Read berom Lɛlɛ 109 Bible Online

Lɛlɛ 109 - berom bible

Lɛlɛ 109

¹Lwɛlɛ̂ Davit. Gwá sè e vwɔ̂ mwât kyé na lɛlɛ À Dagwi, hwo de me somo kayɛ jeng, hwo sǎ yuu gbak wɛt!

²Bemât neves na vê kwɛlsɛng ba ga hwo me, be yɛt nebɔs e ra me.

³Bé tɛ̀ me e tē, be ra repugu me, be hwosom me, vit a retin.

⁴Ma tɛ̀ yey na yɛn, me ra won yaga yɛn, ko be tala me na neves.

⁵Be tala me na neves e tô pyɛ́ ryat, be bɛɛ me ves, mwa ano de me tɛ̀ yey na yɛn.

⁶Bē tɛ̀ mwât shɔt vwes e ra yɛ, tik mwât nuha a tɛ̀ sekun mɛ.

⁷Tik be ra a yɛ shɔt, be gang ɛ na yɛ. À Dagwi, tɛ̀ won mɛ he se renɛn!

⁸Tik nepɔlɔ mɛ ne sè tyɔng, tik mwat hwak a jut kwɔn mɛ hê mwat nuyel!

⁹Tik nèy mɛ ne tɛ́ ɛn nehyɛn, ko hwā mɛ a tɛ́ ɛ kuma!

¹⁰Tik nèy mɛ ne sǎ e barin, ko ne kyě gǎ yikyik e de won.

¹¹Tik mwat de e rangal hɛ du, a sey ɛ mwa pyɛ de a vɔk, tik bemat beduk be hashe pyɛ́ de a ga yɔ́m ɛ e ra yɛ!

¹²Mwat hwak a to dura a yɛ nerat kɛ a tosho reyɔm nehyɛn mɛ wɛt!

¹³Tik be wey na kwɔ̀rɔ mɛ hywiri, bē ye bam a reza mɛ e zamâng vey!

¹⁴Tik na Dagwi Darwey a sang ye bam a banɛ̂n bedabeda mɛ kɛ be sang fugut banɛ̂n neng mɛ wɛt!

¹⁵Tik na Dagwi Darwey a bare na banɛn mɛn o kayɛ jeng, tik na a tɛ̀ be ye bam a baza mɛn e jey!

¹⁶Yaga mwat o a bare na a dura nerat wɛt, a tak a bepɛng na vemo de ba bidɛ sɛlɛ, vemo de vit a hɛn na yey ting, a tak a yɛn sɛ̌ ba kushu.

¹⁷A wok netâ mok a bemat gawey, a remo, tik gawey he hwo e ra yɛ! A simo mok a bemat nerat wɛt, à remo, tik nerat ne sè shan na yɛ!

¹⁸Sede remo de e tɛ̀sɛ berugu kayɛ jeng, ano de e mok a bemat gawey. Tik gawey o he yel a yɛ e bek sede nshî sɔ, sede něy de na kyè mwa vɔk e bekup me!

¹⁹Tik gawey o he sè sede gworugu de a bang ɛ mɛ, sede gyindi de e tɛ̀sɛ kayɛ jeng!

²⁰Tik na gawey hane he sè pyɔlɔ de Dagwi Darwey e nɔ̂ng vemo de be tɛ̀sɛ sekun hom, vemo de be ha ha ves e ra me.

²¹Hwo à Dagwi Darwey, Darwey hom, rá a me tyɛng na nerey mō, sey me, yaga hwà sé rwat, ko hwà tɛ̀ yey na me.

²²Ma sé pɛ́ng-pɛng, ma bidɛ sɛlɛ, ba ga kata a me yey.

²³Mê kwɔ̂k ye shǔt sede zinâ nawiri, ma sé sede yɔrɔ de gul gwo gangas.

²⁴Bakwot hom ba sé gbɛrɛk yi na wusal hal, ma ga sɔ́ me, ma ga tɛ́ me gwɔshɔk.

²⁵Ma sé pyɛ byɛs na vê sekun hom, jeng de be di me, be digis bato mɛn.

²⁶À Dagwi Darwey, Dagwi hom, sɛlɛ me, sey me, yaga hwà tɛ̀ yey na me kayɛ jeng.

²⁷Ano, vê repugu hom bê tɔk, e hwo de hwà ra ano, e hwo, à Dagwi Darwey de hwà sey me.

²⁸Yɛn e mok a me gawey, ko hwo, hwô tɛ̀ a me nerat. Yɛn e hwo e ra me, ko yɛn ê de vo rekyen. Ko me, mwât fwom mō, mê vɔk yey pyɛng sizɔng.

²⁹Tik be kyiri vê tɛ́sɛ kun hom na rekyen, tik rekyen mɛn re kyiri hɛn sede gworugu!

³⁰Ma rɔda feng a Dagwi Darwey na gbɔng fwɔ, mê somo hɛ e ji regyêng bemat;

³¹Yaga e dul bepɛng, e sey ɛn yi e vemo de be tɛ̀, be gang ɛn na shɔt.