nesheneshey! Tik yey mɛ ye pɛngɛ na pyɛ́ de a yong!

³²Jeng de e ye ganga à jey, ko ye digis. E rá beraku, ko be tugus kyeng.

³³Mê ra a Dagwi Darwey lwɛlɛ gbák de ma sé kwen, gbák de ma sé kwen, mê somo Dagwi hom na yom.

³⁴Tik na lwɛlɛ hom gwomo gwo pɛngɛ a yɛ yey, yaga me pyɛ hom ma vɔk yey pyɛng na yɛ.

³⁵Tik hwo wey na bemât ragâs banɛn yi e jey, tik bemat beves be to sè e negbúm o wɛt! Me somo Dagwi Darwey na yey hom mwa! Somo hin Dagwi Darwey!