Read berom Lɛlɛ 105 Bible Online

Lɛlɛ 105 - berom bible

Lɛlɛ 105

¹Feng in a Dagwi Darwey! Moklo hin mwat de Dagwi a sé! Há in e ji yére bemât jey tomong mɛ!

²Rá in a yɛ lwɛlɛ! Dak in a yɛ yōm! Há in mwa pyɛ̂ langat de a ga ra!

³Dak in kaa na Dagwi wo jɛrɛ! Tik neyey vemo de be re a Dagwi Darwey fongol ne pɛngɛ!

⁴Wɔ in na Dagwi Darwey yaga a sé wo reto! Jama hin hɛ kayɛ jeng!

⁵À yin yére Abraham, sam Dagwi, à yin yére Yakɔp, vemo de Dagwi a kasa, bare hin tomông langat de a ga ra, bàre hin pyɛ̂ bes mɛ na shɔt de a ga yɛrɛ.

⁷Dagwi Darwey yɛ wɛ à Dagwi mot, badu mɛ be ra jey mwa.

⁸E ye bam a wuna-na-sira mɛ gbak-gbak wɛt, e gyeng nu de a nɔng a nezamang gu.

⁹Sira ma hane de a wuna na Abraham, de a ra na Yishak na sira mwin arɔng.

¹⁰A to ha a Yakɔp e ra hɛ na he tɛ́ ɛ redu, a nɔ̂ng Israyɛl hɛ na he nàra gbak-gbak.

¹¹A ye, “Mê nɔng o sevwêl Kanaan, hê sè nap mō, hwo tanga yere mō.”

¹²E jeng o, yɛn á sè pyak wɛt, bá sè hyehyet zɔng, bá sè sangal rekyɛn e vwel o.

¹³Ba kyě rìni yi e yére bemât jey yemo vɔk e yere, yi e segwɔm hak vɔk e hak.

¹⁴Mwa ano, Dagwi Darwey a tik mwat hwak a midra a yɛn wɛt, a hwɔtɔ a begbɔng begwɔ̀m betong yaga yɛn.

¹⁵A ye, “Yin kwon ra bemat hom de ma ga tik jaram, kɛ yin mǎ bezarap hom wɛt!”

¹⁶A tɛ̀ vyong ye yel e Kanaan o, a dul mwa begwông sɛ̂ pyɛ̂ re mɛn.

¹⁷A kana tomo a yɛn na mwat gyam, mwat o, à Yɔsɛf de ba kana row ɛ, a tɛ́ ɛ sam.

¹⁸Ba tik ɛ na ngyang e bol, cak e fwɔ arɔng,

¹⁹sɛ̌ há de à ha ha sila hɛ, ko hâ Dagwi Darwey ha dura tsak o pyɛ de à ha.

²⁰Gbɔng gwɔ̀m a tomo be pat Yɔsɛf, yɛ gbɔng gwɔ̀m yére detidetu a hala hɛ washak.

²¹A tɛ̀ ɛ darwêy lɔ mɛ mwa, a tɛ̀ ɛ a re negwɔm e ra pyɛ́ mɛ mwa

²²na a vɔk reto e ra bemât badu, na basa a bemakuk netsitsɛng.

²³E bama mo, Yakɔp a kyè wɔ e Misra, a sangal sangâl rekyen e hwomo, e vwêl yerê Ham.

²⁴Ko Dagwi Darwey a gwɛ̌ nepyak BeIsrayɛl sizɔng, nepyak mɛn na dal ne vê repugu mɛn.

²⁵A tɛ̀ BeMisra be bɛɛ hɛn ves, be re bol vemo de ba se bemɛ.

²⁶A tomo na Mose, sam mɛ, a kasa Aharon, a tomo hɛ arɔng.

²⁷Ba ra tomong de Dagwi a ga nɔng ɛn nu e tê BeMisra, ba ra pyɛ̂ bes e vwêl yerê Ham.

²⁸A tomo na lwil, jey ya ye mwangalang, ko Mose na Aharon ba kyɛ́ ɛn nu mɛ mo wɛt.

²⁹A tɛ̀ nshî nerɔt mɛn ne tɛ́ ɛn nemi, ko a wey na betɔk mɛn mwa.

³⁰Vwel mɛn ha sila na bebót wɔ̀ sɛ̀ beduk lɔ gwɔ̀m.

³¹A hanat, ko gwakû cing gwa vey, ngyána ya ye pɔk a mwa vwel mɛn o.

³²A tomo a yɛn na fwala e tô rwak, ko nedɛbɛt kya na lolo e vwel o mwa.

³³A wey na batîn anap na vê regwi mɛn, a gangas bwang batîn cɔ́gɔt vwel mɛn.

³⁴A hanat, ko rawal wa nusu, vit a mwat de a tɔk bara wɛ.

³⁵Wa wey na mwa pyɛ́ de ya tabas e vwel mɛn, wa re mwa pyɛ́ de ba how.

³⁶A mɔrɔ kahɛ hwey wen hê mɛsɛng e nelɔ BeMisra, nèy de ba tɔs e ji newen mɛn.

³⁷E bama mo, Dagwi a nusu na bemat mɛ, na pyɛ̂ tɔrɔ yê dyam shinang na pyɛng o, ba hala hwak mɛn e hwomo wɛt.

³⁸Neyey BeMisra na pɛngɛ jeng de ba nusu, yaga ba kana tɛ̀ bengyip BeIsrayɛl.

³⁹Dagwi a tɛ̀ rele re bang bemat mɛ nagwi, a tɛ̀ kya he nɔng ɛn negbey naturuk.

⁴⁰Ba rangal banama, ko a nɔng ɛn rīp, a nɔng ɛn pyɛ̂ re yi e lagwi, ba re ba siris.

⁴¹A tɛ̀ gwofwa gwa tē gbuk a nshi, na tele e hêy gbingiring sede rɔt.

⁴²A ra ano yaga nu de a vo a Abraham, sam mɛ.

⁴³A nusu na bemat mɛ, vemo de a kasa, ba ra yey pyɛng na ayiriri.

⁴⁴A nɔng ɛn bavwêl yére dyuk, ko ba re nedanelɔ vɛ.

⁴⁵A ra ano, na yɛn a gyeng mɛ badu mɛ, na be raa basa mɛ. Somo hin Dagwi Darwey!