Read berom Lɛlɛ 124 Bible Online

Lɛlɛ 124 - berom bible

Lɛlɛ 124

¹Lwɛlɛ̂ Davit de bê ra e gwong vɔk e Yɛrusalɛm Dagwi Darwey á sè e bak mot! Tik na BeIsrayɛl be ye:

²“Dagwi Darwey á sè e bak mot! Ka ano wɛt, jeng de bemât repugu mot bá hwo ot,

³ko yey mɛn yá ye puu e ra wot, ka bá yang wɔlɔk hot beken.

⁴Ka nshi na ga yang rung ot, ko rɔt ha ga yang re ot,

⁵tê funglang nshi ha ga yang wey na wot.”

⁶Tik wot somo Dagwi Darwey! A gyep ot yi e vê repugu de ba hwo e ra wot sede ngyāma vyes.

⁷Wot a sé sede gwonon de gwa hywit ɛ yi e segun mwât renê gwɛ, segun o sa tut ɛ, ko wot a sé washak.

⁸Dagwi Darwey, a yong jey na lagwi; e yɛ wɛ de e sɛlsɛ hot.