Read berom Lɛlɛ 119 Bible Online

Lɛlɛ 119 - berom bible

Lɛlɛ 119

¹Vê wɛng a vemo de negwɔn mɛn na sila gyat, vemo de be gyeng basâ Dagwi Darwey!

²Vê wɛng a vemo de be gyeng ha mɛ, vemo de be jama hɛ na yey mɛn mwa!

³Be sɛ̀ ɛn na buru hak wɛt, ko be raa begwong mɛ.

⁴À Dagwi Darwey, hwà ga nɔng ot badu mō. Hwó simo wot a ye ngyɛ́k, wot gyeng vɛ mwa.

⁵Káa! Ka ma yang tumal ting na yey hom mwa, e de gyêng badu mō,

⁶kɛ ma yang tɛ̀ nehywɛ e ra badu mō mwa, ko mê wok rekyen wɛt.

⁷Jeng de me masa badu mō vê tsak o, me somo hwo na yey ryat.

⁸Mê gyeng badu mō, hwo ye waa a me vit wɛt!

⁹E rɛ̌ de bwôt mwat e gyeng to mɛ naka ɛ? Sɛ̌ yi na gyêng ha mō, à Dagwi.

¹⁰Me tē ngyɛ́k na me gyeng ha mō na yey hom mwa, hwo tik na me hala gyêng badu mō wɛt!

¹¹Ma ga tik ha mō e ji yey hom, yaga mê kwon ra a hwo renɛn wɛt.

¹²À Dagwi Darwey, me somo hwo! Basa a me badu mō.

¹³Me sǎ e de hâ mwa badu mō.

¹⁴Ma vɔk yey pyɛng e raà ha mō, tyɛng na mwat de a vɔk yey pyɛng na yele yɔkyɔk.

¹⁵Mê tɔrɔng e ra badu mō, mê tɛ̀ nehywɛ e râ begwong mō.

¹⁶Me wok netâ badu mō, mê ye bam à ha mō wɛt.

¹⁷Rá a me, mwât fwom mō, naka, à Dagwi Darwey, na me gwɛ sangal kwen, na me gyeng ha mō.

¹⁸Wunta bayis hom, na me bin di basa rat de ha sé e ji badu mō.

¹⁹Ma sé sangâl rekyɛn e jey o, hwo lɛrɛ badu mō yi na me wɛt.

²⁰Yey hom ye hwɔshɔ, me wok cwey badu mō kayɛ jeng.

²¹Hwó gyong vemo de be paa jim — vê gawey a vemo de ba hala gyêng badu mō.

²²Sey me yi e byɛs na woros mɛn, yaga ma ga gyeng ha mō.

²³Bemât nuyel be man, be yong há e ra me, ko me, mwât fwom mō, mê tɔrɔng e ra badu mō.

²⁴Me wok netâ ha mō, he vos a me badu.

²⁵Ma vungu me e fongol, turu neken hom tyɛng na há mō.

²⁶Ma ga ha a hwo pyɛ̂ mwa de ya bɔrɔk me, ko hwà hanat a me; bàsa a me badu mō.

²⁷Sɛlɛ me na me tɔk badu mō, ano mê tɔrɔng e ra tomông langat mō.

²⁸Ma ga tɛ́ me gbɛrɛk na yêy láshe, gwɛ̌ a me gap, sede remo de hwà ga sira hwo.

²⁹Gyeng me yi e negwɔn kwɛlɛng, dura a me nerat mō, ko basa a me badu mō.

³⁰Ma ga tɛ̀ e yey hom, bē kwon tó yey na me wɛt. Ma ga tik badu mō e nuyel hom.

³¹À Dagwi Darwey, mê tik ha mō wɛt, tik me wok rekyen wɛt!

³²Mê tē ngyɛ́k e de gyêng badu mō, yaga hwô gwɛ a me tɔk.

³³À Dagwi Darwey, basa a me na me raa badu mō, mê gyeng vɛ vɔk e yɛnɛ mo.

³⁴Nɔng me tɔk, na me gyeng basa mō, na me gyeng hɛ na yey hom mwa.

³⁵Kyè na me e gwong de badu mō be simo; hane hɛ a pyɛ simo hom.

³⁶Tɛ̀, me vɔk cwey ha mō, ko me vɔk cwey nedanerêy jey wɛt.

³⁷Bāng bayis hom yi e pyɛ́ de ya sé yapyi; kyè na me — yi ano hwô turu neken hom.

³⁸Sila sira mō vey na me, mwât fwom mō, síra de hwà sira a vemo de be re a hwo fongol.

