Read berom Lɛlɛ 115 Bible Online

Lɛlɛ 115 - berom bible

Lɛlɛ 115

¹Wot a vey na be somo hot wɛt, ey, wot a vey wɛt. Dagwi Darwey nju mɛ zɔng de a vey na be somo hɛ, yaga a tɛ̀ yey na wot kayɛ jeng, ko a ye waa a wot wɛt.

²Yaga sɛ́ de yére dyuk yê ye, “Dagwi min á wɛ ɛ?”

³Dagwi mot a sé e lagwi, é ra kayɛ pyɛ de yey mɛ ye simo.

⁴Ko pyɛ̂ sekwit mɛn, ba yong yɛ na dyam shinang na pyɛng o, fwôm vwɔ̂ mwasi zɔng.

⁵Ya vɔk nenu, ko ye ha wɛt, ya vɔk bayis, ko ye bɛrɛng wɛt.

⁶Ya vɔk betong, ko ye wok wɛt, ya vɔk bawol, ko ye wok nesang wɛt.

⁷Ya vɔk vɔ, ko ye kaba mɛ pyɛ wɛt, ya vɔk bol, ko ye kyè mɛ wɛt; vit a yɛ na fwɔ̂ ha.

⁸Tik vemo de be yong yɛ be sè vit a reto sede yɛ, ano, mwa na vemo de be tɛ̀ gap mɛn e ra yɛ.

⁹À yin BeIsrayɛl, tɛ̀ in gap e ra Dagwi Darwey! Yɛ wɛ e sɛlɛ hin, a sé ruga min.

¹⁰À yin yerê Aharon, bepiris Darwey, tɛ̀ in gap e ra yɛ! Yɛ wɛ e sɛlɛ hin, a sé ruga min.

¹¹À yin de yin e re a Dagwi Darwey fongol, tɛ̀ in gap e ra yɛ! Yɛ wɛ e sɛlɛ hin, a sé ruga min.

¹²Dagwi Darwey e bare na wot, a rɔda tɛ̀ a wot nerat; ê tɛ̀ a BeIsrayɛl nerat, ê tɛ̀ a yerê Aharon nerat.

¹³Ê tɛ̀ a vemo de be re a yɛ fongol, bedaberey na bepɛng nerat.

¹⁴Tik na Dagwi Darwey a gwɛ̌ nepyak min, yin na nèy min!

¹⁵Tik na Dagwi Darwey de a yong lagwi na jey, a tɛ̀ a yin nerat!

¹⁶Lagwi wa sé wo Dagwi Darwey pyɛ mɛ, ko jey — a tik a bemasi yɛ.

¹⁷Vemo de ba ga kushu, vemo de ba ga kyè vɔk e kwɔ̂n bevuvwel, bê somo Dagwi Darwey wɛt.

¹⁸Ko wot à wot, wot ê somo Dagwi Darwey, yi e remo vɔk e nesheneshey. Somo hin Dagwi Darwey!