Read berom Lɛlɛ 108 Bible Online

Lɛlɛ 108 - berom bible

Lɛlɛ 108

¹Lwɛlɛ̂ Davit À Dagwi, yey hom ya sé ting, ye dikta hɛ wɛt. Mê ra a hwo lwɛlɛ, mê dak a hwo yom; ey, mê ra ano.

²Ma ga sene wɛng-wɛng, a remo, mê jut yom, me wɔ sene mɛ gwi.

³À Dagwi Darwey, ma rɔda feng a hwo e ji yére bemât jey, ma rɔda ra a hwo lwɛlɛ na yom e ji mɛn.

⁴Hwà tɛ̀ yey na bemat bagat wɛt, hwô sang gas cáng na yɛn ko tyɔng wɛt.

⁵À Dagwi, tɛ̀ nedyɛt gbɔng nerat mō ne tɛ̀ lagwi wo nɛp, tik be di gbɔng nerey mō e ji jey mwa!

⁶Hanat a me, jeng de me yila! Sey ot na vwɔ mō gwô gap! Ano, wot de hwà tɛ̀ yey na wot, wot ê se washak.

⁷Dagwi a hanat yi e kwɔn de be re a yɛ fongol, a ye, “Yey hom ya pɛngɛ sedesi, yaga ma di wɛng. Mê gas repomô Shɛkɛm na bemat hom, mê gas a yɛn Nɛk Sukɔt arɔng.

⁸Bavwêl Gileyat na Manase ba sé benang, Mê sɛ̀ vemo de bê tó a me como yi e yerê Ɛfrayim, ko yerê Yuda yê nɔngɔs me begbɔng begwɔ̀m.

⁹Vwêl Mowap ha sé gwopey zɔng de me kus me mɛ, mê barak kpatak hom e ra vwêl Ɛdɔm, na me dura mɛ, ha sé nang, mê mok, yaga ma ga di wɛng e ra BeFilisti!”

¹⁰À Dagwi, wa ê kyè na me vɔk e Ɛdɔm ɛ? Gbɔng repomo rane de ba gwɔrɔ na jwa-duk.

¹¹A sé e hwo wɛt a? Ko di, hwà ga ye zak a hot, hwó to kyè wô tô como tanga bemat mot wɛt!

¹²Sɛlɛ hot, na wot a di wɛng e ra bemât repugu mot! Mwa sɛlɛ de mwasi ê nɔng ha sé yapyi zɔng.

¹³Ka sede Dagwi a sé tanga wot, wot ê di wɛng, yɛ ê bɔrɔs vê repugu mot.