³⁹Pyɛ́ de hwà nɔng me nu e ra yɛ, ya dul me yi e byɛs de me wok bengyip hɛ.

⁴⁰Yàa! Ma wok cwey badu mō! Gyeng neken hom, yaga hwà sé wo tsak o.

⁴¹À Dagwi Darwey, rá pyɛ de ye dura, hwà tɛ̀ yey na me. Sey me sede remo de hwà sira hwo.

⁴²Ano, mê tɔk hanat a vemo de be byɛs me, yaga ma tɛ̀ gap e ra ha mō.

⁴³Sɛlɛ me na me ha hâ tsak o kayɛ jeng, yaga ma sɛt yey hom e ra badu mō.

⁴⁴Mê re nuyel na gyêng badu mō neshey gbak-gbak.

⁴⁵Mê kyě kyè na to hom e gwi, yaga ma ga nɔng to hom e gyêng badu mō.

⁴⁶Mê ha ha mō e nuyêl begbɔng begwɔ̀m, ko mê wok rekyen wɛt.

⁴⁷Ma tɛ̀ yey na badu mō, me wok netâ gyêng vɛ.

⁴⁸Ma nɔ̂ng badu mō nerey, me tɛ̀ yey na vɛ, ko me tɔrɔng e ra vɛ.

⁴⁹Bare na ha mō vey na me, mwât fwom mō, e rà hɛ de ma sɛt ɛ yey hom.

⁵⁰E jeng reyɔm, pyɛ de ye wɔrɔk me a yet ngan: há de hwà sira mo he turu neken hom.

⁵¹Bemat de be paa jim be shɛgɛsh me vit à yɛnɛ, ko mê tik gyêng basa mō wɛt.

⁵²À Dagwi Darwey, jeng de me bare na badu mō vê yimo raane, badu mō mo be wɔrɔk me.

⁵³Jeng de me di bemat beves de be kyɛ́ ɛn basa mō, e tē me puu na shom.

⁵⁴Badu mō vɛ a retô lɛlɛ hom e kagwa de ma sé ɛ na sangal.

⁵⁵À Dagwi Darwey, me bare na hwo naturuk, ko mê gyeng basa mō.

⁵⁶Ma sé gyeng badu mō, hemo hɛ à neken hom.

⁵⁷À Dagwi Darwey, hwà sé a me sede nàp hom, ma ga sira, mê gyeng ha mō.

⁵⁸Ma shonong e ra hwo na yey hom mwa, wok nemwishish hom, sede remo de hwà ga sira hwo.

⁵⁹Ma ga bare e ra negwɔn sangal hom, ko ma ga doyo e de raà badu mō.

⁶⁰Me tē wàkwak na me gyeng badu mō, me lashe jeng wɛt.

⁶¹Bemat beves ba ga rene me na segun, ko me, ma ye bam a basa mō wɛt.

⁶²E tê turuk, me sene, na me feng a hwo yaga badu mo vê tsak o.

⁶³Ma sé sâ mwa vemo de be sap o, mwa vemo de be raa badu mō.

⁶⁴À Dagwi Darwey, hwà tɛ̀ yey na bemasi mwa e kagwa e jey; bàsa a me badu mō.

⁶⁵À Dagwi Darwey, ma sé mwât fwom mō, ko hwà gyeng sira mō wɔgɔ, hwô tē naka na me.

⁶⁶Nɔng me tɔ́k na bɛ́rɛng ting, yaga me tɛ̀ gap e ra badu mō.

⁶⁷Ma kana kyɛ́ me nà wok ha sɛ̌ jeng de hwà tabak me, a remo, me gyeng ha mō.

⁶⁸Hwà sé wo nerat, ko kayɛ pyɛ de hwo ra ya sé ryat; bàsa a me badu mō.

⁶⁹Vemo de be paa jim ba ga vɛ́sɛ nebɔs e ra me, ko me gyeng badu mō na yey hom mwa.

⁷⁰Neyey mɛn na sé dirik, ko me, me wok netâ gyeng badu mō.

⁷¹Tabak de hwà ra a me ha sè a me rat, yaga ha tɛ̀, ma masa badu mō.

⁷²Basa de hwà basa a me ha dal na nerat, ha dal dyam shinang na pyɛng, gu e ra gu.

⁷³Hwà yong me, hwà tɛ̀ me. Nɔng me netsitsɛng na me masa badu mō.

⁷⁴Vemo de be sap o, bê di me, bê vɔk yey pyɛng, yaga ma sɛt yey hom e ra ha mō.

⁷⁵À Dagwi Darwey, ma tɔk badu mō ba sé tsak o, hwà ra tyɛng de hwà tabak me.

