Read berom Lɛlɛ 116 Bible Online

Lɛlɛ 116 - berom bible

Lɛlɛ 116

¹Ma tɛ̀ yey na Dagwi Darwey. Jeng de ma dak gabɔk na yɛ, a wok fwɔ hom.

²A wet betong na me, yaga ano, ma rɔda ra won na yɛ jeng de ma sé kwen.

³Ngyâng reku ya ga rɔgɔs me, bengyip kwɔ̂n bevuvwel ba ga vo me. Ma di reyɔm, ma vos yey ding-ding,

⁴ko ma yila Dagwi Darwey, ma ye, “Áaa! À Dagwi Darwey, sey me!”

⁵Dagwi Darwey a sé wo toshô reyɔm, wo nerat, Dagwi mot a sé wo nemwishish.

⁶Dagwi Darwey e dul bepɛng; ma ga tala me, ko a de sey me.

⁷A remo, a yang me hagalak, yaga Dagwi Darwey a ga dura a me nerat.

⁸À Dagwi Darwey, hwà ga sey me yi e reku, hwà yishing a me nemwishil, hwà tik ma gaba wɛt.

⁹A remo, ma rɔda kyè e nuyel mō, e jey yemo de bemat be sangal ɛ.

¹⁰Ma sangal gak e ji tsak o, mwa ano de ma ye, “Ma ga wok rebek ding-ding.”

¹¹Ma ga yel e garigim, ma ye, “Vit a mwat de bê tɔk tɛ̀ gap e ra ha mɛ.”

¹²E sɛ́ de mê nɔ̂ng Dagwi Darwey, yaga mwa nerat de a dura a me ɛ?

¹³Mê nára a yɛ nɔrɔ̂ nshî anap, mê somo reza mɛ.

¹⁴Mê tala hɛ mwa pyɛ́ de ma ga sira me, mê tala hɛ e nuyêl mwa bemat mɛ.

¹⁵Vemo de ba sé pang na Dagwi Darwey, ba vɔk nerat e bayis mɛ, reku mɛn re royo a yɛ yey.

¹⁶Mwin, à Dagwi Darwey, ma sé mwât fwom mō, ma sé ra a hwo fwom tyɛng sede remo de dē hom á ra. Hwà ga viri me yi e ngyâng reku.

¹⁷Mê nára a hwo nɔrɔ, na me feng a hwo mɛ, mê ye, hwà sé Dagwi hom.

¹⁸Mê tala hwo mwa pyɛ́ de ma ga sira me. Mê tala hwo e nuyêl mwa bemat mō,

¹⁹e nelala gbɔng duk re a hwo ɛ fongol, e tê Yɛrusalɛm. Somo hin Dagwi Darwey!