Read berom Lɛlɛ 118 Bible Online

Lɛlɛ 118 - berom bible

Lɛlɛ 118

¹Feng in a Dagwi Darwey, yaga a sé wo nerat. Tɛ̂ yey mɛ na bemat hê nàra nesheneshey!

²Tik BeIsrayɛl be ye, “Tɛ̂ yey mɛ na bemat hê nàra nesheneshey!”

³Tik yerê Aharon, bepiris, be ye, “Tɛ̂ yey mɛ na bemat hê nàra nesheneshey!”

⁴Tik vemo de be re a Dagwi Darwey fongol be ye, “Tɛ̂ yey mɛ na bemat hê nàra nesheneshey!”

⁵Jeng de ma sé e ji reyɔm, ma yila Dagwi Darwey, a wok me, a pat me.

⁶Dagwi Darwey a sé tanga me, mê wok bengyip wɛt. E sɛ́ de mwat ê ra a me ɛ?

⁷Dagwi Darwey a sé tanga me, e sɛlɛ me, ko mê bɛrɛng de ê wey na vemo de be bɛɛ me ves.

⁸A dal na be jama kwɔ̂n dal na Dagwi Darwey de bê tɛ̀ gap e ra mwasi.

⁹A dal na be jama kwɔ̂n dal na Dagwi Darwey, de bê tɛ̀ gap e ra bemat beting.

¹⁰Mwa yére bemât jey ya gwɔrɔ me, ko yi na retô Dagwi, ma wey na yɛn.

¹¹Yɛn a gwɔrɔ me e kawɛ bak, ko yi na retô Dagwi Darwey, ma wey na yɛn.

¹²Yɛn a gushung hɛn e ra me sede shok, Ko yi na retô Dagwi Darwey, ma wey na yɛn, gushung o ha kwey ziri sede kya ha ye mɛ̀lɛm à sɔng hwogot.

¹³Yɛn a yɛklɛ me ding-ding, bwang o tyɔng ka ma gaba, ko Dagwi Darwey a sɛlɛ me.

¹⁴Dagwi Darwey a sé gap hom, na tîn lwɛlɛ hom, yɛ a sé mwât sey me.

¹⁵Bé ra lɛlɛ̂ yey pyɛng ve wɛng e bûk bemât Dagwi: “Dagwi Darwey a dura gbɔng reto mɛ;

¹⁶a nara vwɔ yege mɛ e gwi, yaga a di wɛng. Dagwi Darwey a dura gbɔng reto mɛ!”

¹⁷Mê ku wɛt, mê sangal kwen, ko mê ha pyɛ́ de Dagwi Darwey a ga ra.

¹⁸A tabak me vɛ̌t bɛs, ko a tik me ku wɛt.

¹⁹Wunta hin a me ri Gbɔng Duk Re Fongol, na me yel ɛ, na me feng a Dagwi Darwey.

²⁰E rwi yel vɔk na yɛ a gwomo; vemo de ba sé cik e bayis mɛ bê yel ɛ.

²¹Me feng a hwo, à Dagwi Darwey, yaga hwà ga hanat a me, hwà ga sey me.

²²Gwofwa de bemât lɔk ba kana kyɛ́ ɛn gwɛ, gwa de tɛ́ ɛ gwomo de gwa dal jam ɛ e fwom o.

²³E Dagwi Darwey de a ra pyɛ yemo, ko a sé a wot pyɛ langat.

²⁴Tuk a hemo de Dagwi Darwey a ga yong, tik wot vɔk yey pyɛng, wot rɛɛ na nzem e ji mo.

²⁵Gabɔk wɛt, sey ot, à Dagwi Darwey! À Dagwi Darwey, gabɔk wɛt, nɔng ot wɛng!

²⁶Tik Dagwi a tɛ̀ nerat e ra womo de e vɛ̀sɛ e rezâ Dagwi Darwey, yi e lɔ mɛ wot e mok nerât Dagwi e ra yin.

²⁷Dagwi Darwey nju mɛ de a sé Dagwi, yɛ e bɛrɛng hot na nerat. Susu hin nzem! Kyè in na nelang tyét vɔk e gàgbang rangas yas.[40]

²⁸Hwo wɛ à Dagwi hom, me feng a hwo, hwo wɛ à Dagwi hom, me nɔng o nerey.

²⁹Feng in a Dagwi Darwey, yaga a sé wo nerat. Tɛ̂ yey mɛ na bemat hê nàra nesheneshey!