⁷⁶Ma sé mwât fwom mō. Tɛ̂ yey mō he wɔrɔk me, sede remo de hwà sira a me.

⁷⁷Wok nemwishish hom, na me turu me, yaga me wok netâ basa mō.

⁷⁸Tik vemo de be paa jim be wok rekyen, yaga ba ga tɛ̀ a me renɛn, vit a retin. Ko me à me, mê tɔrɔng e ra badu mō.

⁷⁹Tik vemo de be sap o, ko ba to tɔk ha mō, be doyo vey na me.

⁸⁰Tik na me gyeng badu mō na yey rining, ko mê wok rekyen wɛt.

⁸¹Ma vɔk yêy hwɔshɔ na hwo sey me! Ma sɛt yey hom e ra ha mō.

⁸²Ma ga ruru e de gyêng pyɛ de hwà sira mo, ma ye, “E yɛ̌ jeng de hwô wɔrɔk me ɛ?”

⁸³Ma ga gunung me sede rehwo hwogot, ko ma ye bam a badu mō wɛt.

⁸⁴Ma rɔda gwɛ̌ gyeng vɔk e yɛ̌ jeng arɛt? E yɛ̌ jeng de hwô tabak vê tak a me ɛ?

⁸⁵Bemat de be paa jim, de be gyeng badu mō wɛt, ba ga cing revɔng, na me gaba ɛ.

⁸⁶Mwa badu mō ba sé pyɛ tɛ̂ gap. Bemat be tak a me, vit a retîn pyɛ mo. Vey sɛlɛ me!

⁸⁷Bwang o tyɔng na be wey na me, ko me, ma tik gyêng badu mō wɛt.

⁸⁸Yaga hwà tɛ̀ yey na me, turu me; ano mê gyeng badu mō.

⁸⁹Dagwi Darwey ê nàra nesheneshey! Há mɛ hê nàra tyɛng sede lagwi wô nàra.[41]

⁹⁰Hwô tik bemat mō ko tyɔng wɛt mwa kahɛ zamang. Hwà tɛ̀ jey e kwɔn de ya sé ɛ, ko a yane e dem yɛ.

⁹¹Mwa pyɛ́ de hwà yong, a yane e dem yɛ vey e yunung, ye gyenges ha mō, yaga ya sé besam mō.

⁹²Ka ma wok netâ basa mō wɛt, Ka ma ga yang wey e reyɔm hom.

⁹³Mê sang ye bam a badu mō wɛt, yi na vɛ de hwà tik me kwen.

⁹⁴Ma sé mwo, ko ma ga nɔng tó hom e gyêng badu mō. Vey sɛlɛ me!

⁹⁵Bemat beves ba sé gyeng, na be wey na me, ko me tɔrɔng e ra ha mō.

⁹⁶Ma di, mwa pyɛ́ de ya sila ngyɛ́l ya ka sé gyat wɛt, sɛ̌ badu mō.

⁹⁷Di, ma tɛ̀ yey na basa mō sedesi! Me tɔrɔng e ra hɛ mwa wosho.

⁹⁸Badu mō be tɛ̀, me vɔk netsitsɛng me dal mɛ vê repugu hom, ba sé e ji yey hom kayɛ jeng.

⁹⁹Ma ga sɛ̀ tɔk de ha dal hê mwa bemat de ba basa a me, yaga me tɔrɔng e ra ha mō.

¹⁰⁰Ma ga sɛ̀ tɔk de ha dal hê bemakuk, yaga me gyeng badu mō.

¹⁰¹Ma ga tele me kagwɛ gwông renɛn, na me bin gyeng ha mō.

¹⁰²Ma ga tik nà gyeng badu mō wɛt, yaga e hwo de hwà ga basa a me.

¹⁰³Há mō ha ta a me, ha dal shok na nerɔkrɔk!!

¹⁰⁴Me sɛ̀ tɔk yi na badu mō, yaga ano, me kyɛ́ me kagwɛ gwɔng bɔs.

¹⁰⁵Há mō ha sé sede mwôl kya na me, he tɛ̀ gwong de me kyè ɛ gwo se gbey.

¹⁰⁶Ma ga vo nu na me gyeng badu mō de ba sé mwin, ko ma rɔda sila hɛ.

¹⁰⁷Ma ga sɔ rezot ding-ding. À Dagwi Darwey, turu me, sede remo de hwà vo nu.

¹⁰⁸Sey feng hom, sede nɔrɔ de me nára a hwo. Basa a me badu mō.

¹⁰⁹Mwa ano de neken hom na sé e ji kya kayɛ jeng, ko mê ye bam à basa mō wɛt.

