Read berom Lɛlɛ 106 Bible Online

Lɛlɛ 106 - berom bible

Lɛlɛ 106

¹Somo hin Dagwi Darwey! Feng in a Dagwi Darwey, yaga a sé wo nerat. E tɛ̀ yey na bemat mɛ nesheneshey.

²Wa ê tɔk ha gbɔng tomong mɛ ɛ? Wa ê tɔk somo hɛ na he vey ɛ?

³Vê wɛng a vemo de be gas shɔt e tē, vemo de be ra pyɛ́ de ya sé cik kayɛ jeng.

⁴À Dagwi Darwey, bare na me jeng de hwó dura a bemat mō nerat. Jeng de hwô sey ɛn, vey sɛlɛ me arɔng!

⁵Tik na me re neta tanga bwang vemo de hwà kasa, na me bin wuna me na yey pyɛng sizɔng tanga bemat mō, na me bin dak kaa tanga vemo de ba sé bemo.

⁶Wot na bedabeda mot wot a ga ra banɛn, wot a ga ye rɛng, wot a ga ra neves.

⁷Jeng de bà sè e Misra, yɛn à bare na tomông bês Dagwi Darwey wɛt. Bà ye bam à jeng pyak de à dura a yɛn nerat mɛ, ko bà sogo nehywɛ mɛ e rep, wɛ à Gbɔng Rep Sere.

⁸Mwa ano, a sey ɛn na a dul mɛ reza yaga nerey mɛ, na a dura mɛ gbɔ̂ng reto mɛ.

⁹A nɔ̂ng Rep Sere nu na gap, ko wa pere hworok, a kyè na yɛn e retîs wɛ wɔ ye dɔ sede e hêy gbingiring.

¹⁰A sey ɛn yi e vwɔ̂ vê repugu mɛn, yi e vwɔ̂ vemo de be bɛ̀ɛ hɛn ves, a viri hɛn.

¹¹Nshi na re vê repugu mɛn o, vit a gwining de a dal.

¹²Ano kwong yɛn a sey tsak o na ha mɛ, ba ra lwɛlɛ, ba somo hɛ mɛ.

¹³Ko jeng tyɔng, ba ye bam na tomong de a ra, ba gyeng na be wok vô redu mɛ wɛt.

¹⁴Cilis pyɛ̂ re mɛn ya dal gap e hêy gbingiring, ba masa Dagwi e hwomo.

¹⁵A nɔng ɛn pyɛ de yɛn a rangal o, ko a tomo na rɔ ves e tē mɛn arɔng.

¹⁶Ba bɛ̀ɛ Mose ves e kwɔ̂n yê ngyɔk mɛn, ba bɛ̀ɛ Aharon de ba ga tik ɛ jaram yaga Dagwi Darwey ves arɔng.

¹⁷Vwel ha wunta hɛ, ha wɔlɔk Datan, ha kyiri Abiram na bemat mɛ ryap.

¹⁸Kya ha hwo e ra bemât raa mɛn, ha re bemât nengyas o.

¹⁹Yɛn a yong bwôt mus e Hɔrɛp,[37] ba re a pyɛ dyam yane mo fongol.

²⁰Yɛn a kyɛ́ ɛn nà re a Dagwi fongol, ye de a vɔk gbɔng nerey, ko ba hwo re a pyɛ sekwit de ya sé sede mus de wo re sɔng fongol.

²¹Yɛn a ye bam a Dagwi, mwât sey ɛn, yɛn a ye bam a gbɔng tomong de a ra e Misra,

²²yerê tomong langat de a ra e vwêl yére Ham, yerê pyɛ̂ bengyip de a ra e Rep Sere.

²³Yaga ano, Dagwi a ye, ê wey na yɛn. Ko Mose, mwat de a kasa, a yel e tē mɛn, a dak gabɔk na yɛ, na a hala shom mɛ, a kwon wey na yɛn wɛt.

