Read berom Lɛlɛ 112 Bible Online

Lɛlɛ 112 - berom bible

Lɛlɛ 112

¹Somo hin Dagwi Darwey! Vê wɛng a vemo de be sap Dagwi Darwey, vemo de ba vɔk yey pyɛng sizɔng e gyêng badu mɛ!

²Yére mɛ yê vɔk reto e vwel o, yaga Dagwi Darwey ê tɛ̀ a vemo de ba sé tɛk nerat.

³Belɔ mɛn bê vɔk yas pyak, bê sè bedaberey, ko bemat bê bare na tomong rat mɛn nesheneshey.

⁴Yɛn ê sè a vemo de ba sé tɛk negbey de ne nɛp e lwil. Yɛn a sé berat, vê nemwishish, vê gâs badu e tē.

⁵Kayɛ pyɛ yê se naka a vemo de be viri vɔ e de nɔngɔs hwɔpɔ, vemo de be ra byɛ na tsak o.

⁶Vit a pyɛ de yê dikta bemat berat, bemat bê bare na yɛn kayɛ jeng.

⁷Yɛn ê wok bengyip reha reves wɛt, yey mɛn ya sé ting, bê tɛ̀ gap mɛn e ra Dagwi Darwey.

⁸Yey mɛn yê dyɛng, bê vo bengyip wɛt, e yɛnɛ mo, bê di wɛng e ra vê repugu mɛn.

⁹Yɛn ê nɔ̂ng bepɛng washak, ko bemat bê bare na tomong rat mɛn nesheneshey. Yɛn ê vɔk reto, bê nɔ́ng ɛn nerey.

¹⁰Vê neves bê di ano, bê tɛ̀ shom, bê roros yìn, ê yang ɛn kpɔrɔk. Cwey pyɛ́ de yɛn e simo, yê tɛ́ ɛ yapyi.