¹¹⁰Mwa ano de bemat beves ba ga rene segun yaga me, ko ma ga tik nà gyeng badu mō wɛt.

¹¹¹Ma ga jut ha mō sede pyɛ ryat sizɔng gbak-gbak, ko he tɛ̀ yey hom ye pɛngɛ.

¹¹²Ma ga tɛ̀ e yey hom mê gyeng badu mō, hemo hê se pyɔlɔ hom gbak-gbak.

¹¹³Me bɛɛ bemât nenu-neba ves, ko ma tɛ̀ yey na basa mō.

¹¹⁴Hwà sé a me sede ruga na kwɔ̂n dal. Ma sɛt yey hom e ra ha mō.

¹¹⁵Gas in na me, à yin bemat nengyas! Me simo gyêng badu Dagwi hom.

¹¹⁶Vɔk me, sede remo de hwà vo nu, na me gwɛ̌ sangal ɛ kwen. Ma sɛt yey hom e ra hwo. Hwo tik me wok rekyen wɛt!

¹¹⁷Vɔk me, ko mê sangal tyang, mê tɛ̀ badu mō e yey kayɛ jeng.

¹¹⁸Hwó ye zak a mwa vemo de be tik nà gyeng badu mō, netsitsɛng de yɛn e ra na sé yapyi zɔng.

¹¹⁹Hwó ye zɛ́p a bemat beves sede gbàrak dyam, yaga ano de ma tɛ̀ yey na ha mō.

¹²⁰Bek hom he vow, yaga me wok bengyip mō, ko me sap shɔt mō.

¹²¹Ma ga ra pyɛ de ya sé tsak o, ya sé tɛk. Hwo nára me e vwɔ̂ bemât tak a me wɛt.

¹²²Vo a me, sam mō, nu na me sɛ̀ netyang. Hwo tik bemat de be paa kwas be tak a me wɛt.

¹²³Ma ga ruru e de gyeng na hwo vey sey me, na hwo nɔng me wɛng, sede remo de hwà vo nu.

¹²⁴Hwà sé wo nerat. Rá na me, sam mō tyɛng na nerat mō mo. Bàsa a me badu mō.

¹²⁵Ma sé sam mō. Nɔng me tɔk, na me bin tɔk ha mō.

¹²⁶À Dagwi Darwey, jeng a yemo de hwô ra pyɛ cak! Bemat ba ga gyili basa mō!

¹²⁷Ma tɛ̀ yey na badu mō, a dal dyam shinang, a dal celes dyam shinang.

¹²⁸Ey, ma jut mwa badu mō ba sé tyɛng, ma kyɛ́ me kagwɛ gwông bɔs.

¹²⁹Badu mō ba sé pyɛ̂ langat, yaga ano, me gyeng vɛ na yey hom mwa.

¹³⁰Bemat de be basa ha mō be sɛ̀ negbey, he nɔ̂ng vemo de ba bidɛ tɔk netsitsɛng.

¹³¹Yey hom ye hwɔshɔ tyɔng wɛt, na me sɛ̀ badu mō.

¹³²Doyo vey na me, dura a me nerat mō, sede remo de hwó dopse ra na vemo de be tɛ̀ yey na hwo.

¹³³Tɛ̀ me tumal gak, sede remo de hwà vo nu. Hwo tik renɛn re ré gap hom wɛt.

¹³⁴Sey me yi e vemo de be tak a me, na me bin gyeng badu mō.

¹³⁵Tik na hwo bɛrɛng me, sam mō, na nerat, ko basa a me badu mō.

¹³⁶Nemwishil ne dɔng yi e bayis hom, yaga bemat be gyeng basa mō wɛt.

¹³⁷À Dagwi Darwey, hwà sé cik, há de hwà yɛrɛ ha sé tyɛng.

¹³⁸Badu de hwà tɛ̀ ba sé tsak o, ba sé pyɛ tɛ̂ gap tyɔng wɛt.

¹³⁹Jeng de me di vê repugu hom be kyɛ́ ɛn ha mō, e tang me vwes.

¹⁴⁰Pyɛ de hwà ha a me ya sé pyɛ tɛ̂ gap, ko me, sam mō, ma tɛ̀ yey na yɛ.

¹⁴¹Ma vey pyɛ cak wɛt, be byɛs me, ko ma ye bam a badu mō wɛt.

¹⁴²Hwó ra pyɛ́ tyɛng kayɛ jeng, bása mō ha sé tsak o.

¹⁴³Me sɔ reyɔm, me to wok bɔrɔk e yey, ko me wok netâ badu mō.

