Read berom Lɛlɛ 135 Bible Online

Lɛlɛ 135 - berom bible

Lɛlɛ 135

¹Somo Dagwi Darwey, somo reza mɛ, somo hin hɛ à yin bemât fwom mɛ,

²yin de yin e nàra e lɔ mɛ, e nelalâ lɔ Dagwi mot.

³Somo Dagwi Darwey yaga a sé wo nerat! Ra in lwɛlɛ̂ somô reza mɛ na yóm, yaga ra sé pyɛ yey pyɛng!

⁴Dagwi Darwey a ga kasa Yakɔp yaga yɛ, Israyɛl sede pyɛ de a dal na nɔng yɛ nerey.

⁵Ma tɔk, Dagwi Darwey a sé wo nerey, Dagwi mot a dal mwa ci na reto.

⁶Mwa pyɛ de a simo e ra yɛ e lagwi na e jey, e berep na mwa e neciwil vɛ.

⁷E tɛ̀ bale be tut yi e yɛnɛ̂ jey, e tɛ̀ nedɛbɛt yaga rwak, e halsa gul yi e begban vɛ.

⁸A mɔbɔs nèy negel Misra, ne bemasi na ne ngyāma.

⁹A tomo pyɛ̂ dura bes na yê langat e ra Misra, e ra Farawo tanga mwa bemât fwom mɛ,

¹⁰A wey na yére bemât jey pyak, a mɔbɔs begbɔng begwɔ̀m tyɔng wɛt,

¹¹Sihɔn, gbɔng gwɔ̀m BeAmɔr na Ɔk, gbɔng gwɔ̀m Bashan tanga mwa segwɔm yɛnɛ sevwêl Kanaan,

¹²a nɔng sevwel mɛn benap benap na bemat mɛ BeIsrayɛl.

¹³Dagwi Darwey, reza mo rê nára gbak-gbak, bê remo hwo e mwa nezamang.

¹⁴Dagwi Darwey ê ra a bemat mɛ shɔt, ê wok nemwishish bemât fwom mɛ.

¹⁵Pyɛ̂ sekwît bemât lwil yɛ a pyɛ de ba yong na dyam pyɛng, tanga shinang; yông vɔ bemasi.

¹⁶Ba vɔk nenu, be ha wɛt, ba vɔk bayis, be bɛrɛng wɛt,

¹⁷Ba vɔk betong, be wok wɛt, vit a hɛn na nesong.

¹⁸Vemo mwa de ba yong vɛ na mwa vemo de ba tɛ̀ gap na vɛ, bê tɛ́ ɛn sede yɛ.

¹⁹Somo Dagwi Darwey, à yin BeIsrayɛl, somo hin Dagwi Darwey à belɔ Aharon.

²⁰Somo hin Dagwi Darwey, à yin BeLevi, yin de yin e sap Dagwi Darwey, somo hin hɛ;

²¹Somo hin Dagwi Darwey yi e Siyɔn, yɛ de a sé sangal e Yɛrusalɛm, Somo Dagwi Darwey.