²⁴E bama mo, yɛn a byɛs sevwel serat o mo, yaga yɛn a sey tsak o na sirâ Dagwi wɛt.

²⁵Yɛn a gwɔrɔng e bǔk mɛn, yɛn a kyɛ́ ɛn nà wok hâ Dagwi Darwey.

²⁶Ano kwong, a sira, ê wey na yɛn e hey,

²⁷ê shara yére mɛn e ji yére de ya tɔk Dagwi wɛt, yê wey e bavwel baduk.

²⁸E Peyor yɛn a re a Baal fongol, yɛn a re pyɛ́ de ba nára nɔrɔ̂ rangas vɔk na bevuvwel.[38]

²⁹Yɛn a tɛ̀ ɛ́, a wok shom na pyɛ de yɛn a ra, ko tumbang wa hwo e ji mɛn.

³⁰Pinehas a tabak vemo de ba buru, ko tumbang o wa tumal.

³¹Yimo jeng yane, vɔk e nezamang nuyel, ba remo hɛ a sé cik e nuyel Dagwi.

³²E kwɔ̂n nshî Mɛriba, yɛn a to tɛ̀ Dagwi Darwey a ra shom. Ko Mose a yel e reyɔm yaga yɛn,

³³yaga yɛn a tɛ̀ ɛ a tɛ̀ shom, ko a ha bùu.

³⁴Yɛn a wey na yére bemât jey o wɛt, sede remo de Dagwi Darwey a kana nɔng ɛn nu.

³⁵Ba wuna hɛn na yére dyuk o, ba masa begwong beves mɛn.

³⁶Ba re a pyɛ̂ sekwit mɛn fongol, ya tɛ́ ɛ a yɛn rwik e fwɔ.

³⁷Ba nára nèy bewen na behwóng mɛn nɔrɔ̂ rangas vɔk na cēng.

³⁸Ba shushu nemî vemo de vit a hɛn na renɛn, nemî nèy mɛn, bewen na behwong, ba nára nɛ nɔrɔ̂ rangas vɔk na pyɛ̂ sekwît Kanaan. Vwel o ha tɛ́ ɛ́ ligis na nemi mo.

³⁹Ano yɛn a tɛ́ ɛn ligis yi na tomong mɛn, yaga tomong mɛn o yɛn a sé pang na Dagwi wɛt.

⁴⁰Shôm Dagwi Darwey ya hwo e ra bemat mɛ, mwa ano de a kana kasa hɛn, a pat yey mɛ e ra yɛn.

⁴¹A tɛ̀ be gaba e vwɔ̂ yére de ya tɔk Dagwi wɛt, bemat de ba bɛɛ hɛn ves ba re negwɔm e ra yɛn.

⁴²Vê repugu mɛn o ba tak a yɛn, yɛn a sè e nɛ̂n reto mɛn.

⁴³Dagwi Darwey a ga seres hɛn zang pyak, ko yɛn a sogo a yɛ nehywɛ na negaren zɔng. Ano, rezot mɛn ra gwɛ hɛ yaga banɛn mɛn.

⁴⁴Jeng de a di reyɔm mɛn, jeng de a wok sesin mɛn,

⁴⁵a bare na wuna-na-sira mɛ na yɛn, a sege yey mɛ, yaga a tɛ̀ yey na yɛn ding-ding.

⁴⁶A tɛ̀ mwa bemat de ba hashe hɛn besam, be di nemwishish mɛn.

⁴⁷Sey ot, à Dagwi Darwey, Dagwi mot! Tula hot yi e ji yére bemât jey, na wot a somo reza mō rê jɛrɛ, na wot a dak kaa e somo mo.

⁴⁸Bē somo Dagwi Darwey, Dagwi wo BeIsrayɛl, yi e susu mo vɔk e nuyel gbak-gbak! Bemat mwa bē ye, “Ano!” Ko be somo Dagwi Darwey!