¹⁴⁴Badu mō ba sé tsak o gbak-gbak, nɔng me tɔ̂k vɛ na me gwɛ̌ sangal kwen.

¹⁴⁵À Dagwi Darwey, ma tosho a hwo na yey hom mwa. Hanat a me, ko ma rɔda gyeng badu mō.

¹⁴⁶Me ra won na hwo, sey me, na me bin gyeng ha mō.

¹⁴⁷Gyam gwi gwo nusu, me tosho yaga sɛlɛ. Ma sɛt yey hom e ra há mō.

¹⁴⁸Me pɔlɔs vit a kenevwa e bayis, me tɔrɔng e ra ha mō.

¹⁴⁹À Dagwi Darwey, wok fwɔ hom, yaga hwà tɛ̀ yey na me. Rá pyɛ de ya sé tyɛng, na me gwɛ̌ sangal ɛ kwen.

¹⁵⁰Vemo de be yong begwong beves be kyè vey bagat, ko basa mō — yɛn a ga hala hɛ.

¹⁵¹Ko hwo à hwo, hwà sé bagat na me, mwa badu mō ba sé tsak o.

¹⁵²Yimo raane, ma ngyɛgɛt badu mō, ko ma di, hwà tɛ̀ vɛ na be nàra gbak-gbak.

¹⁵³Di reyɔm hom, pat me yi e rɛ, yaga ma ga ye bam a basa mō wɛt.

¹⁵⁴Tumal a me e pyɛ de ya sɛ̀ me, pat me! Tik me gwɛ̌ sangal kwen, sede remo de hwà vo nu.

¹⁵⁵Hwô sey bemât ragas neves wɛt, yaga pyɛ mɛn ya sé na badu mō wɛt.

¹⁵⁶À Dagwi Darwey, hwó wok nemwishish bemat mō sedesi, rá pyɛ de ya sé tyɛng, na me gwɛ̌ sangal ɛ kwen.

¹⁵⁷Ma vɔk bemât repugu na vemo de be tak a me pyak, mwa ano, ma ka tik gyêng badu mō wɛt.

¹⁵⁸Ma di bemât halsâ badu mō, ko a tē me vwes, yaga yɛn e gyenges ha mō wɛt.

¹⁵⁹À Dagwi Darwey, di, ma tɛ̀ yey na badu mō! To turu me, yaga hwà tɛ̀ yey na me.

¹⁶⁰Bé tɔk tɛ̀ gap e ra mwa pyɛ́ de hwà ha, mwa badu mō ba sé tsak o, bê nàra gbak-gbak.

¹⁶¹Bemât nuyel ba ga tak a me, vit a tin, ko e há mō zɔng de me sap hɛ.

¹⁶²Nu de hwà vo he tɛ̀, me ra biibi, sede mwat de a hashe pyɛ́ pyak e de como.

¹⁶³Me kyɛ́ me nebɔs, e tē me vwes, ko me tɛ̀ yey na basa mō.

¹⁶⁴Me somo hwo kahɛ tuk zang taama yaga badu mō vê tsak o.

¹⁶⁵Vemo de be tɛ̀ yey na basa mō be sangal bɛs tyɔng wɛt. Vit a pyɛ cak de ye tɛ̀, be ye bugurɛk.

¹⁶⁶À Dagwi Darwey, ma sé gyeng na hwo sɛlɛ me, mê ra mwa pyɛ́ de hwà nɔng nu.

¹⁶⁷Me gyeng ha mō, me tɛ̀ yey na hɛ tyɔng wɛt.

¹⁶⁸Hwà tɔk kayɛ pyɛ de me ra, hwà tɔk, me gyeng badu mō na ha mō mwa.

¹⁶⁹À Dagwi Darwey, wok sesin hom! Nɔng me tɔk yi na ha mō.

¹⁷⁰Wok tosho hom, sey me, tyɛng na nu de hwà vo.

¹⁷¹Ma rɔda somo hwo, yaga hwó basa a me badu mō.

¹⁷²Ma rɔda ra lwɛlɛ e ra nu de hwà vo, yaga mwa badu mō ba sé tsak o.

¹⁷³Nára vwɔ mō, na hwo sɛlɛ me, yaga ma ga kasa, na me raa badu mō.

¹⁷⁴À Dagwi Darwey, me gyeng tyɔng wɛt, na hwo sey me. Ma wok netâ basa mō.

¹⁷⁵Tík me kwen, na me somo hwo, tik badu mō be sɛlɛ me!

¹⁷⁶Ma ga vuru me sede tyimit de ya vuru hɛ. Jama me, sam mō, toyo na me, yaga ma ga ye bam a badu mō wɛt.