Read berom Lɛlɛ 107 Bible Online

Lɛlɛ 107 - berom bible

Lɛlɛ 107

¹Feng in a Dagwi Darwey, yaga a sé wo nerat, tɛ̂ yey mɛ na bemat hê nàra nesheneshey.

²Tik vemo de Dagwi Darwey a ga viri hɛn be ye ano. A viri hɛn yi e vwɔ̂ vê repugu mɛn,

³a tula hɛn yi e bavwel, yi e rwa rak na rwa ta, yi e rwa bato na rwa batin.

⁴Behak mɛn ba kyě gǎ e hêy gbingiring de vit a gwong, ba tɔk sɛ̀ kwɔn de bemat ba sangal ɛ wɛt.

⁵Ba wok na vyong na yêy hwɔshɔ, ba ga ye waa.

⁶E ji reyɔm mɛn, ba tosho a Dagwi Darwey, ko a sey ɛn yi e rɛ.

⁷A kyè na yɛn e gwong de gwa kwey cik, sɛ̌ ba wɔ̀ wul repomo de bemat ba sangal ɛ.

⁸Tik be feng a Dagwi Darwey yaga tɛ̂ yey mɛ, yaga tomông langat de a ra a yɛn.

⁹A ga nɔ̂ng vemo de yey mɛn ye hwɔshɔ nshi, a ga nɔng vemo de ba wok vyong pyɛ́ ryat.

¹⁰Behak a bemat o ba sè bemât ngyang. Ba sangal e lwil mwangalang sizɔng, ba cat ɛn na ngyang, ba sé e rezot,

¹¹yaga bá kyɛ́ ɛn nà gyeng hâ Dagwi, bá byɛs vô redu Womo De A Dal Na Reto Mwa.

¹²A tɛ̀ be vel meles na fwôm negbang, ba gaba, vit a mwât sɛlɛ.

¹³E ji reyɔm mɛn, ba tosho a Dagwi Darwey, ko a sey ɛn yi e rɛ.

¹⁴A pat ɛn yi e lwil mwangalang sizɔng o, a tuyu ngyang mɛn.

¹⁵Tik be feng a Dagwi Darwey yaga tɛ̂ yey mɛ, yaga tomông langat de a ra a yɛn.

¹⁶A ga cɛgɛt ri dyam pama, a ga kpɔgɔm bewɔ́rɔ dyam.

¹⁷Behak bá sè betɔn, bá sɔ reyɔm yaga negbarak mɛn na banɛn mɛn.

¹⁸Nenu mɛn na nɔng ɛn rê pyɛ́ ko tyɔng wɛt, ba sè lɛs na reku.

¹⁹E ji reyɔm mɛn, ba tosho a Dagwi Darwey, ko a sey ɛn yi e rɛ.

²⁰A hanat, ko yɛn a tɛ̀ tyang, a sey ɛn yi e reku.

²¹Tik be feng a Dagwi Darwey yaga tɛ̂ yey mɛ, yaga tomông langat de a ra a yɛn.

²²Tik be nára nenɔrɔ na be feng mɛ, bē ha hâ tomong mɛ e lɛlɛ̂ nzem.

²³Behak be kyè kwɛngɛl e bedwa-nshi berey o, ba ra nejìk e gwogbɔng gworep.

²⁴Yɛn a bɛrɛng tomông Dagwi Darwey, tomông langat de a ra e ji gwɛ.

²⁵A hanat, ko gwogul gwa pɛsɛl, gwa tɛ̀ bagûng nshi be tē lōm.

²⁶Dwa mɛn wa sogso e gwi, wa tē mǔt, bemat o ba ye waa.

²⁷Ba tē dèndes, be ra dedan sede bemât sefeng, mwa sekwɛl mɛn sá sè yapyi.

²⁸E ji reyɔm mɛn, ba tosho a Dagwi Darwey, a sey ɛn yi e rɛ.

²⁹A tɛ̀ gwogul o gwa tumal, bagûng nshi mo ba sǎ yaang.

³⁰Yɛn a vɔk yey pyɛng, yaga kayɛ pyɛ ya ga dyɛng, a wul na yɛn e kwɔ̂n pɔngɔ̂ bedwa-nshi de ba vɔk e yey.

³¹Tik be feng a Dagwi Darwey yaga tɛ̂ yey mɛ, yaga tomông langat de a ra a yɛn.

³²Tik be remo hɛ e regyêng bemat, bē somo hɛ e tulâ bemakuk.

³³Yaga nevês bemat de ba sé sangal e vwel o, Dagwi a tɛ̀ nerɔt ne ye jɔng, lel nshi ba tik nunus, vwel o ha tɛ́ ɛ gbingiring, ko a tɛ̀ vwel de he nɔngɔs pyɛ́ naka he kyɛ́ ɛ vɔ.

³⁵Ko a tɛ̀ bekadung be se e hêy gbingiring a tɛ̀ lel nshi be nunus e vwel hwogot.

³⁶A tik ɛ vemo de be re vyɔng e hwomo, yɛn a lɔk ɛ repomô sangal.

³⁷Yɛn a how cāp, yɛn a tus batîn anap, ko ba sɛ̀ bwal rwat.

³⁸A tɛ̀ nerat e ra yɛn, ba gwɛ̌ hɛn pyak, ko a tik kàra mɛn be tɛt ɛn wɛt.

³⁹Jeng de nepyak mɛn na tɛt ɛn, yi na tak a yɛn, yi na reyɔm na lashê yey,

⁴⁰Dagwi a tɛ̀ nèy lɔ gwɔ̀m ne vos rekyen, a tɛ̀ be kyě gǎ e hêy gbingiring de vit a gwong.

⁴¹Ko a sey bepɛng yi e reyɔm, a tɛ̀ belɔ mɛn be gwɛ̌ hɛn sede kara.

⁴²Vemo de bá se tɛk ba di pyɛ́ yemo, bá vɔk yey pyɛng, ko mwa bemat beves, bá bang a yɛn nenu.

⁴³Tik vê netsitsɛng be tē naka na pyɛ́ yemo, bē bare e ra tɛ̂ yey Dagwi Darwey.